Yesus—A moro bun eksempre fu waka na baka

YU WANI de wan moro bun sma di de koloku? Na apostel Paulus ben taki fa wi kan du dati. A skrifi: „Krestes ben nyan pina gi unu èn a libi wan eksempre gi unu, so taki unu kan waka soifri na en baka” (1 Petrus 2:21). Iya, fu di Yesus Krestes libi na wan tumusi aparti fasi, meki wi kan leri furu fu en. Te wi e leri moro fu Yesus èn te wi e libi soleki fa a ben libi, dan wi sa de moro bun sma di de koloku. Meki wi go luku moro fini san na wan tu fu den fasi fu a prenspari man disi, èn sortu wini wi kan kisi fu na eksempre fu en.

Yesus ben sabi san na den moro prenspari sani na ini a libi. Aladi Yesus ben taki dati a no ben „abi nowan presi fu poti en ede”, toku a no ben pina ensrefi fu di a no ben e du prisiri sani na ini a libi èn a no ben leri sma fu libi na a fasi dati tu (Mateyus 8:20). A ben e go na fesa (Lukas 5:29). A fosi wondru fu en di skrifi na ini Bijbel, ben de taki a meki watra tron win na wan trowfesa. A sani disi e sori taki Yesus no ben de wan sma di no ben bumui nanga trawan (Yohanes 2:1-11). Toku Yesus ben sori krin san ben de moro prenspari gi en. A ben taki: „Mi nyanyan na taki mi musu du a wani fu a sma di seni mi kon èn fu klari a wroko fu en.”—Yohanes 4:34.

□ Yu ondrosuku fa a de nanga yu? Fa yu kan sorgu taki den gudu di yu e suku fu abi, no de moro prenspari leki a matifasi di yu abi nanga Gado?

Sma ben lobi fu go na Yesus. Bijbel e taki dati Yesus ben de wan sma di ben abi switifasi trutru. A no ben feni en fruferi te sma ben kon na en nanga den problema fu den noso nanga muilek aksi. Wan leisi di wan bigi grupu sma ben lontu Yesus, dan wan uma di ben siki 12 yari langa, ben fasi en krosi fu di a ben wani kon betre. Aladi tra sma ben kan feni taki a sani di na uma ben du no fiti, toku Yesus no ben piri-ai gi en. Na wan switifasi a taigi na uma: „Mi umapikin, na a bribi fu yu meki yu kon betre” (Markus 5:25-34). Sosrefi pikin-nengre ben lobi fu go na Yesus, fu di den ben sabi taki a ben o poti prakseri  na den (Markus 10:13-16). Te a ben taki nanga den disipel fu en, dan a ben taigi den krin san de na tapu en ati èn a ben taki na wan switifasi. Den disipel fu en no ben frede fu tron bun mati fu en.—Markus 6:30-32.

□ A makriki gi trawan fu kon taki nanga yu?

Yesus ben firi gi trawan èn a ben abi sari-ati gi den. Wan fu den moro moi fasi fu Yesus na taki a ben man poti ensrefi na ini a situwâsi fu trawan èn na so fasi a ben man yepi den. Na apostel Yohanes e taki dati di Yesus ben si taki Maria ben krei fu di en brada Lasarus ben dede, dan Yesus ben „soktu dipi èn a ben kon hebi gi en trutru” èn a „bigin krei”. Den sma di ben de drape ben man si krin taki Yesus ben lobi a famiri dati trutru èn a no ben syen fu sori fa a e firi. Yesus ben sori taki a abi sari-ati trutru, di a ben gi en mati wan opobaka.—Yohanes 11:33-44.

