Heri esi grontapu o tron wan paradijs!

„Wi Tata na hemel, Joe nem moe de santa! Joe kownoekondre moe kom! Joe wani moe go doro na grontapoe so leki na ini hemel!” —Mateyus 6:9, 10, Da Bijbel na ini Sranantongo.

A BEGI disi di furu sma sabi leki a Wi Tata begi, e gi libisma howpu. Na sortu fasi?

Soleki fa a Wi Tata begi e taki, dan Gado Kownukondre sa meki a wani fu Gado pasa na grontapu soleki fa a e pasa now na ini hemel. A wani fu Gado na fu meki grontapu tron wan Paradijs baka (Openbaring 21:1-5). San na a Kownukondre fu Gado trutru, èn fa a o meki grontapu tron wan Paradijs baka?

Gado Kownukondre na wan trutru tirimakti

Gado Kownukondre na wan trutru tirimakti. Na ini wan tirimakti yu musu abi tiriman, yu musu abi wet, èn yu musu abi borgu. Gado Kownukondre abi den sani disi? Luku fa Bijbel e gi piki tapu den dri aksi di e kon now:

Suma na den tiriman na ini Gado Kownukondre? (Yesaya 33:22) Yehovah Gado poti en Manpikin, Yesus Krestes, fu tiri a Kownukondre (Mateyus 28:18). Na ondro a tiri fu Yehovah, Yesus teki wan spesrutu nomru fu sma komoto fu „ibri lo, tongo, pipel, nanga kondre”, èn makandra nanga Yesus den sma disi „o tiri grontapu leki kownu”.—Openbaring 5:9, 10.

Sortu wet Gado Kownukondre poti gi den borgu fu en? Den borgu fu a Kownukondre musu du spesrutu sani efu den wani gi yesi na sonwan fu den wet noso komando disi. Yesus ben sori san na a moro prenspari wet, di a ben taki: „’Yu musu lobi Yehovah yu Gado nanga yu heri ati, nanga yu heri sili, èn nanga yu heri frustan.’ Disi na a fosi èn a moro bigi komando. A di fu tu komando de leki a wan disi, èn dati  na: ’Yu musu lobi tra sma leki fa yu lobi yusrefi.’”—Mateyus 22:37-39.

Tra wet de tu di den borgu fu Gado Kownukondre musu hori densrefi na den, èn te den wani gi yesi na den wet dati, dan den no musu du spesrutu sani. Fu eksempre, Bijbel e taki krin: „No kori unsrefi. Den sma di e gi densrefi abra na takru lostu, sma di e dini kruktu gado, sma di e huru, den man di e seri den skin gi tra man, den man di e go nanga tra man na bedi, fufuruman, sma di gridi fu moni, drunguman, sma di e taki takru fu trawan, nanga bedrigiman no o kon ondro a tiri fu Gado.”—1 Korentesma 6:9, 10, Nyun Testamenti.

Suma na den borgu fu Gado Kownukondre? Yesus ben agersi den borgu fu Gado Kownukondre nanga skapu. A ben taki: „Den o arki mi sten èn den o tron wán ipi di abi wán skapuman” (Yohanes 10:16). Te wan sma wani de wan borgu fu Gado Kownukondre, dan a no musu taki wawan dati a e waka baka a Tumusi Bun Skapuman, Yesus, ma a musu du tu san Yesus e taki. Yesus ben taki: „A no ala sma di e taigi mi: ’Masra, Masra’, sa go na ini a kownukondre fu hemel, ma na a sma di e du a wani fu mi Tata na hemel, sa go na ini.”—Mateyus 7:21.

Fu dati ede, den sma di de borgu fu Gado Kownukondre e gebroiki a nen fu Gado, èn a nen dati na Yehovah. Boiti dati, den e gi a nen dati grani soleki fa Yesus ben du (Yohanes 17:26). Den e gi yesi na a komando fu Yesus di e taki dati den musu leri trawan „a bun nyunsu disi fu a kownukondre” (Mateyus 24:14; 28:19, 20). Den borgu e sori trutru lobi tu gi makandra.—Yohanes 13:35.

Gado o „tyari wan pori kon na tapu den wan di e pori grontapu”

Den sani di e pasa now na grontapu e sori taki heri esi Gado Kownukondre sa tyari bigi kenki kon na grontapu. Fa wi sabi dati? Tu dusun yari pasa, Yesus ben taki fu difrenti sani di ben o sori taki „a kownukondre fu Gado de krosibei” (Lukas 21:31). Soleki fa wi ben si na ini na artikel na fesi, dan a de krin fu si now taki den difrenti sani dati e pasa na heri grontapu.

