Wan brifi fu Nikaragwa

„Koti go na a reti-anusei, te yu doro na Coco-liba”

„YU ABI wan wagi fanowdu di man rèi na tapu bun takru pasi, yu abi wan masyin fanowdu di o man hari yu puru te yu fasi, èn yu abi wan tu tank nanga gasoline fanowdu gi a wagi. Yu kan fruwakti taki a tokotoko o de te na den doro fu a wagi. Koti go na a reti-anusei, te yu doro na Cocoliba.”

A sani disi di a zendeling taigi mi, no ben yepi, fu di mi ben denki kaba taki mi no ben o man go drape. Toku, wan tudewroko mamanten, mi bigin rèi go na wan bigi Kresten konmakandra na ini Wamblán, wan pikin foto na a noordsei fu Nikaragwa.

Mi komoto na oso fruku mamanten, na ini na owru wagi fu mi di e rèi bun ete. Mi bigin rèi na tapu a bigi moi pasi di nen Pan-American Highway. Di mi doro na a foto Jinotega, dan mi teki a santi pasi di den sma fu a kontren e kari feo, èn dati wani taki takru. Fosi mi komoto na ini a foto, mi si wan wenkri di nen Wondru fu Gado, nanga wan trawan di nen Na Opobaka.

A pasi lai boktu, èn mi ben abi fu kren èn saka bergi nanga a wagi. Mi ben musu rèi safrisafri na tapu a pasi di de na a lanki fu a bergi. Mi pasa sei wan langa kriki tu di de na tapu wan hei bergi di tapu nanga wolku. Aladi dow ben de, toku mi ben man si bon di lai nanga moi bromki.

Na wan srapu boktu, pikinmoro mi naki wan bus di ben e rèi na mindri fu a pasi. Blaka smoko ben komoto fu a bus, èn di a pasa mi, pikin ston frei kon na tapu a wagi. Dyaso na ini Nikaragwa, yu kan si na a nen di skrifi na fesisei fu a bus, fa a man de di e rèi a bus. Wan tu fu den nen di yu kan si na: Winiman, Kruktutere, Aboma, noso Ontiman.

Na a bakadina mi rèi pasa a lagipresi fu Pantasma. Mi pasa wan udu oso di ben de na tapu wan prasi di ben sibi. Drape mi si wan owru man di ben e sidon na tapu wan bangi, mi si wan dagu di ben e sribi na ondro wan bon èn tu kaw ben tai na wan wagi di ben abi udu wiel. Na ini wan pikin foto, mi si wan bigi grupu pikin di ben e komoto fu wan skoro. Den pikin ben weri blaw krosi èn fu di den ben de so furu, meki den ben gersi wan bigi skwala di e naki kon na sekanti.

A son ben faya di mi doro a presi Wiwilí, èn drape mi si a Coco-liba fu a fosi leisi. A bigi liba disi na wan prenspari pisi fu a foto, fu di a abi watra ala ten. Mi ben memre san a zendeling ben taigi mi, èn fu dati ede mi koti go na a pasi na a reti-anusei. A pasi disi di e go na Wamblán, langa 37 kilometer èn sma e frede fu rèi na tapu a pasi disi.

A pasi disi na wan takru santi pasi èn mi ben rèi na ini aiti noso neigi pikin kriki. Mi pruberi fu no rèi na ini den pikin gotro na ini a drei tokotoko èn fu di mi ben rèi so, meki a santi wai opo. Iya, soleki fa den sma drape e taki, dan „mi nyan santi”. Te fu kaba, mi doro na a kaba fu a pasi èn na  wan lagipresi di dungru fu di furu bon lai drape, mi si Wamblán, a presi pe mi ben musu de.

A tra dei, a ben gersi leki ala sma ben opo 4.30 mamanten. Mi ben wiki moro fruku leki dati, fu di den kakafowru ben meki furu babari. Baka di mi wiki, mi go waka na a bigi pasi. Mi ben smeri wan sortu brede di sma ben e baka na ini ston onfu.

Na wan tu presi mi ben si moi prenki fu paradijs, di sma fu drape ben teken na skotu. Na den tapu-uku wenkri di sma e kari pulperías, yu kan si reklame gi difrenti sortu cola. Furu papira na skotu noso tra presi, ben e sori sortu sani den lasti dri tirimakti ben pramisi. Yu kan si den kumakoisi tu di meki fu senki èn a gron pe den de na tapu, smenti.

Te mi ben si den sma, dan mi ben e taki Adiós. Na so mi ben e gi den odi, soleki fa den sma fu Nikaragwa e du. Den sma ben e lafu nanga mi èn den ben e taki nanga mi na wan switi fasi. Wi ben musu taki tranga fu di den asi nanga buriki di ben e waka pasa, ben e meki babari nanga den futu.

Na freida mofoneti, difrenti osofamiri doro drape gi a bigi konmakandra di ben o hori tu dei. Den ben kon nanga futu, nanga asi èn nanga wagi. Wan tu pikin boi nanga meisje waka nanga plastik slipper siksi yuru langa. Aladi bom de na a presi pe den abra a liba, èn aladi den waka na ini watra pe woron de di ben kan soigi den brudu, toku den ben abi a deki-ati fu waka pasa den sani dati. Son sma di ben komoto fu farawe presi, ben tyari pikinso aleisi di ben baka nanga agu fatu. Fu san ede ala den sma disi ben kon?

Den ben kon fu tranga a howpu fu den, taki sani o waka moro bun na ini a ten di e kon. Den ben kon fu leri moro fu Bijbel. Den ben kon fu du san Gado wani.

Dan tapu satra, moro leki 300 sma ben sidon na tapu udu bangi nanga plastik sturu na ondro wan senki daki. Yu ben kan si mama di ben e gi den beibi nyanyan. Yu ben kan yere a babari fu den agu nanga den kakafowru na a prasi na sei.

A presi ben kon faya srefisrefi èn pikinmoro mi no ben man teki en moro. Ma toku, den sma ben e arki bun di den ben kisi difrenti rai. Te a takiman ben e leisi wan tekst, dan den ben e leisi a tekst dati na ini den eigi Bijbel. Den ben e singi den singi di abi fu du nanga sani di skrifi na ini Bijbel, èn na wan lespeki fasi den ben arki te den brada ben begi gi den.

Baka a programa, mi nanga wan tu tra sma prei wan sani nanga den pikin. Baka dati, wi ben luku den sani di den yonguwan ben skrifi fu a programa. Mi sori den na tapu mi computer difrenti fowtow fu stari. Den pikin ben e lafu èn den papa nanga mama ben breiti.

Syatu baka dati, a konmakandra ben kaba èn ala sma ben musu go baka na oso. A tra mamanten fu en mi gowe. Mi ben prakseri den furu moi sani di mi ondrofeni drape èn mi ati furu nanga lobi gi den nyun mati fu mi. Mi o du ala san mi man fu teki na eksempre fu den, fu de tevrede, èn fu wakti tapu Gado.

[Prenki na tapu bladzijde 17]

Difrenti osofamiri komoto fu farawe presi fu de na a bigi konmakandra na ini Wamblán