Fa a bribi fu mi yepi mi na ini muilek ten

Soleki fa Soledad Castillo fruteri

Wan tu leisi na ini mi libi, mi sari srefisrefi. Mi ben kan lasi howpu na ini den situwâsi dati, ma dati no pasa. Di mi ben abi 34 yari, mi lobi masra dede. Siksi yari baka dati, mi papa dede. Aiti mun baka di mi papa dede, mi yere taki a wan-enkri manpikin fu mi abi wan siki di datra no man dresi.

MI NA Soledad, èn a nen disi wani taki dati wan sma e firi leki a de en wawan. Ma aladi a gersi wan sani di no kan, toku noiti mi ben firi taki mi de mi wawan. Te mi ben de na ini muilek situwâsi, dan mi ben bribi taki Yehovah Gado ben de nanga mi. Mi ben firi leki a ’grabu mi hori na mi anu èn a yepi mi so taki mi no frede’ (Yesaya 41:13). Meki mi fruteri fa mi ben man horidoro na ini muilek situwâsi èn fa dati yepi mi fu kon krosibei na Yehovah.

Mi ben abi wan koloku libi sondro furu problema

Mi gebore na ini Barcelona, na Spanyorokondre, tapu 3 mei 1961, èn mi ben de a wan-enkri pikin fu mi papa José nanga mi mama Soledad. Di mi ben abi neigi yari, mi mama kon leri sabi den tru tori fu Gado Wortu. A ben suku fu kisi piki tapu aksi di a ben abi fu Bijbel, ma a kerki pe a ben e go no ben man piki den aksi dati. Wan dei, tu Kotoigi fu Yehovah ben kon na wi oso èn nanga yepi fu Bijbel den gi piki tapu ala den aksi di a ben abi. Wantewante mi mama agri fu studeri Bijbel nanga den.

A no langa baka dati, mi mama tron wan dopu Kotoigi fu Yehovah èn baka wan tu yari mi papa teki dopu tu. Eliana, a sisa di ben e studeri nanga mi mama, kon si taki mi ben lobi Gado Wortu. Aladi mi ben de wan yongu meisje ete, Eliana taki dati a ben o bun efu a studeri nanga mi. Fu di Eliana yepi mi èn fu di mi mama gi mi deki-ati, meki mi teki dopu di mi ben abi 13 yari.

Na ini mi tini yari, nofo tron mi ben begi Yehovah, spesrutu te mi ben musu teki bosroiti. Fu taki en leti, mi no ben abi furu problema di mi ben e gro kon bigi. Mi ben abi furu mati na ini a gemeente èn mi ben abi wan bun matifasi nanga mi papa èn nanga mi mama. Na ini 1982, mi trow nanga wan Kotoigi di nen Felipe. Neleki mi, Felipe ben wani du moro na ini a diniwroko fu Yehovah.

Wi e kweki a pikin fu wi fu kon lobi Yehovah

Feifi yari baka dati, mi meki wan moi boi, di wi kari Saúl. Mi nanga Felipe ben breiti srefisrefi fu abi wan pikin. Wi ben howpu taki Saúl ben o gro kon tron wan pikin di gosontu èn di lobi Gado. Mi nanga Felipe ben lobi fu de nanga  Saúl èn wi ben taki nanga en fu Yehovah. Boiti dati, wi ben e nyan nanga makandra, wi ben e tyari en go koiri, èn wi ben e prei nanga en. Saúl ben lobi fu go nanga Felipe fu fruteri tra sma den tru tori fu Bijbel. Yonguyongu, Felipe leri Saúl fu teki prati na a preikiwroko fu di a leri en fu naki na tapu doro èn fu gi sma traktaat.

Saúl ben lobi wi èn a ben lobi a leri di wi ben gi en. Di a ben abi siksi yari, a ben go doronomo nanga wi na ini a preikiwroko. A ben lobi fu arki Bijbel tori èn a ben lobi na osofamiri studie. Syatu baka dati a bigin go na skoro. Nanga yepi fu den sani di a ben sabi kaba fu Bijbel, a bigin teki pikinpikin bosroiti.

