Wi kan bribi den evangelietori?

„Fu taki en leti, den evangelietori na anansitori di den fosi Kresten meki.”—Professor Burton L. Mack, di fosi ben e ondrosuku a Nyun Testamenti.

A PROFESSOR di kari na a bigin, a no a wan-enkri sma di abi a denki disi. Furu sabiman e tweifri efu den sani di skrifi na ini den Evangelie fu Mateyus, Markus, Lukas, nanga Yohanes na tru tori. Den Bijbel buku disi e taki fu a libi èn a diniwroko fu Yesus. Fu san ede son sma feni taki den Evangelietori na anansitori? A denki fu den sma disi musu meki wi tweifri efu den Evangelietori na tru tori? Meki wi luku wan tu fu den buweisi.

Son sma no e bribi den Evangelietori

Na ini den 17 hondro yari baka di Krestes dede, sma noiti ben e tweifri efu den Evangelietori na tru tori. Ma spesrutu sensi a di fu 19 yarihondro, wan tu sabiman kon feni taki den Evangelietori a no buku di skrifi nanga yepi fu Gado en santa yeye, ma den feni taki na libisma skrifi den buku disi. Boiti dati, den no e bribi taki den Evangelie skrifiman srefi ben si den sani di den ben skrifi fu Yesus. Den sabiman disi abi a tranga overtoigi taki den disipel fu Yesus no ben abi a koni fu skrifi soifri fa sani ben waka na ini a ten di pasa. Den sabiman disi ben feni tu taki den skrifiman fu den fosi dri Evangelietori teki furu sani abra fu makandra. Den e taki disi fu di furu sani na ini den Evangelietori disi de a srefi. Sabiman weigri sosrefi fu bribi taki Yesus ben du wondru èn taki a ben kisi wan opobaka, soleki fa den Evangelietori e tyari kon na krin. Sonwan fu den sabiman ben taki srefi dati Yesus noiti no ben de na libi!

Den srefi sma disi feni taki a ben musu de so taki na Markus fosi ben skrifi na Evangelietori fu en. Den e taki disi, fu di a gersi leki a buku dati no abi nowan enkri sani na ini di no skrifi kaba na ini den buku fu Mateyus nanga Lukas. Den sabiman feni tu taki Mateyus nanga Lukas gebroiki a buku fu Markus fu skrifi na Evangelie fu den, èn taki den gebroiki sosrefi wan tra owruten bukulolo. Soleki fa a Bijbel sabiman A. F. J. Klijn e taki, dan a denki disi di furu sabiman abi, „meki taki sma bigin bribi taki den Evangelie skrifiman no ben de trutru skrifiman, ma taki den ben de sma di ben e tyari difrenti sortu tori kon na wán”. Te yu e luku en bun, dan den sma disi e taki dati den Evangelie skrifiman na sma di e teki sani abra di tra sma skrifi kaba, èn taki den e meki anansitori. A denki disi meki taki furu sma no wani bribi taki na Gado meki sma skrifi Bijbel.—2 Timoteyus 3:16.

Den Evangelie skrifiman ben e teki sani abra fu tra skrifiman?

Soleki fa wi sabi, dan den tori na ini den fosi dri Evangelie tori e kruderi nanga makandra. Ma disi wani taki dati den skrifiman fu den buku disi ben teki sani abra fu makandra? Nôno. Fu san ede dati no de so? Wan reide, na taki Yesus ben pramisi den disipel fu en taki a santa yeye ben o ’meki den memre ala den sani di a ben taigi den’ (Yohanes 14:26). Dati meki a no e fruwondru wi taki den Evangelie skrifiman ben e memre wan tu fu den srefi sani di pasa, èn taki den ben skrifi den sani dati. A tru taki son Bijbel skrifiman ben leisi den buku fu tra Bijbel skrifiman, èn den ben taki tu fu sani di ben skrifi na ini den buku dati. Ma disi no wani taki dati den ben teki sani abra fu tra skrifiman. A sani disi e sori nomo taki den ben e ondrosuku sani finifini (2 Petrus 3:15). Wan tra buku e taki tu: „Fu di sma ben gwenti fu fruteri trawan den tori di den ben kon sabi, meki a no e fruwondru wi taki den Evangelie skrifiman ben gebroiki den srefi wortu fu skrifi den prenspari sani di Yesus ben taki” (The Anchor Bible Dictionary).

