Mi kon frustan taki a libi warti trutru

A BEN DE A MAMANTEN FU 16 APRIL 2007. Mi ben de na Norris Hall, wan gebow di de na tapu a dyari fu na universiteit di nen Virginia Polytechnic Institute fu Amerkankondre, èn di sma e kari Virginia Tech. Drape mi ben kibri na ini wan uku fu wan kantoro na a di fu dri sodro. A sani di pasa na a momenti dati, meki mi prakseri taki ibri dei wi musu de nanga bigi tangi taki wi de na libi.

A mamanten dati mi ben de na ini mi kantoro pe mi ben sreka wan tu sani, èn baka dati mi ben o go teki wan tu brifi na a di fu tu sodro. Wan professor ben kon na mi fu aksi mi efu mi kan kon na en kantoro fu yepi en nanga wan problema di a ben abi nanga en computer. Na a momenti di wi ben e waka go na ini en kantoro, wi yere fa gon e sutu na a di fu tu sodro. Wi no ben sabi san ben e pasa, ma wi lon go na ini en kantoro, wi sroto a doro, èn wi ben wakti drape aladi wi ben frede san ben kan pasa nanga wi. Di mi ben kibri na ini na uku, mi begi Yehovah Gado fayafaya èn mi aksi en fu yepi mi na ini a situwâsi disi awansi san o pasa.

Na a momenti di wi ben wakti drape, mi ben prakseri wan sani di ben pasa 15 yari na fesi. Na a ten dati, mi ben wroko na wan presi pe mi ben meki wagi di broko. Wan dei, wan baki nanga gasoline di ben de na ini na anu fu wan man di ben wroko drape tu, ben teki faya. Fu di a man disi ben skreki srefisrefi, meki a trowe a baki na ini mi fesi èn mi bron. Leki bakapisi fu na ongoloku disi, mi bron seryusu na tapusei fu mi skin. Sma ben tyari mi go nanga helikopter na wan spesrutu ati-oso pe den e yepi sma di kisi seryusu mankeri na den skin fu di wan sani bron den. Drape den poti mi dri nanga afu mun langa na intensive care pe den ben du ala san den man fu hori mi na libi. Feifi mun langa datra yepi mi so taki mi ben kan kon betre. Baka dati, mi ben man go baka na oso èn mi ben de nanga tangi trutru taki mi de na libi ete. A sani dati di mi ondrofeni, leri mi taki mi musu de nanga bigi tangi ibri dei taki mi de na libi. Leki wan fu den Kotoigi fu Yehovah, a sani disi di pasa meki taki mi kisi moro deki-ati tu fu du ala san mi man fu dini Yehovah Gado, a Sma di gi mi libi.—Psalm 90:12; Yesaya 43:10.

Mi no ben man meki wagi moro fu di mi ben kisi mankeri, èn fu dati ede mi ben leri fu wroko nanga computer. Baka dati mi feni wroko na a universiteit Virginia Tech. Na fu dati ede mi ben de na Norris Hall, na a mamanten fu 16 april.

Di wi ben de drape na ini a kantoro, wi ben yere fa gon e sutu na a di fu tu sodro. Wi no ben sabi taki te fu kaba a sutu di ben pasa drape, ben o kon de a moro ogri sutu pe sma dede, na ini Amerkankondre. A man nanga a gon, kiri 32 sma di no du noti, èn a sutu ben kon na wan kaba, di a man kiri ensrefi. Sowan 20 miniti baka di a sutu bigin, wi yere skowtu na ini a gebow pe wi ben de. Wi bari kari den èn den yepi wi fu komoto na ini a gebow.

A tumusi ogri-ati sani disi di mi ondrofeni, leri mi taki a libi syatu èn taki iniwan momenti wan sani kan pasa di kan meki wi lasi libi (Yakobus 4:14). A de tumusi prenspari fu poti wi frutrow tapu Yehovah Gado, a Sma di gi wi libi, èn a prenspari tu fu si ibri dei leki wan warti presenti fu en!—Psalm 23:4; 91:2.

[Sma di abi a reti fu a prenki na tapu bladzijde 30]

AP Photo/The Roanoke Times, Alan Kim