Fu san ede a prenspari fu de krin?

Dusundusun yari kaba, libisma e kisi fu du nanga takru siki di e kiri furu sma. Son sma ben denki taki na Gado ben meki sma kisi den siki disi fu di a ben atibron na den tapu, èn fu di a ben wani strafu ogrisma. Hondrohondro yari langa sma ben teki ten fu ondrosuku a sani disi finifini. Te fu kaba, den kon si taki nofo tron na den pikinpikin meti di e libi na wi lontu, e meki taki wi kon siki.

Datra ben kon si taki alata, moisimoisi, kakalaka, freifrei, nanga maskita kan meki taki wi kisi siki. Den kon si tu taki nofo tron sma e meki den siki disi panya makriki, fu di den morsu. Soleki fa a sori, wan sma kan libi moro langa te a krin.

A no de fu taki dati san sma e si leki krinfasi, abi fu du nanga a fasi fa a sma gwenti èn pe a e libi. Na ini kontren pe watra no de èn pe peipi no de di e tyari a doti watra go na den gotro, a kan muilek trutru fu de krin. Aladi dati de so, toku Gado ben gi den Israelsma fu owruten wet di ben sori den fa fu de krin na ini a sabana. A no de fu taki dati drape ben de wan fu den moro muilek presi fu tan krin!

Fu san ede a de prenspari gi Gado taki wan sma de krin? San na a yoisti fasi fu si sani te a abi fu du nanga krinfasi? Sortu makriki sani yu nanga yu osofamiri kan du fu sorgu taki unu no kon siki so furu moro?

SKORO komoto, èn Max, * wan pikin boi di e libi na ini Kamerun, e doro oso. Angri e kiri en, èn watra e kiri en. A e go na ini a pikin oso pe a e tan, èn a e brasa a dagu fu en di ben wakti en. Baka dati, a e poti en skorotas na tapu a nyanyan tafra, èn a e go sidon wakti en nyanyan.

Max en mama, di de na ini a kukru, yere taki Max doro èn a e tyari wan preti faya aleisi nanga bonki gi en. Ma te Max en mama e si Max en skorotas na tapu a krin tafra, dan en fesi e kenki. A e luku en manpikin èn a e taki wán wortu nomo: „Maaaax!” En manpikin e frustan en, èn wantewante a e puru a tas. Baka dati a e lon go wasi en anu. Dan a e kon baka fu nyan a nyanyan di a ben wakti. Fu di a sabi san  a du, meki a taki nanga wan safri sten: „Sorry mâ, mi ben frigiti.”

Wan mama di e broko en ede nanga en osofamiri kan du furu fu sorgu taki den tan gosontu èn krin, ma ibri memre fu en osofamiri musu horibaka gi en. Soleki fa a tori fu Max e sori, dan a e teki langa fu leri den sani disi fu di ala sma na ini na osofamiri o abi fu tan meki muiti fu de krin. Boiti dati, papa nanga mama musu memre den pikin den sani disi furu leisi.

A mama fu Max sabi taki difrenti sani de di kan pori a nyanyan. Fu dati ede, a e wasi en anu fosi a fasi nyanyan sani èn a e tapu a nyanyan so taki freifrei no e go na tapu. Fu di a e sorgu taki nyanyan sani no e tan opo èn fu di a sorgu taki na oso e tan krin, meki a no abi so furu problema nanga alata, moisimoisi, nanga kakalaka.

Wan prenspari reide fu san ede a mama fu Max e sorgu taki ala sani de krin, na fu di a wani plisi Gado. A e taki: „Bijbel e taki dati Gado pipel musu de santa bika Gado de santa” (1 Petrus 1:16). A e taki moro fara: „Santafasi de a srefi leki krinfasi. Fu dati ede mi wani taki mi oso krin èn mi wani taki mi osofamiri krin. A no de fu taki dati mi man du disi, fu di ala sma na ini na osofamiri e yepi.”

A prenspari taki a heri osofamiri e wroko makandra

Soleki fa a mama fu Max taki, dan na osofamiri o de krin te ala sma e yepi. Son osofamiri e sidon makandra son leisi fu taki san den kan du so taki inisei nanga dorosei fu na oso e tan krin. A sani disi kan yepi na osofamiri fu abi wan moro bun matifasi èn a e memre ibriwan fu den san den musu du gi a tanbun fu na osofamiri. Fu eksempre, wan mama kan taigi den moro owru pikin fu san ede den musu wasi den anu baka te den go na toilet, baka te den fasi sani soleki moni èn fosi den e go nyan. Den moro owru pikin kan yepi tu fu di den e sorgu taki den moro yonguwan e frustan taki a sani disi prenspari.

