Wan spesrutu okasi fu kon luku a bijkantoro

„SAN den sma e du drape?” Furu sma e aksi densrefi a sani dati te den e rèi pasa den bigi gebow fu Yehovah Kotoigi na Mogale City (Krugersdorp), krosibei fu a foto Johannesburg, na ini Zuid-Afrika. Fu dati ede, den Kotoigi bosroiti fu gi sma a spesrutu okasi fu kon luku a bijkantoro tapu 12 nanga 13 oktober 2007. Tu reide de fu san ede den du dati. Wan fu den reide na taki sma ben fruteri ala sortu sani di no tru fu a presi drape, èn den Kotoigi ben wani sori sma san e pasa drape trutru. Boiti dati, den Kotoigi ben wani sori sma san a bijkantoro e du fu horibaka gi a wroko di Yesus Krestes gi den fu du.—Mateyus 28:19, 20.

Den sma di e wroko na a bijkantoro, ben poti bigi bord na a presi pe sma e kon na inisei èn na tapu den bord den ben gi sma wan switikon. Boiti dati, den ben prati spesrutu papira fu gi wan kari na den birtisma. Sma di ben e du bisnis nanga den èn den famiriman fu den ben kisi wan kari tu. Fa sani ben waka? Moro leki 500 sma di no de Kotoigi, ben kon luku a presi.

Wan sani di den sma ben feni moi, na a MAN Roland Lithoman rotatie-offsetpers. Dati na wan bigi masyin di e druk sowan 90.000 tijdschrift na ini wán yuru. Wan tra sani di den sma ben feni moi tu, ben de a bigi gebow pe den e seti sowan 14.000 kilo buku ibri dei fu seni gi difrenti kondre. A presi pe den e tai den bladzijde fu buku kon na wán, ben hari a prakseri fu den fisitiman tu. Kotoigi fu difrenti afdeling ben poti wan tu prenki èn ben skrifi wan tu tra sani fu sori sma fa den ben druk sani fositen nanga anu, èn fa den e gebroiki nyun wrokosani now fu druk buku nanga tijdschrift. Tra prenki ben sori fa a bijkantoro e sorgu taki a presi e tan krin. Fu eksempre, wan wrokosani de di e puru a takru smeri di e kon fu den masyin di e drei sani na ini a drukkerij, èn masyin de tu di e soigi den finifini pisi papira kon na wán so taki den kan trowe dati bakaten.

Wan koranti ben skrifi wan artikel di e taki dati den 700 sma di e tan drape „na dinari di gi densrefi abra na Yehovah fu du diniwroko gi en”. Na artikel ben taki tu dati „ala sani krin srefisrefi èn taki sani e waka na wan orga fasi” na a presi pe den e meki buku nanga tijdschrift. Wan man di ben gens Yehovah Kotoigi fosi, ben go luku a presi tu. Bakaten, a man disi skrifi wan brifi di ben taki: „Mi e fristeri unu. A no ala dei yu e si taki sani seti heri bun na so wan bigi presi.”

Furu fisitiman ben taki dati den ben warderi a spesrutu okasi di den ben kisi fu si a presi. Den ben fruwondru tu fu si taki a bijkantoro abi Bijbel publikâsi na ini 151 tongo, èn taki den e druk publikâsi gi 18 kondre na a zuidsei nanga mindrisei fu Afrika. Sma kan go luku den bijkantoro fu Yehovah Kotoigi di de na heri grontapu, na den yuru te den e wroko. Fu san ede yu no e aksi a bijkantoro na ini a kontren fu yu o ten yu kan go luku a presi?

[Prenki na tapu bladzijde 14]

Den sma di ben kon luku a bijkantoro

[Prenki na tapu bladzijde 14]

A papira fu gi sma wan kari

 [Prenki na tapu bladzijde 15]

A bijkantoro fu Zuid-Afrika na ini Mogale City

[Prenki na tapu bladzijde 15]

MAN Roland Lithoman rotatie-offsetpers

[Prenki na tapu bladzijde 15]

Pe den e tai den bladzijde fu buku

[Prenki na tapu bladzijde 15]

A presi pe den e seti buku fu seni gowe