Den sani di Yesus leri wi

Sortu howpu de gi den dedewan?

Yesus ben gi dri sma wan opobaka, èn na so fasi a sori taki howpu de gi den dedewan (Lukas 7:11-17; 8:49-56; Yohanes 11:1-45). Fu man frustan a howpu di de gi den dedewan, wi musu frustan fosi fu san ede wi e dede èn pe dede komoto.

Fu san ede wi e kon siki èn e dede?

Te Yesus ben gi sma pardon fu den sondu, dan den ben kon betre. Fu eksempre, di sma ben tyari wan lan man kon na Yesus, dan a ben taki: „’San moro makriki? Fu taki: Yu kisi pardon fu yu sondu? Noso fu taki: Opo tanapu èn waka? Ma un musu kon sabi taki a Manpikin fu libisma abi makti na grontapu fu gi sma pardon fu sondu—’; ne a taigi a man di ben lan: ’Opo tanapu, teki yu bedi, èn go na yu oso’” (Mateyus 9:2-6). Sobun, sondu e meki taki wi e kon siki èn e dede. Wi kisi sondu fu a fosi man Adam, sobun na drape dede komoto.—Lukas 3:38; Romesma 5:12.

Fu san ede Yesus ben dede?

Noiti Yesus sondu. Fu dati ede, a no frudini en fu dede. Fu di Yesus dede gi wi, meki a pai gi den sondu fu wi. A ben taki dati a brudu fu en ben o „kanti trowe gi furu sma, so taki den kan kisi pardon fu sondu”.—Mateyus 26:28.

Yesus ben taki tu: „A Manpikin fu libisma no kon fu sma dini en, ma a kon fu dini sma èn fu gi en sili leki wan lusu-paiman fu frulusu furu sma” (Mateyus 20:28). Yesus pai „wan lusu-paiman” gi wi, fu di na so fasi a frulusu sma fu dede. Yesus ben taki tu: „Mi kon fu meki sma kisi libi so taki den kan abi disi pasa marki” (Yohanes 10:10). Fu man frustan bun san na a howpu fu den dedewan, wi musu sabi tu san na a situwâsi fu den.

 San e pasa te wan sma dede?

Di Lasarus, a mati fu Yesus dede, dan Yesus ben taki san e pasa te wan sma dede. A ben taigi den disipel fu en: „’Wi mati Lasarus go sribi, ma mi e go drape [na Betania] fu wiki en.’ . . . Den ben prakseri taki a ben taki dati Lasarus go sribi fu kan rostu. Dati meki Yesus taigi den krin: ’Lasarus dede.’” Sobun, Yesus ben sori taki den dedewan e sribi, noso den no sabi noti.—Yohanes 11:1-14.

Di Yesus gi en mati Lasarus wan opobaka, dan Lasarus ben dede fo dei kaba. Ma Bijbel no e taki dati Lasarus ondrofeni wan sani na a ten di a ben dede. Di Lasarus ben dede, a no ben sabi notinoti.—Preikiman 9:5, 10; Yohanes 11:17-44.

Sortu howpu de gi den dedewan?

Den dedewan o kon na libi baka, èn den o abi a howpu fu libi fu têgo. Yesus ben taki: „A yuru o kon te ala den sma di de na ini den grebi o yere [Yesus] en sten, èn den o komopo drape.”—Yohanes 5:28, 29.

A howpu disi na wan fasi fa Gado e sori lobi. Yesus ben taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”—Yohanes 3:16; Openbaring 21:4, 5.

Efu yu wani sabi moro fu a tori disi, luku kapitel 6 fu a buku San Bijbel e leri wi trutru? *

[Futuwortu]