Ma di Saúl ben abi seibi yari, wan bigi kenki kon na ini wi osofamiri libi. Felipe kisi wan siki na en fokofoko. Sowan 11 mun langa a ben e feti nanga a siki. Disi ben meki taki a no ben man wroko èn nofo tron a no ben man komoto na bedi srefi. Mi masra dede di a abi 36 yari.

Te now ete mi e krei te mi prakseri a muilek yari dati. Mi ben si fa mi masra safrisafri no ben man feti moro nanga a siki èn mi no ben man du noti. Na ini a muilek pisi ten dati, mi ben tan pruberi fu gi Felipe deki-ati, aladi mi ben sabi taki wi no ben o man abi na osofamiri libi di mi ben howpu fu abi. Mi leisi furu artikel gi en di teki puru fu Bijbel, èn den artikel disi ben gi wi deki-ati te wi no ben man go na den Kresten konmakandra. Di Felipe dede, mi ben firi sari srefisrefi èn a ben de leki mi ben misi wan sani na ini mi libi.

Ma Yehovah yepi mi. Mi tan aksi en fu gi mi en santa yeye. Mi taigi Gado tangi gi den koloku yari di mi ben abi nanga Felipe èn gi a howpu taki mi o si Felipe baka te a o kisi wan opobaka. Mi aksi Gado fu yepi mi fu de koloku nanga den sani di mi nanga Felipe ben ondrofeni makandra, èn fu gi mi a koni fu kweki wi pikin leki wan tru Kresten. Aladi mi ben sari srefisrefi, toku mi ben kisi trowstu.

Mi kisi furu yepi fu mi papa, mi mama nanga den sma na ini a gemeente. Ma toku mi ben abi fu studeri Bijbel nanga Saúl èn leri en fa fu dini Yehovah. Wan sma di mi ben wroko gi fosi, ben wani gi mi wan bun kantorowroko, ma na presi fu dati mi teki wan wroko fu krin presi. Na so fasi mi ben kan abi moro ten gi Saúl èn mi ben o man de nanga en te a komoto fu skoro.

Wan bijbeltekst ben sori mi krin taki a prenspari fu leri Saúl a wani fu Gado. A tekst e taki: „Leri wan boi fu waka na tapu a yoisti pasi, srefi te a kon bigi a no sa komoto na tapu a pasi” (Odo 22:6). A tekst disi gi mi a howpu taki efu mi ben o du ala san mi man fu leri Saúl a fasi fa Yehovah e denki fu sani, dan A o blesi a muiti di mi meki. A tru taki mi no ben e meki furu moni, ma mi ben abi ten gi mi boi èn a sani disi ben de moro prenspari leki iniwan gudu di mi ben kan kisi.

Di Saúl ben abi 14 yari, mi papa dede. Saúl ben firi brokosaka srefisrefi fu di a dede fu en granpapa meki taki a prakseri baka fa a ben e sari di en eigi papa dede. Mi papa ben gi en wan bun eksempre na ini a fasi fa a ben lobi  Yehovah. Baka di mi papa dede, Saúl ben feni taki, leki a wan-enkri man na ini na osofamiri, a ben musu teki a frantwortu na en tapu fu sorgu gi mi nanga mi mama.

A kisi wan takru brudu-siki

Aiti mun baka di mi papa dede, a datra fu wi taigi mi fu tyari Saúl go na ati-oso, fu di a ben e weri srefisrefi. Baka di datra ondrosuku Saúl, den taigi mi taki a abi leukemie, noso kanker na ini en brudu. *

Na ini den tu nanga afu yari baka dati, Saúl ben go furu leisi na ati-oso èn a ben pruberi fu libi nanga a kanker di a abi. A no ben makriki gi en fu teki chemotherapie, noso a datrayepi di ben musu yepi en fu feti teige a kanker. Baka den fosi siksi mun di a teki a datrayepi dati, a kanker ben gowe. Ma baka 18 mun a kanker kon baka èn Saúl kisi chemotherapie baka di ben meki taki a kon swaki srefisrefi. A kanker ben gowe fu wan syatu pisi ten nomo, èn Saúl no ben man teki a chemotherapie fu a di fu dri leisi moro. Saúl ben gi en libi abra na Gado èn a ben taki dati a ben wani teki dopu leki wan Kotoigi fu Yehovah, ma a dede syatu baka di a tron 17 yari.

