Mi feni a tru anbegi fu di mi ben e suku fowtu

Soleki fa R. Stuart Marshall fruteri

„Wi no e taki nanga Yehovah Kotoigi”, na so a Lomsu priester taigi mi. „Den e gebroiki Bijbel.” A piki fu en ben fruwondru mi, fu di leti na fesi mi ben aksi en fu sori mi wefi taki den sani di Yehovah Kotoigi e leri sma, no e kruderi nanga makandra. Mi bosroiti taki misrefi ben o abi fu studeri Bijbel nanga den Kotoigi, so taki mi kan sori mi wefi taki den e leri sma fowtu sani.

NA A ten dati, di mi ben abi 43 yari, mi teki a bosroiti fu gebroiki a koni di mi abi fu ondrosuku sani èn a sabi di mi abi fu kerkileri, fu buweisi taki den sani di Yehovah Kotoigi e leri sma, fowtu. Sensi lagiskoro te go miti heiskoro, mi ben go soso na skoro fu a Lomsu Kerki. Na ini 1969 mi kisi mi diploma gi ekonomia na a universiteit. Aladi mi ben kisi les fu filosofia nanga kerkileri na a universiteit, toku mi no ben studeri Bijbel na nowan fu den Lomsu skoro.

Baka di mi klari a heiskoro, mi trow nanga Patricia McGinn, di ben de wan Lomsu tu. Wi ala tu ben studeri go doro na a Stanford Universiteit, teleki wi kisi wi diploma. Wi manpikin Stuart, gebore na ini 1977, èn te fu kaba wi go libi na ini Sacramento, na Kalifornia, Amerkankondre. Na ini den 23 yari baka dati, mi ben wroko gi a lanti kantoro fu Kalifornia di e ondrosuku sani èn di e gi rai fosi lanti poti wan wet noso fosi lanti teki wan bosroiti fu du wan sani. Mi ben e ondrusuku efu a de fanowdu taki lanti poti moni na ini spesrutu programa di abi fu du nanga skoro afersi. Mi ben wroko tranga èn mi ben abi wan bun libi. Mi ben lobi a boi fu wi èn mi ben sorgu bun gi en teleki a gro kon bigi. Mi lobi wefi ben e horibaka gi mi ala ten, èn mi ben e horibaka gi en tu.

Gi 25 sensi yu kan kisi piki kaba

Di a boi fu wi ben abi tu yari, Patricia kisi wan Bijbel fu Yehovah Kotoigi èn a ben bigin studeri nanga den. Dri yari baka dati a teki dopu. Mi ben feni taki Yehovah Kotoigi e tan hori nomonomo na a denki di den abi te a abi fu du nanga fesadei èn nanga brudu transfusie. Aladi dati ben de so, toku mi ben feni taki den ben tyari son sani bun kon na krin fu overtoigi sma. Wan dei na ini 1987, mi kisi a kari fu go na wan spesrutu konmakandra fu den sma di e meki wet te a abi fu du nanga skoro afersi. Drape mi ben abi fu taki fu wan fu den penti di mi ben tyari kon na fesi. Mi ben fruwondru taki na a konmakandra dati, mi ben taki fa mi e denki fu den sani di Yehovah Kotoigi e leri sma.

Na Universiteit fu Kalifornia ben wani moni fu teki prati na wan strei pe tra distrikt ben o de na ini tu, èn pe den ben kan wini siksi milyard Amerkan dala fu lanti. A moni disi ben de fu  bow kefalek bigi wrokosani fu ondrosuku sabidensi tori. Mi no ben agri taki lanti gi na universiteit a moni fu go na ini a strei, fu di te fu kaba den wrokosani di den ben o bow no ben o tyari wini kon gi na ekonomia fu a distrikt. Fu di na universiteit no ben agri nanga mi, meki den teki tu sabiman di ben wini a Nobelprijs gi natuurkunde, fu sori sortu wini a sani disi ben o tyari kon. Ibriwan fu den man dati sori sortu sani sabiman o kon sabi te den abi den wrokosani dati. Wan fu den sabiman ben taki dati den wrokosani dati ben o yepi den fu kon sabi fa hemel nanga grontapu kon de. A trawan ben taki dati den ben o kon sabi fa libi bigin na grontapu.

A fesiman fu a komte drai luku mi.

A aksi mi: „Yu denki taki siksi milyard Amerkan dala furu tumusi fu pai gi den piki tapu den aksi disi?”

Mi taigi en: „Mi e agri taki den aksi disi prenspari. Ma Yehovah Kotoigi e kon na mi oso tapu satra mamanten, fu pristeri wan tijdschrift di e gi piki tapu den srefi aksi disi, èn yu abi fu pai 25 sensi nomo. Èn mi no sabi efu a piki di wi o kisi gi a siksi milyard Amerkan dala, bun moro leki a piki di den e gi fu 25 sensi.”