Na osowroko kan prati so taki ala sma na ini na osofamiri abi wan sani fu du. Den kan teki a bosroiti fu krin na oso ala wiki èn fu krin a heri oso wán noso tu leisi wan yari. Èn fa a de nanga dorosei fu na oso? Stewart L. Udall, wan man di e du sani so taki sma no e pori den bon nanga tra sani na grontapu, ben taki disi fu  Amerkankondre: „Wi e libi na ini wan kondre pe ala moi fu en gowe, a kondre e kon moro takru, opo presi no de so furu moro, èn ibri dei a kondre e go na baka moro nanga moro fu di sma e doti a presi èn furu babari de.”

Na so a birti fu yu de? Na ini owruten, èn na ini son foto na Centraal Afrika a de so te now ete, taki yu abi wan sma di e naki wan bel na ini a foto fu meki sani bekènti. Nanga wan tranga sten a e memre den sma fu a foto fu krin a foto, fu krin den gotro, fu koti den bon, fu koti a grasi di e gro, èn fu trowe den doti.

Na heri grontapu lanti abi wan problema nanga doti, fu di den no sabi san den musu du nanga a doti. Na ini son foto, lanti no e puru a doti biten èn dati e meki taki ipi-ipi doti e kon de na tapu strati. Te dati e pasa, dan lanti kan aksi den borgu fu yepi puru a doti. Leki bun borgu, Kresten na wan fu den fosiwan di e go yepi èn di e gi yesi na den wet fu Caesar, sondro fu kragi (Romesma 13:3, 5-7). Tru Kresten de klariklari fu du moro leki san lanti e aksi fu den ini a tori disi. Den wani taki a kontren pe den e libi de krin, èn den e teki en na den tapu fu krin a presi pe den e libi, sondro taki lanti e memre den ibri leisi fu du dati. Den e frustan taki krinfasi e sori taki den kisi bun leri èn taki den sabi a frantwortu fu den. Fu meki sani waka bun, dan ibri sma èn ibri osofamiri musu du muiti fu de krin. Te den e sorgu taki doti watra kan hari gowe èn te den e sorgu taki lontu na oso krin, dan dati sa meki a gosontu fu den de moro bun èn a sa meki taki a birti krin.

A Gado di wi e anbegi e kisi grani te wi de krin

Te wi skin krin èn te wi e weri krosi na wan fasi di fiti, dan dati e sori taki wi e anbegi wan krin Gado, èn nofo tron disi e meki sma si taki wi de tra fasi. Wan grupu fu 15 yonguwan ben go nyan na wan presi baka wan kongres fu Yehovah Kotoigi na ini Toulouse, na Fransikondre. Wan owru trowpaar di ben sidon na a tafra na den sei, ben fruwakti taki den yonguwan ben o taki tranga èn meki babari. Ma den ben fruwondru fu si taki den yonguwan disi di ben weri krosi na wan fasi di fiti, ben tyari densrefi bun èn den ben e taki switi nanga makandra. Di a grupu yonguwan ben de fu gowe, a trowpaar ben prèise den fu a bun fasi fa den ben e tyari densrefi, èn den ben taigi wan fu den yonkuman taki furu sma na ini a ten disi no e tyari densrefi na so wan bun fasi.

Sma di e go luku den bijkantoro fu Yehovah Kotoigi, den drukkerij, nanga den presi pe den sma di e wroko drape e tan, nofo tron e fruwondru fu si o krin a presi de. Den friwani wrokoman di e libi drape musu weri krin krosi di den e wasi biten, èn den musu wasi den skin tu. Den no kan gebroiki okselstik nanga switismeri nomo, dan den no e wasi. Te den friwani wrokoman disi, di de furuten dinari, e go preiki gi den birtisma fu den na mofoneti noso tapu satra nanga sonde, dan a krinfasi fu den e meki sma denki bun tu fu a boskopu di den e preiki.

„Waka baka na eksempre fu Gado”

Kresten e kisi a deki-ati fu „waka baka na eksempre fu Gado” (Efeisesma 5:1). A profeiti Yesaya ben skrifi wan fisyun pe engel ben taki dati a Mekiman de „santa, santa, santa” (Yesaya 6:3). Den wortu disi e sori taki Gado soifri èn krin trutru. Fu di dati de so, meki Gado wani taki ala den dinari fu en musu de santa èn krin. A e taigi den: „Un musu de santa, bika mi santa.”—1 Petrus 1:16.