 Soleki fa a buku fu Lukas ben sori, dan a skrifiman fu a buku disi ben taki nanga furu sma di ben si sani nanga den eigi ai. A ben taki tu dati a ben „ondrosuku ala sani finifini sensi a bigin” (Lukas 1:1-4). Disi wani taki dati a ben teki sani abra di tra sma ben skrifi kaba, noso taki a ben e meki anansitori? Kwetikweti! Sabiman William Ramsay ben ondrosuku na Evangelietori fu Lukas, èn a ben taki: „Lukas na wan tumusi bun historia skrifiman. Boiti taki wi kan bribi den sani di a skrifi, a ben sabi tu fa fu skrifi sani di ben pasa fosi . . . Wi musu si a skrifiman disi leki wan fu den moro bigi historia skrifiman.”

Den sani di den fositen skrifiman fu kerkileri ben skrifi, sosrefi den sani di Origenes ben skrifi, e sori tu taki na apostel Mateyus ben de a fosi sma di skrifi wan Evangelietori. Origenes ben skrifi: „A fosi sma di skrifi na Evangelietori fu en, na Mateyus. Fosi, a man disi ben e teki belasting moni gi lanti, ma bakaten a tron wan apostel fu Yesus Krestes. A ben skrifi a buku fu en gi den Dyu di ben teki a Kresten bribi, èn a ben skrifi a buku disi na ini Hebrewtongo.” A de krin taki Mateyus di ben de wan apostel, ben si sani nanga en eigi ai. Dati meki, a no ben abi fu teki sani abra fu Markus, fu di Markus no ben si den sani dati nanga en eigi ai. Sobun, a tru taki Mateyus nanga Lukas ben teki sani abra fu Markus èn fu wan owruten bukulolo?

Na Markus fosi ben skrifi na Evangelietori fu en?

Soleki fa wan buku e taki, dan buweisi no de taki Markus fosi ben skrifi na Evangelietori fu en, èn taki Mateyus nanga Lukas ben teki sani abra fu na Evangelietori dati (The Anchor Bible Dictionary). Toku furu sabiman feni taki Markus ben  skrifi na Evangelietori fu en, fosi Mateyus nanga Lukas ben skrifi a di fu den. Den sabiman e taki disi fu di den feni taki ala den sani di skrifi na ini a buku fu Markus, skrifi tu na ini den tu tra Evangelietori. Fu eksempre, Johannes Kuhn, wan Bijbel sabiman fu a di fu 19 yarihondro, ben abi na overtoigi taki na Markus fosi ben skrifi na Evangelietori fu en. Efu dati no ben de so, na so Kuhn e taki, dan „na koti Markus ben koti den tu bukulolo fu Mateyus nanga Lukas na ini pikinpikin pisi, ne a moksi den kon na wán na ini wan patu, èn a meki na Evangelietori fu en”.

Fu di na Evangelietori fu Markus na a moro syatuwan, meki a no e fruwondru wi taki a abi furu sani na ini di skrifi kaba na ini den tra Evangelietori. Toku dati no wani taki dati a ben skrifi fosi den trawan. Boiti dati, a no tru taki ala den tori di skrifi na ini a buku fu Markus de fu feni kaba na ini a buku fu Mateyus nanga Lukas. Fu taki en leti, a moi Evangelietori fu Markus e taki fu so furu difrenti sani di pasa na ini a diniwroko fu Yesus, èn a abi moro leki 180 pisi nanga finifini tori na ini di no de fu feni na ini a buku fu Mateyus nanga Lukas. Dati meki a buku fu Markus na trutru wan tumusi aparti buku di e taki fu a libi fu Yesus.—Luku a  faki na tapu bladzijde 13.

Fa a de nanga a bukulolo di sma feni taki den skrifiman gebroiki?

San wi kan taki fu na owruten bukulolo di son sma feni taki Mateyus nanga Lukas ben teki sani abra fu en? James M. Robinson, professor fu kerkitori, ben taki: „A no de fu taki dati a bukulolo disi na a moro prenspari bukulolo di e taki fu a Kresten bribi.” A sani disi di a professor taki e fruwondru wi fu di a bukulolo dati no de moro, èn fu taki en leti, nowan sma kan buweisi taki a ben de oiti! Ma san e fruwondru wi moro, na taki sabiman feni taki sma ben musu fu abi wan kopi fu a bukulolo disi, aladi a bukulolo disi no de fu feni srefisrefi moro. Boiti dati, noiti den fositen skrifiman fu kerkileri ben taki fu a bukulolo disi.

Denki a tori disi. Soleki fa sma e taki, dan a bukulolo disi ben de trutru, èn a ben sori taki Markus fosi ben skrifi na Evangelietori fu en. Buweisi no de gi nowan fu den tu sani disi, a no so? Te a abi fu du nanga den sortu denki disi, dan a bun fu hori na odo disi na prakseri: „Wan sma di no abi ondrofeni, e bribi ibri wortu, ma a koniwan e luku pe a e poti en futu.”—Odo 14:15.

