YU E frede son leisi?— * Furu fu wi e frede son leisi. San yu kan du te yu e frede?— Yu kan suku yepi na wan sma di bigi moro yu èn di tranga moro yu. Kande yu papa noso yu mama kan yepi yu. Wi kan leri furu fu David te wi e luku pe a ben go suku yepi. A ben singi gi Gado: „Mi fu mi sei, sa frutrow na yu tapu. . . . Tapu Gado mi e frutrow, mi no sa frede.”—Psalm 56:3, 4.

Suma yu denki leri David fu no frede? Na en papa nanga mama?— A no de fu taki dati den ben leri en fu no frede. David en papa, Isai, ben tan gi yesi na Gado èn a ben de wan afo fu Yesus Krestes, a „Granman fu Vrede” di Gado pramisi (Yesaya 9:6; 11:1-3, 10). A papa fu Isai, noso a granpapa fu David, ben de Obed. Wan Bijbel buku abi a nen fu Obed en mama. Yu sabi a nen fu Obed en mama?— En nen na Rut, wan uma di ben gi yesi na Gado, èn en masra ben de Boas.—Rut 4:21, 22.

A no de fu taki dati Rut nanga Boas dede langa ten bifo David gebore. Kande yu sabi a nen fu Boas en mama, a trotro fu David. Na uma disi ben libi na ini Yerikow èn a ben kibri wan tu Israel man di ben go luku a kondre. Di den skotu fu Yerikow fadon, na uma disi nanga en famiri ben kisi kibri fu di a ben anga wan redi tetei na en fensre. San ben de a nen fu na uma disi?— Rakab. A ben kon tron wan anbegiman fu Yehovah, èn en na wan eksempre gi Kresten fu di a ben abi deki-ati.—Yosua 2:1-21; 6:22-25; Hebrewsma 11:30, 31.

Wi kan de seiker taki David en papa nanga mama ben leri en fu den futuboi disi fu Yehovah, fu di papa nanga mama ben kisi a komando fu leri den pikin den sani disi (Deuteronomium 6:4-9). Wan leisi a pasa taki Samuel, a profeiti fu Gado ben musu salfu David, a moro yongu boi fu Isai, leki a sma di ben o tron kownu fu Israel.—1 Samuel 16:4-13.

Wan dei, Isai e seni David fu tyari nyanyan gi den dri bigi brada fu en di ben e feti teige den Filistiasma, di ben de feanti fu Gado. Te David e doro drape, a e lon go na a legre èn a e yere fa a langa bigi-skin man Goliat e spotu „a legre fu  a libi Gado”. Ala sma drape e frede fu go feti nanga Goliat. Kownu Salomo e yere taki David de klariklari fu go feti nanga Goliat, èn fu dati ede a e seni kari David. Ma te Saul e si David, a e taki: „Yu na wan boi ete.”

David e fruteri Saul taki a kiri wan lew nanga wan beer di ben wani nyan den skapu fu en famiri. David e taki dati Goliat „musu kon de leki wan fu den meti disi”. Saul e taigi en: „Go, èn meki Yehovah srefi de nanga yu.” David e teki feifi grati ston, a e poti den na ini a tas fu en di skapuman gwenti tyari, a e teki en slenger, èn a e go fu feti nanga a langa bigi-skin man. Te Goliat e si taki David, di de wan boi ete, e kon, a e bari: „Kon, dan yu o si fa mi o meki den fowru . . . nyan a meti fu yu.” David e piki en: „Mi e kon na ini a nen fu Yehovah,” èn baka dati a e bari: „Mi o naki yu trowe.”

Ne David e lon go miti Goliat, a e teki wan ston fu en tas, a e poti en na ini en slenger, èn a e fringi en go teki Goliat en fesi-ede. Te den Filistiasma e si taki a langa bigi-skin man dede, dan den e frede èn den e lon gowe. Den Israelsma e lon go na den baka èn den e wini a feti. Grantangi leisi a heri tori disi na ini 1 Samuel 17:12-54 makandra nanga yu osofamiri.

Leki yonguwan, a kan de so taki son leisi yu e frede fu du san Gado taki. Yeremia ben de wan boi ete èn biginbigin a ben e frede, ma Gado ben taigi en: ’No frede, bika „mi de nanga yu”.’ Yeremia ben teki deki-ati èn a ben go preiki soleki fa Gado ben taigi en fu du. Neleki David nanga Yeremia, yu tu kan leri fu no frede, te yu e frutrow tapu Yehovah.—Yeremia 1:6-8.