Yu sabi yu Papa na hemel?

YU SABI yu papa bun? Efu yu gro kon bigi na ini wan osofamiri pe sma lobi makandra, dan kande yu o aksi yusrefi fa wan sma kan taki so wan sani. Kande yu o taki: ’Iya, mi sabi en bun!’ A tru taki furu sma sabi san den papa lobi èn san a no lobi. Boiti dati, den sabi fa den papa e handri na ini spesrutu situwâsi, èn fa a e sorgu gi na osofamiri.

Ma kande a pasa wan tu leisi taki yu ben fruwondru fu si taki yu papa handri heri tra fasi leki fa yu gwenti fu en. Fu eksempre, kande wan manpikin sabi en papa leki wan man di tiri èn di abi safri-ati. Ma dan wan sani e pasa di kan meki taki ogri miti den. Wantronso, a manpikin e si taki en papa e handri wantewante èn a e du ala san a man fu kibri en osofamiri.

Fa a de nanga wi Mekiman? Yu sabi en bun? Bijbel e taki fu en: „Na en meki taki wi de na libi, taki wi e buweigi, èn taki wi de” (Tori fu den Apostel 17:28). Na Gado gi wi libi, èn dati meki en na a Papa fu ala libisma (Yesaya 64:8). Kande yu e si Gado leki yu papa èn dati na wan bun sani, fu di na so wi alamala musu si en. Ma moro de di wi musu kon sabi èn leri fu en. Te wi sabi den sani dati, dan dati de gi a bun fu wi èn dati o meki wi de nanga prisiri.

Te yu sabi yu papa bun, dan dati o meki taki yu lobi en èn lespeki en. Na so a de tu nanga Gado. O moro yu o kon sabi Gado, o moro bun a matifasi fu yu nanga en o de. Te yu sabi Gado bun èn te yu e du a wani fu en, dan a kan yepi yu fu horidoro te yu e kisi problema.

Fa Gado de? Sortu krakti a o abi na yu tapu te yu sabi den fasi fu en? Yu o abi fu du spesrutu sani te yu sabi en kaba? Na ini a tra artikel yu o kisi piki tapu den aksi disi.

[Prenspari pisi na tapu bladzijde 3]

Te yu sabi wan sma bun, dan dati o abi krakti tapu a fasi fa yu e denki fu en