Gado e dresi sma na wan wondru fasi na ini a ten disi?

NA INI son kondre nofo tron yu kan si sma di e go na santa presi, èn furu fu den e taki dati den kon betre fu siki di no ben man dresi. Na ini tra kondre, bonuman e taki dati den man dresi sma na wan wondru fasi nanga yepi fu aparti krakti. Na tra presi, kerki e hori konmakandra pe sikisma e dyompo fu den rolsturu noso den e trowe den kroku èn e taki dati den kon betre.

Den sma di e dresi trawan na a fasi disi, nofo tron de fu difrenti kerki. Nofo tron den e taki dati den tra sma di e dresi trawan, na sma di fadon komoto na bribi, na sma fu falsi bribi, noso na heiden. A sani di wi musu aksi wisrefi na disi: ’Gado e du wondru nanga yepi fu difrenti organisâsi di e wroko teige makandra?’ Te yu luku en bun, Bijbel e taki: „Bika Gado a no wan Gado fu bruya, ma fu vrede” (1 Korentesma 14:33). Sobun, na Gado trutru e gi den sma dati a krakti fu dresi trawan na wan wondru fasi? Sonwan fu den sma di e dresi trawan e taki dati den e du disi nanga yepi fu a krakti fu Yesus. Meki wi go luku fa Yesus ben dresi sma.

A fasi fa Yesus ben e dresi sma

Yesus ben e dresi sikisma heri tra fasi leki fa den sma na ini a ten disi e dresi trawan. Fu eksempre, Yesus ben e dresi ala sma di ben kon suku yepi na en. A no ben e dresi spesrutu sma nomo aladi a ben seni den trawan gowe sondro fu dresi den. Den sma di Yesus ben dresi ben kon betre dorodoro èn nofo tron dati ben pasa wantewante. Bijbel e taki: „Ala den sma ben pruberi fu fasi en, bika krakti ben komoto fu en èn a meki den alamala kon betre.”—Lukas 6:19.

Den sma na ini a ten disi di e feni taki den e dresi trawan nanga yepi fu begi, e taki nofo tron dati a siki sma no kon betre fu di a no abi nofo bribi. Tra fasi leki den sma dati, Yesus ben dresi sma srefi di no ben poti bribi na ini en ete. Fu eksempre, wan leisi Yesus ben go na wan breniman sondro taki a man ben kari en èn a ben dresi a man. Bakaten, Yesus ben aksi a man: „Yu e bribi na ini a Manpikin fu libisma?” A man piki en: „Masra, taigi mi suma na a man, dan mi o bribi na ini en.” Yesus taigi en: „Na en yu e si dya èn na en e taki nanga yu nownowde.”—Yohanes 9:1-7, 35-38.

Kande yu e aksi yusrefi: ’Efu wan sma no ben musu abi bribi na ini Yesus fu kon betre, dan fu san ede Yesus ben e taigi furu fu den sma di a ben dresi taki ’a bribi fu den meki den kon betre’?’ (Lukas 8:48; 17:19; 18:42) Nanga den wortu dati Yesus ben sori taki den sma di ben kon na en fu di den ben abi bribi, ben kon betre, aladi den sma di no ben wani go na en ben lasi na okasi fu kon betre. A no a bribi fu sma ben meki den kon betre, ma na a krakti fu Gado du dati. Bijbel e taki disi fu Yesus: „Gado salfu en nanga santa yeye èn nanga krakti; Yesus ben waka na ini a heri kondre e du bun, èn a ben e dresi ala sma di Didibri ben kwinsi, bika Gado ben de nanga en.”—Tori fu den Apostel 10:38.

Nofo tron moni de prenspari gi den sma di e feni taki den e dresi trawan na ini a ten disi. Den sma disi sabi fa fu meki sma poti moni gi den sani di den e du. Soleki fa a sori, dan wan fu den man disi, ben kisi na ini wán yari 89 milyun Amerkan dala fu sma na heri grontapu di ben luku a programa fu en na telefisi. Kerki organisâsi e kisi furu moni tu fu den sma di e go na den santa presi fu kon betre. Tra fasi leki den sma dati, Yesus noiti no ben piki moni na den sma di a ben dresi. Wan leisi a ben gi den nyanyan srefi (Mateyus 15:30-38). Di Yesus ben seni en disipel fu go preiki, a ben taigi den: „Meki sikisma kon betre, gi dedesma wan opobaka, meki gwasiman kon krin, yagi den ogri yeye puru na sma tapu. Un kisi sondro fu pai, dan un musu gi sma sondro fu meki den pai” (Mateyus 10:8). Fu san ede den sma di e taki dati den e dresi trawan na wan wondru fasi, e handri heri tra fasi leki Yesus?

 Suma e gi den a krakti fu dresi sma?