Bijbel e gi Kresten a deki-ati fu weri „krosi di fiti” (1 Timoteyus 2:9). A no de fu fruwondru taki na ini a buku Openbaring, „krosi fu fini linnen di krin èn di e brenki”, e prenki den reti sani di den sma e du di Gado e si leki santa sma (Openbaring 19:8). Na a tra sei, nofo tron Bijbel e agersi sondu nanga wan flaka noso nanga doti.—Odo 15:26; Yesaya 1:16; Yakobus 1:27.

Tide na a dei, milyunmilyun sma musu libi na presi pe den musu tan meki tranga muiti fu de krin, fu tyari densrefi na wan fasi di fiti, èn fu tan hori na anbegi fu Yehovah krin. Te fu kaba a problema disi o lusu te Gado o „meki ala sani kon nyun” (Openbaring 21:5). Te a pramisi dati kon tru, dan ala sani di doti èn di no krin no sa de moro.

[Futuwortu]

 [Faki na tapu bladzijde 10]

Gado wani taki wi musu de krin

Di den Israelsma ben e waka na ini a sabana, dan Gado ben taigi den finifini san den ben musu du te den go pupe (Deuteronomium 23:12-14). A sani disi ben musu fu de wan muilek sani fu du, fu di a kampu ben bigi. Ma a no de fu taki dati a wet disi ben meki taki den Israelsma no kisi siki soleki tyfus nanga cholera.

A pipel ben kisi a komando fu wasi noso pori iniwan sani di ben miti nanga wan dedeskin. Aladi den Israelsma no ben frustan kande fu san ede den ben musu du den sani dati, toku a wet disi ben kibri den gi siki.—Lefitikus 11:32-38.

Den priester ben musu wasi den anu nanga den futu fosi den ben o go du den wroko na ini a tabernakel. A no ben makriki fu furu a kopro beki nanga a watra di den ben e gebroiki fu wasi den anu nanga futu, ma den ben musu hori densrefi na a wet disi.—Exodus 30:17-21.

[Faki na tapu bladzijde 11]

Wan tu bodoi fu wan datra

Watra de prenspari gi a libi, ma doti watra kan meki sma kon siki èn den kan dede srefi. Datra J. Mbangue Lobe, edeman fu a datra afdeling na ini Douala, Kamerun, ben gi wan tu bodoi san sma kan du.

„Efu yu no de seiker taki a watra di yu e dringi krin, dan yu musu bori en.” Ma a ben gi a warskow disi: „Sma kan gebroiki chloor noso tra sani fu krin a watra, ma den kan abi takru bakapisi te den no e luku bun fa den e gebroiki den sani dati. Ala ten yu musu wasi yu anu nanga sopo èn nanga watra fosi yu e go nyan èn baka te yu go na toilet. Wan pisi sopo no diri, sobun, srefi pôtisma kan bai en. Abi a gwenti fu wasi yu krosi, èn wasi den na ini faya watra te yu abi krasikrasi na yu skin noso tra siki.”

A datra e taki moro fara: „Ala memre fu na osofamiri musu du muiti fu hori inisei nanga dorosei fu na oso krin. Nofo tron sma e frigiti fu krin den toilet noso kumakoisi, èn na so kakalaka nanga freifrei kan kon drape.” A datra e taki wan prenspari sani te a abi fu du nanga pikin-nengre: „Luku bun taki den pikin-nengre no e go wasi na ini den pikin kriki na ini yu birti. Wan lo bakteria nanga tra pikinpikin sani de na ini den kriki dati. Pikin-nengre musu wasi na netiyuru fosi den go sribi, den musu bosro den tifi bun na neti, èn den musu sribi na ondro wan klambu.” A sani di de prenspari ini a tori disi, na taki yu musu prakseri san yu kan du fu hori ala sani krin, yu musu meki muiti fu du den sani dati, èn leki bakapisi fu dati yu o man wai pasi gi furu problema.

[Prenki na tapu bladzijde 10]

Wasi yu krosi so taki yu no e kisi krasikrasi na yu skin nanga tra siki

[Prenki na tapu bladzijde 10]

Kresten e teki en na den tapu fu krin a presi pe den e libi

[Prenki na tapu bladzijde 10]

Wan mama di e broko en ede nanga en osofamiri kan du furu fu hori ala sani krin