Suma man sabi san o pasa na ini a ten di e kon?

„Mi na a Sma di de Gado, . . .  a Sma di e fruteri na a bigin san sa de a kaba, èn di e fruteri langa ten na fesi kaba san na den sani di no du.” —Yesaya 46:9, 10.

NA INI a ten disi, pe sani kan kenki wantronso, sabiman e ondrosuku fa sani ben waka fositen èn fa sani e waka na ini a ten disi. Den e ondrosuku sani di abi fu du nanga a politiek, nanga a libimakandra èn nanga na ekonomia. Den e du dati, fu di den e pruberi fu taki san o pasa na ini a ten di e kon. Tra sma di wani sabi nomonomo fa sani o waka gi den na ini a ten di e kon, e go na lukuman di e luku den stari, noso den e go du afkodrei. Nofo tron den sortu sma dati e firi sari te den e yere san den lukuman, noso tra sma e taigi den. A de so taki nowan fasi no de fu kon sabi san o pasa nanga a grontapu disi, nanga wi osofamiri, èn nanga wisrefi? Te yu e luku en bun, wan sma de di man sabi trutru san o pasa na ini a ten di e kon?

Soleki fa a skrifi na tapusei, dan na Almakti Gado, Yehovah, taigi a profeiti Yesaya fu skrifi taki En abi a koni fu taki san o pasa na ini a ten di e kon. Nanga yepi fu Yesaya, Gado ben taki na fesi dati den Israelsma fu owruten ben o komoto na ini katibo na Babilon, èn taki den ben o drai go baka na Yerusalem fu bow a foto nanga a tempel baka. Sani waka soifri soleki fa a profeititori disi taki? Sowan 200 yari na fesi, Yesaya ben taki soifri dati Sirus ben o teki Babilon abra. Boiti dati, Yesaya taki tu dati Sirus ben o meki a watra fu na Eufraat-liba, di ben e kibri a foto, lon go na wan tra sei. Yehovah ben sabi na fesi srefi taki, sondro fu denki, den Babilonsma ben o libi den bigi doro fu a foto opo, èn dati ben o meki taki Sirus wini a foto makriki.—Yesaya 44:24–45:7.

Te yu e teki libisma gersi nanga Gado, dan libisma no man sabi san o pasa na ini a ten di e kon. A koni Kownu Salomo ben taki: „No meki bigi gi a dei, bika yu no sabi san wan dei o tyari gi yu” (Odo 27:1). Te na a dei fu tide den wortu dati tru. Nowan libisma man sabi srefi san o pasa nanga en. Fu san ede Gado no de leki libisma? Fu di Gado e frustan krin fa ala sani de di a meki, iya, a e frustan sosrefi fa libisma de èn fa den e denki. Te Gado bosroiti fu kon sabi san o pasa, dan a kan sabi soifri fa difrenti libisma o handri èn sosrefi fa wan heri pipel o handri. Boiti dati, nowan sma man tapu En fu meki sani waka soleki fa a wani. Te Yehovah e taki na fesi san o pasa nanga yepi fu den profeiti fu en, dan a e tron „a Sma di e meki a wortu fu en futuboi kon tru, èn a Sma di e du ala sani san den eigi boskopuman fu en gi leki rai” (Yesaya 44:26). Yehovah Gado wawan man du dati.

Yesaya ben libi moro leki 700 yari bifo Yesus, a Mesias, gebore. Ma toku, Yesaya ben taki na ini a profeititori fu en fu sani di abi fu du nanga a kon fu a Mesias. Ma spesrutu sensi a di fu 18 yarihondro, difrenti sabiman di e krutu Bijbel, ben taki dati a buku Yesaya no de wan buku fu profeititori. Den ben taki dati den profeititori fu Yesaya, a no trutru tori di ben taki na fesi san o pasa, ma na tori di ben skrifi baka di den sani pasa. Den sabiman dati ben feni taki wan skrifiman di ben libi bakaten, ben skrifi nomo san ben pasa kaba. Den sani di den taki, tru? Na ini 1947, sma feni wan kopi fu a buku fu Yesaya, makandra nanga tra owru bukulolo na ini wan bergi-olo krosibei fu a  Dede Se. Difrenti sabiman di e ondrosuku owruten sani, kon si taki a kopi disi ben skrifi moro leki wán hondro yari bifo a pramisi Mesias, noso Krestes, gebore. Iya, Bijbel tyari kon na krin san ben o pasa na ini a ten di e kon.

Yesaya nanga tra Bijbel skrifiman no ben man taki na fesi san ben o pasa nanga yepi fu den eigi koni. Na presi fu dati, den „ben taki san ben komoto fu Gado, fu di a santa yeye ben e tiri den” (2 Petrus 1:21). Na ini den tra artikel, wi o poti prakseri na wan tu fu den finifini tori di Yesaya ben taki na fesi fu a libi fu Yesus. Baka dati, wi o luku san Yesus nanga den disipel fu en ben taki fu a ten fu wi èn fu a ten di e kon.