Kon krosibei na Gado

Wan sma di lobi retidu

Hebrewsma 10:26-31

WAN leisi a pasa kaba taki wan sma no handri na wan reti fasi nanga yu, noso taki a handri na wan ogri-ati fasi nanga yu? A ben gersi leki a sma dati no kisi strafu èn a no sori berow gi san a du? A no de wan switi sani te wan sma handri na so wan ogri-ati fasi nanga yu. Ma san na a moro hati sani, na te yu ben fruwakti taki so wan sma lobi yu èn e broko en ede nanga yu. Kande yu e aksi yusrefi: ’Fu san ede Gado e meki den sani disi pasa?’ * Yehovah Gado no lobi en kwetikweti te sma no e du retidu. Gado Wortu, Bijbel, e gi wi a dyaranti taki Gado o strafu den sma di e weigri fu du san reti. Meki wi poti prakseri na den wortu fu na apostel Paulus, di skrifi na ini Hebrewsma 10:26-31.

Paulus skrifi: „Efu wi e tan du sondu fu espresi, baka di wi kon sabi a waarheid soifri kaba, dan nowan srakti-ofrandi no de moro gi sondu” (vers 26). Sma di e sondu fu espresi na den moro ogrisma. Fu san ede? Na a fosi presi, den no e du wan sondu nomo na wan momenti te den swaki, neleki den fowtu di wi alamala e meki son leisi fu di wi na sondusma. Ma den e tan du sondu neleki a de wan gwenti. Na a di fu tu presi, den sma disi e du sondu fu espresi. Ogridu kon tron wan sani di rutu dipi na ini den ati, fu di den abi a gwenti fu du sondu. Na a di fu dri presi, a no fu di den no sabi san den e du, meki den e du sondu. Den sma disi „sabi a waarheid soifri” te a abi fu du nanga a wani fu Gado èn nanga den fasi fu En.

Fa Gado e si sma di no abi berow fu den sondu di den e du fu espresi? Paulus taki: „Nowan srakti-ofrandi no de moro gi sondu.” A srakti-ofrandi fu Krestes, di Gado gi libisma leki presenti, e tapu den sondu di wi e du fu di wi na sondusma (1 Yohanes 2:1, 2). Ma den sma di e du sondu sondro fu abi berow, e sori taki den no abi nowan lespeki gi a warti presenti disi fu Gado. Gi Gado den sma disi „trapu a Manpikin fu Gado” èn den e si „a brudu” fu Yesus „leki wan pikin sani” (vers 29). Nanga a fasi fa den e libi, den e sori taki den no abi lespeki gi Yesus èn den e si a brudu fu en „leki wan bunkopu sani”, neleki a brudu fu iniwan sondu libisma (Today’s English Version). Den sortu sma disi di no de nanga tangi, no sa kisi wini fu a srakti-ofrandi fu Krestes.

San den ogrisma kan fruwakti? A Gado fu retidu pramisi: „Na mi o teki refensi; mi o pai den baka gi den ogri di den du” (vers 30). Ala sma di e tan du sondu fu di den e du trawan ogri, e kisi wan warskow. Den sma di e trangayesi Gado fu espresi sa kisi strafu. Nofo tron den e kisi fu du nanga den takru bakapisi fu den sondu fu den (Galasiasma 6:7). Awansi den no kisi strafu now, toku heri esi den sa kon na fesi Gado te a o puru ala sma na grontapu di no e du retidu (Odo 2:21, 22). Paulus e gi a warskow disi: „A de wan tumusi takru sani fu fadon na ini na anu fu a libi Gado.”—Vers 31.

Te wi sabi taki Yehovah Gado no lobi en kwetikweti te sma e du sondu fu espresi, dan dati e trowstu sma èn a e gi den howpu, spesrutu te wan sma du ogri nanga den fu espresi. Wi no abi fu tweifri taki wi kan libi en gi Gado fu teki refensi, fu di a no lobi en kwetikweti te sma no e du retidu.

[Futuwortu]