Ala sma na ini a kamra bari lafu, sosrefi den tu sabiman di ben wini a Nobelprijs. Aladi lanti ben gi primisi taki na universiteit kisi a moni, toku nowan sma ben taki dati mi no ben abi leti.

Baka wan pisi ten, mi bigin si taki a situwâsi na ini wi osofamiri ben e kenki èn wi ben abi fu taki fu en. Siksi yari langa mi nanga Patricia ben taki nanga makandra fu Bijbel èn fu Yehovah Kotoigi. Mi ben firi brokosaka fu di a ben wani gi moro fu en ten fu preiki. Disi ben o wani taki dati a no ben o wroko so furu moro na a universiteit. Mi no ben man frustan taki wan sma di de nanga en bunbun frustan ben kan prakseri fu du so wan sani. A ben gersi leki mi no ben o man taki noso du wan sani di ben o kenki en prakseri.

Mi pruberi fu suku yepi na wan sma di sabi Bijbel moro mi, wan sma di mi denki taki ben o man sori mi wefi krin taki den sani di Yehovah Kotoigi e leri sma, no e kruderi nanga Bijbel. Efu a sma dati ben man sori en soso wán fowtu leri, dan dati ben o meki a tweifri na den tra leri tu. Dati na ala san mi ben abi fanowdu fu meki a koni wefi fu mi kenki prakseri. Mi go taki nanga a Lomsu priester fu a kerki pe mi nanga Patricia ben e go fosi. Wi ben tapu a takimakandra fu wi nanga den wortu di skrifi na a bigin fu na artikel disi. Di a priester ben weigri fu taki nanga mi wefi, mi ben sabi taki aladi a ben o teki wan pisi ten, toku na misrefi ben o abi fu suku den fowtu èn sori Patricia dati.

Mi ben suku fowtu

A sani di naki mi ati trutru di mi ben e studeri Bijbel nanga den Kotoigi, na den Bijbel profeititori. Na ini a profeititori fu Yesaya, mi ben leisi finifini fu a fadon fu Babilon, èn den sani dati  ben skrifi pikinmoro 200 yari na fesi. Boiti dati, Yesaya ben taki dati na Sirus ben o teki a foto abra, èn a ben taki tu dati a ben o meki na Eufraat-liba lon go na wan tra sei fu man teki Babilon abra (Yesaya 44:27–45:4). Wan tu yari na fesi, mi ben studeri fa Babilon ben fadon, èn dati ben de na wan les di e sori fa srudati kan teki wan foto abra. Mi ben leri tu taki moro leki 200 yari na fesi, a profeiti Danièl ben taki finifini fu wan makti kownu fu Grikikondre. A ben taki dati baka a dede fu a kownu disi, a kownukondre fu en ben o prati na ini fo kownukondre di no ben o abi so furu makti (Danièl 8:21, 22). Mi ben memre a tori disi fu Aleksander a Bigiwan, fu di mi ben e studeri sani di ben pasa na ini owruten. Fu di mi ben ondrosuku sani na ini tra buku, meki mi ben kisi na overtoigi taki trutru den profeititori disi ben skrifi fosi den sani ben pasa.

O moro mi ben e studeri nanga den Kotoigi, o moro mi ben kisi na overtoigi taki Bijbel na Gado Wortu. Na ini ala den yari di mi ben studeri den Lomsu kerkileri, mi no ben kisi na overtoigi dati. San mi ben o du nanga ala a sabi disi? Mi bosroiti fu gi mi libi abra na Yehovah èn tron wan fu den Kotoigi fu en (Yesaya 43:10). Mi teki dopu na ini 1991, tu yari nomo baka di mi ben taki nanga a priester. A manpikin fu wi teki dopu a yari baka dati.

Fu di wi kon na ini a tru bribi, meki wi kenki den marki di wi ben abi leki osofamiri. Wan fu den fosi sani di mi du baka di mi teki dopu, na fu seti sani so taki baka feifi yari, te mi wefi ben o abi 50 yari, a no ben o wroko moro na a universiteit. A ben wani pionier èn dati ben wani taki dati a ben o wroko sowan 1000 yuru wán yari, noso sowan 83 yuru wán mun, fu yepi tra sma fu kon sabi den tru tori fu Bijbel. Na ini 1994, mi wefi no ben e wroko so furu moro èn fu dati ede a ben man bigin du a pionierwroko. Mi ben wani du moro na ini a diniwroko, èn mi ben wani yepi pe mi ben man na ini a gemeente fu wi. Boiti dati, mi ben wani gebroiki a koni di mi abi fu yepi nanga den moni afersi na a bow fu Kownukondre zaal na ini a kontren.