San o pasa baka te den sani dati pasa? Yesus taki: „Wan bigi banawtu o de, di sensi a bigin fu grontapu teleki now no ben de ete, nôno, a no sa kon noiti moro tu” (Mateyus 24:21). A sani disi a no wan rampu di libisma o tyari kon. Ma na presi fu dati, na Gado o tyari a bigi banawtu kon, fu di a o „tyari wan pori kon na tapu den wan di e pori grontapu” (Openbaring 11:18). Fu di ogrisma e denki densrefi nomo, meki den e pori grontapu, èn fu dati ede Gado ’sa figi den puru fu grontapu’. Ma den reti-atisma, di e dini Gado na a fasi fa a wani „sa tan abra na grontapu”.—Odo 2:21, 22.

Yehovah Gado abi a reti fu tyari den bigi kenki disi kon. Fu san ede? Luku na eksempre disi: Kon meki wi taki dati yu abi wan tu oso èn yu e yuru den gi sma. Sonwan fu den sma disi e tyari densrefi bun, den e hori den birtisma na prakseri, den e pai a yuru biten èn den e sorgu den oso bun. Ma tra sma de di no e tyari densrefi bun, den e denki densrefi nomo, den no wani pai a yuru èn den e pori den oso. Aladi yu warskow den sma dati furu leisi kaba, toku den no e tyari densrefi bun. San yu ben o du? A no de fu taki dati, leki a sma di abi den oso, yu ben o poti den sma di no e tyari densrefi bun, na doro.

Na a srefi fasi, Yehovah Gado, di de a Mekiman fu grontapu èn fu ala sani na tapu, abi a reti fu bosroiti suma o tan na grontapu (Openbaring 4:11). Yehovah taki dati a o puru den ogrisma fu grontapu, di no e du en wani èn di no abi lespeki gi a reti fu trawan.—Psalm 37:9-11.

Grontapu o tron wan paradijs baka

Heri esi, Gado Kownukondre, di Yesus Krestes e tiri, sa tiri grontapu. Disi o de wan nyun bigin, èn Yesus ben taki dati ’ala sani o kon nyun baka’ na a ten dati (Mateyus 19:28, Nyun  Testamenti). Fa grontapu o de na a ten dati? Luku den pramisi disi di skrifi na ini Bijbel:

Psalm 46:9. „A e meki feti kon na wan kaba te na a moro farawe presi fu grontapu.”

Yesaya 35:1. „A gran sabana nanga a presi sondro watra sa breiti pasa marki, èn a drei sabana sa de nanga prisiri èn a sa gi bromki leki a safraan.”

Yesaya 65:21-23. „Den sma di mi kari sa nyan bun dorodoro fu a wroko fu den eigi anu. Den no sa wroko tranga fu soso, èn den no sa meki pikin di e gi problema.”

Yohanes 5:28, 29. „A yuru o kon te ala den sma di de na ini den grebi o yere [Yesus] en sten, èn den o komopo drape.”

Openbaring 21:4. „[Gado] o figi ala watra puru na den ai, èn dede no sa de moro; nowan sari, noso krei, noso pen no sa de moro.”

Fu san ede wi kan bribi den sani disi?

Yu e bribi den sani di Bijbel pramisi? Bijbel ben taki na fesi dati furu sma no ben o bribi den sani dati. Bijbel e taki: „Na ini den lasti dei spotuman o kon . . . di o handri akruderi den eigi lostu, èn den o taki: ’Pe a denoya fu en de di Gado ben pramisi? We, sensi a dei di wi afo dede, ala sani tan soifri soleki fa den ben de sensi di Gado bigin meki sani’” (2 Petrus 3:3, 4). Ma den spotuman disi e meki wan bigi fowtu. Luku fo reide fu san ede yu kan poti bribi na ini den sani di Bijbel e taki:

(1) Na ini a ten di pasa, Gado ben pori ogrisma na grontapu kaba. A Frudu na ini a ten fu Noa na wan moi eksempre fu dati.—2 Petrus 3:5-7.

(2) Gado Wortu, ben taki soifri na fesi fu den sani di e pasa now na grontapu.

(3) Ala sani no e „tan soifri soleki fa den ben de sensi di Gado bigin meki sani”. Noiti ete grontapu ben lai nanga so furu problema na ini a libimakandra. Boiti dati, sma no e tyari densrefi bun, a gron nanga a watra na grontapu pori, èn ala den sani disi e kon moro ogri.

(4) A ’bun nyunsu fu a kownukondre’ e preiki now na heri grontapu èn disi e sori taki „a kaba o kon” heri esi.—Mateyus 24:14.

Yehovah Kotoigi e gi yu a kari fu studeri Gado Wortu, Bijbel, nanga den so taki yu kan kon sabi moro fu a howpu di e taki dati libisma man libi fu têgo na ondro a tiri fu Gado Kownukondre (Yohanes 17:3). Iya, wan tumusi moi ten o kon gi libisma. A moro bun ten di sma sabi, o kon heri esi! Yu o de drape tu?

[Prenspari pisi na tapu bladzijde 7]

Den sma di e taki dati sani sa tan waka na a srefi fasi leki bifo, e meki wan bigi fowtu

[Prenki na tapu bladzijde 8]

Yu o de dyaso tu?