Yu ben sabi a sani disi?

Fu san ede a dei di den Dyu ben hori sabat, ben bigin na mofoneti?

Di Yehovah ben gi en pipel a wet di abi fu du nanga a dei di den Dyu ben musu aksi en pardon gi den sondu, Yehovah taki: „Na a srefi dei disi, un no musu du nowan wroko . . . A de wan sabat-dei èn un no musu du nowan wroko. . . . Un musu hori a sabat fu a wan mofoneti te go miti a tra mofoneti” (Lefitikus 23:28, 32). A komando disi e sori taki ibri dei ben e bigin na mofoneti, baka te son dongo, èn a ben kaba a tra dei te son dongo. Sobun, gi den Dyu, wan dei ben de fu mofoneti te go miti mofoneti.

A fasi disi fa den Dyu ben e teri den dei, ben de soleki fa Gado srefi ben du dati. A tori di e taki fu a fosi agersi dei di Gado meki sani, e taki: „Na so neti pasa èn mamanten pasa. Disi ben de a fosi dei.” Gado ben teri den agersi dei di ben kon baka dati, na a srefi fasi. Den dei dati ben bigin na „neti” tu.—Genesis 1:5, 8, 13, 19, 23, 31.

Den Dyu no ben de den wan-enkri sma di ben e teri wan dei na a fasi dati. Den Ateinesma, den Numidiasma, nanga den Funisiasma ben teri wan dei na a srefi fasi tu. Na a tra sei, gi den Babilonsma wan nyun dei ben bigin te son opo. Ma gi den Egeptesma nanga den Romesma, wan dei ben de fu mindrineti te go miti mindrineti, soleki fa wi gwenti fu teri wan dei na ini a ten disi. Ma te now ete, den Dyu na ini a ten disi, e bigin hori a sabat fu den baka te son dongo èn a e kaba a tra dei te son dongo.

San ben de wan ’sabat-dei waka’?

Den disipel fu Yesus ben de na tapu na Olèif-bergi, di den si fa Yesus opo go na hemel. Baka dati, den drai go baka na Yerusalem èn a pasi fu doro drape ben de ’wan sabat-dei waka’ (Tori fu den Apostel 1:12, Da Bijbel na ini Sranantongo). Wan sma ben kan waka sowan 30 kilometer noso moro leki dati na ini wan dei. Ma na Olèif-bergi de krosibei fu Yerusalem. Sobun san na ’wan sabat-dei waka’?

A sabat-dei ben de a dei te den Israelsma ben musu rostu fu na aladei wroko fu den. Tapu a dei dati, den no ben mag leti wan faya srefi na ini den oso (Exodus 20:10; 35:2, 3). Yehovah ben gi a komando disi: „Ibri sma musu tan pe a de. Nowan sma musu komoto fu en presi na a di fu seibi dei” (Exodus 16:29). A wet disi ben o gi den Israelsma na okasi fu rostu fu na aladei wroko fu den, èn fu poti moro prakseri na den sani di den ben musu du fu abi wan moro bun matifasi nanga Gado.

Den Dyu kerki fesiman no ben hori densrefi na den gronprakseri fu den wet fu Yehovah, fu di den ben suku fu poti wet gi ala sortu pikinpikin sani. Aladi a no ben kruderi nanga den wet fu Gado, toku den Dyu kerki fesiman ben poti wan wet di ben taki o fara wan sma ben mag waka fu go anbegi Gado, tapu wan sabat-dei. Wan buku e taki fu a tori disi: „Fu di den Dyu kerki fesiman ben poti ala sortu pikinpikin wet di abi fu du nanga a sabat . . . , meki den ben poti a wet tu taki nowan Israelsma mag waka moro fara leki san den ben e kari wan sabat-dei waka” (Cyclopedia of Biblical, Theological, and Ecclesiastical Literature). Wan sabat-dei waka ben de sowan 890 meter, noso pikinmoro wán kilometer.

[Prenki na tapu bladzijde 11]

Na tapu na Olèif-bergi yu kan si Yerusalem