Son leisi, mi ben kisi na okasi fu taki fu Bijbel na wrokope. Wan uma di ben kon wroko drape èn di ben du a srefi wroko leki mi, ben de wan Kotoigi di no ben de fayafaya moro na ini a bribi. Fu di a ben e tweifri na son leri fu Bijbel, meki a bribi fu en ben kon swaki. Mi ben breiti fu yepi en fu kon kisi wan bun matifasi baka nanga Yehovah. A sisa disi drai go baka na a presi pe a gro kon bigi èn a bigin pionier.

Na ini 1995, mi ben go na wan konmakandra fu den komte fu skoro afersi. A fesiman fu a komte ben aksi wan fu den lantiman fa sani ben waka nanga a bow fu den kefalek bigi wrokosani di sma ben o gebroiki fu ondrosuku sabidensi tori. A lantiman ben taki dati na a distrikt Texas ben kisi a moni fu du dati, ma dri reide ben de fu san ede den no ben kaba nanga a bow. Na a fosi presi a moni di den ben abi fanowdu fu bow den wrokosani, ben kren fu siksi milyard go na neigi milyard Amerkan dala, èn dati ben pasa srefi fosi den bigin nanga a bow. Na a di fu tu presi, lanti ben wani gebroiki a moni gi tra sani, spesrutu gi a feti fu Irak na ini 1991. Na a di fu dri presi, den ben kon si taki Yehovah Kotoigi kan gi piki tapu den sani di den ben aksi densrefi fu a libi, gi 25 sensi nomo! Soleki fa a sori, dan furu sma ben yere fu a sani di mi ben taki èn now den ben e taki fu en baka na wan fu den konmakandra fu den komte fu skoro afersi.

Di ala sma ben lafu, dan wan tu fu den memre fu a komte luku mi. Mi ben taigi ala den sma di ben de drape: „Now yu no abi fu pai fu kisi den piki dati, efu yu e leisi den publikâsi nomo.”

Wan bun èn koloku libi

Di mi wefi go nanga pensyun, wi bigin seti sani so taki baka feifi yari mi ben kan go du a pionierwroko. Na wan koni fasi mi ben aksi na tra wrokope efu mi ben kan du afudei wroko, fu di now mi ben wani abi moro ten fu leri trawan den tru tori fu Bijbel. Sondro taki mi ben fruwakti dati, den sma na a wrokope fu mi ben taigi mi taki mi no abi fu wroko ala dei. Sobun, na ini 1998, mi bigin pionier tu.

Wan mamanten di mi nanga mi wefi ben e sreka fu go na ini a preikiwroko, a bijkantoro fu Yehovah Kotoigi na ini Brooklyn, New York, bel mi. Den ben e suku sma di abi a koni fu du spesrutu wroko. Fu dati ede den aksi efu mi wani  kon wroko na a bijkantoro na ini Brooklyn. Sondro fu draidrai mi piki den taki mi wani go. Fu dati ede, wi ben go wroko na a edekantoro 18 mun langa. Mi ben go moro fruku nanga pensyun fu a wroko di mi ben du gi lanti, so taki mi ben kan klari a wroko di wi ben e du gi a bijkantoro. Baka dati, wi go yepi na a bow fu a Kongreshal fu Yehovah Kotoigi na ini Fairfield, na Kalifornia. Wi seri na oso fu wi na ini Sacramento, èn wi froisi go na wan pikin oso na ini Palo Alto. Mi kisi moro blesi fu di mi ben go moro fruku nanga pensyun. Sensi a ten dati, wi wroko na bijkantoro fu Yehovah Kotoigi na ini Nigeria, Zuid Afrika, Kanada, Ingrisikondre nanga Doisrikondre.

Neleki den Kotoigi di ben yepi wi, na so mi nanga mi wefi e feni en wan prisiri sani fu yepi trawan kon sabi den tru tori fu Bijbel. Mi e feni trutru taki fu ala den leri di mi kisi, a di fu Yehovah e tyari moro furu wini kon gi mi. A leri dati moro bun leki iniwan leri di yu kan kisi na grontapu, fu di a abi fu du nanga furu difrenti sani fu a libi. Yehovah e leri den Kotoigi fu en fu leri sma den tru tori fu Bijbel na wan fasi di e doro a frustan nanga na ati. Fu dati ede mi wani tan kisi leri fu en. Mi nanga mi wefi de nanga tangi gi a libi di wi abi now èn gi a grani di wi abi fu gebroiki a skoroleri di wi kisi, fu dini Yehovah Gado, A Moro Heiwan fu hemel nanga grontapu.

[Prenspari pisi na tapu bladzijde 27]

A sani di naki mi ati trutru di mi ben e studeri Bijbel nanga den Kotoigi, na den Bijbel profeititori

[Prenki na tapu bladzijde 27]

Mi nanga Patricia tapu wi trowdei

[Prenki na tapu bladzijde 29]

A e gi wi prisiri fu yepi trawan fu kon sabi den tru tori fu Bijbel