Nofo tron datra e taigi sma di abi kanker fu teki brudu, fu di a chemotherapie e meki a skin kon swaki. A no de fu taki dati wan sma no e kon betre fu a siki disi, te a e teki brudu. Di datra kon si fu a fosi leisi taki Saúl abi kanker, dan mi nanga Saúl ben musu sori den krin taki wi no o teki brudu fu di wi wani gi yesi na a wet fu Gado di e taki dati sma musu „tan fara . . . fu brudu” (Tori fu den Apostel 15:19, 20). Na difrenti okasi te mi no ben de nanga Saúl, a ben musu overtoigi den datra taki na ensrefi teki a bosroiti ini a tori disi. (Luku a faki na tapu bladzijde 31.)

Te fu kaba den datra ben kon frustan taki aladi Saúl ben yongu, toku a ben man teki en eigi bosroiti fu di a ben frustan heri bun san a siki disi ben o du nanga en. Den ben lespeki a bosroiti fu wi èn den ben wani yepi Saúl sondro fu gi en brudu. Ma furu tron den ben pruberi fu meki wi kenki prakseri. Mi ben breiti srefisrefi di mi yere fa Saúl ben fruteri den datra fu san ede a no e teki brudu. A de krin fu si taki a ben kon abi wan bun matifasi nanga Yehovah.

Na ini a yari di wi kon yere taki Saúl abi kanker, wi kisi a buku di nen Kon krosibei na Yehovah na a distrikt kongres fu wi na ini Barcelona. A tumusi moi buku dati ben yepi wi fu tanapu kánkan na ini muilek ten di wi no ben sabi fa sani ben o waka. Te wi ben de na ati-oso furu yuru langa, wi ben leisi difrenti pisi fu a buku nanga makandra. Na ini den muilek momenti di wi ben ondrofeni bakaten, wi ben taki baka fu den sani dati di wi ben leisi. Na den momenti dati, a tekst fu Yesaya 41:13 di skrifi na a bigin fu a buku dati, ben gi wi trutru deki-ati. A tekst e taki: „Mi, Yehovah yu Gado, e grabu yu hori na yu reti-anu. Mi na a wan di e taigi yu: ’No frede. Misrefi o yepi yu.’”

A bribi fu Saúl ben abi krakti tapu trawan

Saúl ben sabi heri bun sortu bosroiti a ben e teki èn a ben abi wan bun denki fu sani. A fasi fa Saúl ben de, ben naki na ati fu den datra nanga den sma di ben wroko na a ati-oso Vall d’Hebrón. Den sma di ben e sorgu gi en, ben lobi en. Sensi a ten dati, a datra di e yepi sma di abi kanker, yepi tra Kotoigi pikin di abi a siki disi tu èn a handri na wan lespeki fasi nanga den. A datra disi sabi ete fa Saúl ben tan hori na a bosroiti di a teki, fa a ben abi deki-ati aladi a ben de fu dede, èn fa a ben abi wan bun denki fu a libi. Den sma di wroko na a ati-oso ben taigi Saúl taki noiti ete den ben abi so wan sma na a afdeling dati. Den ben taki dati Saúl noiti no  ben krutukrutu èn taki a ben lobi fu lafu ala ten, srefi di a ben de fu dede.

Wan datra di e ondrosuku fu san ede sma e handri na wan spesrutu fasi, taigi mi taki furu pikin di abi wan siki di no man dresi, nofo tron e weigri fu wroko makandra nanga den datra èn den no e gi yesi na den papa nanga mama. Den e du dati, fu di den no e firi bun èn fu di den no sabi san den musu du. A datra dati ben si taki Saúl no ben de so. A ben fruwondru srefisrefi fu si taki Saúl ben abi wan korostu firi èn taki a ben abi wan bun denki fu sani. Disi meki taki mi nanga Saúl kisi na okasi fu fruteri en fu a bribi fu wi.