Na ini den yari di pasa, son datra go ondrosuku efu den sma di kerki fesiman dresi, kon betre trutru. San den kon si? Soleki fa wan kranti fu Londen e taki, dan wan datra fu Ingrisikondre di ondrosuku a tori disi 20 yari kaba, e taki: „Sma di e taki dati den e dresi trawan na wan wondru fasi, no man buweisi taki disi de so trutru.” Toku furu sma abi a tranga bribi taki den kon betre fu di den fasi wan santa sani, fu di den go na wan santa presi, noso fu di wan sma begi gi den. A kan de so taki sma kori den?

Na ini a Bergitaki fu Yesus, di furu sma sabi, a ben taki dati den kerki fesiman di e bedrigi trawan ben o taigi en: „Masra, Masra, . . . a no na ini yu nen wi ben du furu bigi wondru?” Toku mi sa taigi den krin: „Mi no sabi unu kwetikweti! Komoto na mi fesi, un sma di e du kruktudu” (Mateyus 7:22, 23). Te a abi fu du nanga a krakti di den sma disi e kisi, dan na apostel Paulus ben gi a warskow disi: „A sma di e du kruktudu de ete, fu di Satan e horibaka gi en te a e du ala sortu krakti wroko, èn te a e sori sma bigi marki nanga wondru fu kori den, èn na ala sortu onregtfardiki fasi a e bedrigi den sma.”—2 Tesalonikasma 2:9, 10.

Boiti dati, sma di e dresi trawan nanga yepi fu santa sani èn nanga popki, no e kisi a krakti fu den fu Gado. Fu san ede? Fu di Gado Wortu e taki krin dati wi musu „wai pasi gi na anbegi fu kruktugado” èn taki wi musu „luku bun nanga kruktugado” (1 Korentesma 10:14; 1 Yohanes 5:21). Fu dresi sma na a fasi disi, na wan fu den triki di Didibri e gebroiki fu hari sma puru fu a tru anbegi. Bijbel e taki: „Satan srefi e tan kenki ensrefi kon tron wan engel fu leti.”—2 Korentesma 11:14.

Fu san ede Yesus nanga den apostel ben dresi sma?

A wondru fasi fa sma ben kon betre soleki fa a skrifi na ini den Kresten Griki Buku fu Bijbel, e sori krin taki Yesus nanga den apostel kisi a krakti fu Gado fu dresi sma (Yohanes 3:2; Hebrewsma 2:3, 4). A wondru fasi fa Yesus ben e dresi sma, ben horibaka tu gi a boskopu di a ben preiki. Bijbel e taki: „A waka lontu na ini heri Galilea, aladi a ben e gi leri na ini den snoga fu den, èn ben e preiki a bun nyunsu fu a kownukondre. A ben e dresi ibri sortu siki” (Mateyus 4:23). Yesus ben du wondru sani. Boiti taki a ben dresi sikisma, a ben gi bun furu sma nyanyan tu, a ben abi makti tapu a se nanga a winti, èn a ben wiki dedewan srefi. Ala den sani disi di a ben du, e sori san a o du gi den libisma di e gi yesi te a o tiri grontapu leki Kownu. Dati na bun nyunsu trutru!

Baka di Yesus dede, èn sosrefi den apostel nanga iniwan sma di ben kisi a makti fu du wondru, dan den sortu wondru disi ben kon na wan kaba. Iya, den wondru disi noso den presenti fu a yeye, no ben de moro. Na apostel Paulus ben skrifi: „Awinsi sma kisi a presenti fu man taki profeititori, a o kon na wan kaba; awinsi sma kisi a presenti fu man taki na ini tra tongo, a o kon na wan kaba; èn awinsi sma kisi a presenti fu abi sabi, a o kon na wan kaba” (1 Korentesma 13:8). Fu san ede? Den wondru disi, èn sosrefi a wondru fasi fa sma ben e dresi trawan, ben musu sori taki Yesus na a pramisi Mesias èn taki Gado ben feni a Kresten gemeente bun. Di den sani dati ben kon na krin kaba, dan a no ben de fanowdu moro taki den wondru dati pasa. Den ben „kon na wan kaba”.

Toku a wondru fasi fa Yesus ben dresi sma, e leri wi wan prenspari sani na ini a ten disi. Te wi e poti prakseri na den sani di Yesus leri sma fu Gado Kownukondre èn te wi e poti bribi na ini den sani dati, dan wi kan fruwakti fu si a profeititori disi kon tru: „Nowan sma di e libi drape sa taki: ’Mi siki.’” Iya, na a ten dati wi o abi wan bun matifasi nanga Gado èn wi o de gosontu trutru.—Yesaya 33:24; 35:5, 6; Openbaring 21:4.