Den Evangelietori komoto fu Gado, èn wi kan bribi den

Soleki fa wi si, dan sabiman e kon nanga ala sortu denki, aladi den no man buweisi taki den sani dati tru. A sani disi meki taki furu sma no wani ondrosuku den Evangelietori di wi kan bribi, èn di e taki fu a libi nanga a diniwroko fu Yesus. Den tori disi e sori krin taki den fosi Kresten no ben e si a libi, a diniwroko, a dede, nanga na opobaka fu Yesus leki anansitori. Hondrohondro sma di ben si den sani dati nanga den eigi ai, ben taki dati den sani dati pasa trutru. Den fosi Kresten disi ben de klariklari fu waka baka Yesus, awansi sma ben e frufolgu den, noso awansi sma ben e kiri den. Boiti dati, den ben sabi heri bun taki efu a diniwroko nanga na opobaka fu Yesus ben de wan anansitori, dan na fu soso den ben o de Kresten.—1 Korentesma 15:3-8, 17, 19; 2 Timoteyus 2:2.

George W. Buchanan, professor fu kerkitori, ben taki fu a denki di furu sma abi taki na Markus fosi ben skrifi na Evangelietori fu en, èn a ben taki tu fu a dangra bukulolo di no de fu feni moro. A e taki: „Te wan sma di e studeri Bijbel e tan ondrosuku nomo fu pe Bijbel komoto, dan dati sa tapu en fu ondrosuku den sani di skrifi na ini Bijbel.” A sani disi e kruderi nanga a rai di na apostel Paulus ben gi Timoteyus fu no ’arki leitori, èn fu no suku fu kon sabi nomonomo suma na den afo fu en, bika den sani disi na fu soso; den sani disi e meki nomo taki aksi e opo kon di sma musu go ondrosuku èn den no e yepi sma fu kon sabi sani di e kon fu Gado, èn di abi fu du nanga bribi’.—1 Timoteyus 1:4.

Wi kan bribi den Evangelietori. Den e taki fu tru tori di sma ben si nanga den eigi ai. Den sma di ben skrifi den tori disi ondrosuku sani finifini. Boiti dati, den tori disi e yepi wi fu kon sabi furu moi sani fu a libi fu Yesus Krestes. Dati meki, neleki Timoteyus fu owruten, wi musu gi yesi na a rai disi di Paulus e gi: „Tan du den sani di yu leri èn di yu kon bribi fu di sma overtoigi yu.” Wi abi bun reide fu bribi taki „na Gado srefi ben meki sma skrifi ala den sani di de na ini Gado Buku”, èn na so a de tu nanga den fo Evangelietori.—2 Timoteyus 3:14-17.

[Faki na tapu bladzijde 13]

 Efu a buku fu Markus no ben skrifi, dan wi no ben o sabi taki . . .

Yesus ben luku nanga atibron, èn taki a ben sari srefisrefi di a si taki den Fariseiman no ben abi firi (Markus 3:5)

Yesus ben gi Yohanes nanga Yakobus a nen Boanerges (Markus 3:17)

na uma di ben e lasi furu brudu ben gebroiki ala en gudu (Markus 5:26)

Herodias ben hori Yohanes a Dopuman na ati, taki Herodes ben frede Yohanes, èn taki a no ben wani taki wan sani pasa nanga en (Markus 6:19, 20)

Yesus ben aksi den disipel fu en fu go rostu pikinso (Markus 6:31)

den Fariseiman ben wasi den anu te na den baka-anu (Markus 7:2-4)

Yesus brasa den pikin-nengre hori (Markus 10:16)

Yesus kon firi lobi gi a yongu tiriman (Markus 10:21)

Petrus, Yakobus, Yohanes, nanga Andreas wawan ben de nanga Yesus di den aksi en wan sani (Markus 13:3)

wan yonkuman ben libi a linnen krosi fu en na baka (Markus 14:51, 52)

Boiti dati, wan fu den agersitori fu Yesus, nanga tu fu den wondru fu en skrifi soso na ini a buku fu Markus.—Markus 4:26-29; 7:32-37; 8:22-26.

Na Evangelietori fu Markus abi moro finifini tori na ini di no skrifi na ini den tra Evangelietori. Te wi e teki ten fu denki dipi o prenspari ala den tori disi de, dan wi sa kisi moro warderi gi a buku disi.