San e pasa trutru nanga wan sma te a dede?

„Nowan sili man dede, srefi a sili fu den ogrisma no man dede . . . Den e kisi strafu na ini faya di nowan sma man kiri èn den no e dede. Na so fasi den no man tyari wan kaba kon kwetikweti na a pina di den e pina.”—Clemens fu Aleksandria, wan skrifiman fu a di fu tu nanga a di fu dri yarihondro.

NELEKI Clemens, na so den sma di e horibaka gi a leri taki hel na wan presi pe sma e nyan pina, e denki taki a sili fu libisma no man dede. Bijbel e horibaka gi a leri disi? Luku fa Gado Wortu e gi piki tapu den aksi di skrifi na ondrosei.

A fosi man Adam, ben abi wan sili di no man dede? Da Bijbel na ini Sranantongo e taki disi fu a fasi fa Gado meki Adam: „MASRA Gado ben meki mansoema komopo foe da doti foe da gron, en A ben blo da winti foe libi na ini hem noso; en mansoema ben tron wan libi sieli” (Genesis 2:7). Luku taki a tekst disi no e taki dati Adam ben kisi wan sili.

San pasa te fu kaba nanga Adam baka di a sondu? A strafu di Gado gi en, no ben de taki Adam ben o nyan pina fu têgo na ini hel. Na presi fu dati, Da Bijbel e taki san Gado ben taigi Adam: „Nanga sweti tapoe joe fesi joe sa nyan brede te leki joe sa go baka na ini da gron; bikasi Mi ben teki joe komopo fu hem; bikasi foe doti joe ben meki, en na doti joe sa tron baka” (Na wi skrifi den wortu skoinsi; Genesis 3:19). A sani disi di Gado taki, no e sori kwetikweti taki wan pisi fu Adam libi go doro, baka di a dede. Sobun a sili di nen Adam, dede.

Iniwan libisma abi wan sili di no man dede? Gado ben taigi a profeiti Esekièl: „Da sieli disi doe sondoe, a sa dede” (Esekièl 18:4, Da Bijbel). Na apostel Paulus ben skrifi: „Na wan enkri sma [Adam] nomo meki sondu kon na grontapu, dan sondu tyari dede kon. Èn fu di ala sma sondu, meki ala sma e dede tu” (Romesma 5:12, Nyun Testamenti). Efu ala sma sondu, dan wi kan frustan taki ala sili e dede.

 Wan dede sili sabi wan sani noso a e firi wan sani? Gado Wortu e taki: „Bikasi dem libisoema sabi dati dem sa dede; ma dem dede soema no sabi noti” (Preikiman 9:5, Da Bijbel). Bijbel e taki san e pasa nanga wan sma te a dede: „A de drai go baka na da gron; tapoe da dei dati, hem prakseri no de moro” (Psalm 146:4, Da Bijbel). Efu den dedewan „no sabi noti” èn efu den „prakseri no de moro”, dan fa den kan nyan pina na ini hel?

Yesus Krestes no e agersi dede nanga a sabi di wan sma sabi san e pasa, ma na presi fu dati a e agersi dede nanga sribi (Yohanes 11:11-14). * Ma son sma no e agri nanga a sani disi kande, fu di den e taki dati Yesus ben leri sma taki hel na wan presi di faya, èn taki den o trowe sma di sondu go na ini helfaya. Meki wi go luku san Yesus ben taki trutru fu hel.

[Futuwortu]