Mi e memre tu fa Saúl ben yepi wan Kotoigi na ini wi gemeente. A Kotoigi disi ben siki siksi yari langa fu di a ben brokosaka srefisrefi, èn den dresi di a ben e dringi no ben yepi en. Wan tu leisi a ben tan nanga Saúl wan heri neti na ati-oso fu sorgu gi en. A taigi mi taki a fasi fa Saúl ben handri aladi a abi kanker, ben abi furu krakti na en tapu. A ben si taki aladi Saúl ben weri srefisrefi, toku a ben pruberi fu gi ala den sma di ben kon luku en, deki-ati. A Kotoigi disi e taki: „Na eksempre fu Saúl gi mi deki-ati fu meki muiti fu no firi brokosaka moro.”

Now Saúl dede dri yari kaba. A no de fu taki dati mi e sari ete. Mi no tranga, ma Gado gi mi „a krakti di bigi pasa marki” (2 Korentesma 4:7). Mi leri taki srefi den moro muilek èn sari situwâsi kan abi wan bun sei. Mi leri fu horidoro di mi masra dede, di mi papa dede, èn di mi manpikin dede. Disi yepi mi fu no denki misrefi nomo èn fu frustan fa trawan e firi te den e sari. Ma san de moro prenspari, na taki mi kon abi wan moro bun matifasi nanga Yehovah. Mi no e frede san kan pasa na ini a ten di e kon, fu di mi Tata na hemel e yepi mi te now ete. Te na a dei fu tide a e grabu mi hori na mi anu.

[Futuwortu]

[Faki/​Prenki na tapu bladzijde 31]

YU AKSI YUSREFI A SANI DISI?

Kande yu yere taki Yehovah Kotoigi no e teki brudu. Yu aksi yusrefi fu san ede dati de so?

Nofo tron sma no e frustan a bosroiti disi fu den, di teki puru fu Bijbel. Son leisi sma e denki taki Yehovah Kotoigi no wani nowan datrayepi noso taki den no abi warderi gi a libi. Dati no tru kwetikweti. Yehovah Kotoigi e suku fu kisi a moro bun datrayepi gi den nanga den famiri. Ma den e suku fu kisi datrayepi pe den no abi fu teki brudu. Fu san ede?

Den e du dati, fu di Gado ben gi libisma wan prenspari wet. Baka a Frudu na ini a ten fu Noa, Gado ben gi Noa nanga en osofamiri primisi fu nyan meti. Ma wan sani de di den no ben mag du, èn dati na taki den no ben musu nyan brudu (Genesis 9:3, 4). Ala libisma, na bakapikin fu Noa, sobun a wet disi de ete gi ala libisma. Noiti Gado ben puru a wet disi. Moro leki 800 yari baka dati, Gado ben gi a pipel Israel a wet disi baka, fu di a ben taigi den taki brudu santa, èn brudu na a libi (Lefitikus 17:14). Sowan 1500 yari baka dati, den Kresten apostel gi ala Kresten a komando fu „tan fara . . . fu brudu”.—Tori fu den Apostel 15:29.

Gi Yehovah Kotoigi, a no kan kwetikweti taki den e tan fara fu brudu, efu den e teki a brudu disi na ini den skin. Fu dati ede, den wani taki datra yepi den sondro fu gebroiki brudu. Fu di den teki a bosroiti dati, meki taki nofo tron den e kisi moro bun datrayepi. A no de fu taki dati, na fu a sani disi ede furu sma di no de Yehovah Kotoigi, e suku fu kisi datrayepi tu sondro brudu.

[Prenki na tapu bladzijde 29]

Mi, mi masra Felipe, nanga wi manpikin Saúl

[Prenki na tapu bladzijde 29]

Mi papa José nanga mi mama Soledad

[Prenki na tapu bladzijde 30]

Saúl, wán mun fosi a dede