Wan leisi, wan man di ben abi gwasi, wan takru siki di ben meki taki a no ben libi na mindri tra sma, ben begi Yesus: „Masra, efu yu wani nomo, yu kan meki mi kon krin.” Na wan switifasi Yesus „langa en anu fu fasi a man èn a taki: ’Mi wani. Kon krin ’” (Mateyus 8:2, 3). Yesus no ben dresi sma nomo fu meki profeititori kon tru. A ben wani figi den watra-ai fu den puru. Ala sani di a ben du, ben kruderi nanga wan fu den sani di a ben taki èn di furu sma sabi: „San unu wani meki sma du gi unu, na dati un musu du gi den tu.”—Lukas 6:31.

□ Den sani di yu e du e sori taki yu abi sari-ati gi trawan?

Yesus ben hori den firi fu trawan na prakseri èn a ben frustan den. Aladi Yesus no ben meki fowtu, toku a no ben fruwakti fu trawan taki den e du sani sondro fu meki fowtu. Boiti dati, noiti a ben meki trawan kisi a denki taki a bun moro den èn ala ten a ben handri na wan fasi di e sori taki a e hori den firi na prakseri. Wan leisi, wan uma „di sma fu a foto ben sabi leki wan sondari”, ben wasi Yesus futu nanga en watra-ai fu di a ben wani sori taki a abi bribi nanga warderi. Yesus ben gi na uma pasi fu du dati, aladi a sma di ben kari Yesus kon na en oso, ben krutu na uma sondro fu abi sari-ati gi en. Fu di Yesus ben frustan taki na uma ben handri na wan opregti fasi, meki a no krutu na uma gi den sondu di a du. Na presi fu dati, Yesus ben taki: „A bribi fu yu frulusu yu; yu kan go na ini vrede.” Fu di Yesus ben handri na wan switifasi nanga en, meki a musu fu de so taki na uma ben drai en libi.—Lukas 7:37-50.

□ Trawan sabi yu leki wan sma di no gaw fu krutu trawan? Yu de gaw fu prèise trawan?

A no ben e teki sma sei èn a ben abi lespeki gi tra sma. Yesus ben lobi a disipel Yohanes trutru, kande fu di den ben abi pikinmoro den srefi fasi èn fu di den ben de famiri fu makandra. * Aladi dati ben de so, toku Yesus no ben teki en sei èn a no ben feni taki Yohanes bun moro den tra disipel (Yohanes 13:23). Fu taki en leti, di Yohanes  nanga en brada Yakobus ben aksi fu kisi wan moro bun posisi na ini Gado Kownukondre, dan Yesus piki den: „A no mi musu taki suma kan go sidon na mi reti-anusei, noso suma kan go sidon na mi kruktu-anusei.”—Markus 10:35-40.

Ala ten Yesus ben sori lespeki gi trawan. A no ben abi wan takru denki fu trawan aladi den sma na ini a ten dati ben du dati. Fu eksempre, sma ben si umasma moro lagi leki mansma. Toku Yesus ben handri na wan lespeki fasi nanga umasma. A fosi leisi di Yesus taki krin dati en na a Mesias, na di a ben taki nanga wan uma di no ben de wan Dyu ma wan Samariasma. Nofo tron den Dyu ben wisiwasi den Samariasma èn den no ben wani taki den sma dati odi srefi (Yohanes 4:7-26). Yesus ben gi umasma a grani fu de den fosiwan di ben si en baka di a kisi wan opobaka.—Mateyus 28:9, 10.

□ Yu e sori taki yu no e teki sma sei te a abi fu du nanga sma fu wan tra ras, nanga mansma, noso umasma, nanga sma di e taki wan tra tongo, noso nanga sma di komoto fu wan tra kondre?

A ben sabi en frantwortu leki manpikin èn leki brada. Soleki fa a sori, dan Yesus en kwekipapa Yosef, dede di Yesus ben yongu ete. A musu fu de so taki Yesus ben horibaka gi en mama, èn gi den brada nanga sisa fu en, fu di a ben wroko leki temreman (Markus 6:3). Leti bifo a dede, a gi a disipel Yohanes a frantwortu fu sorgu gi en mama.—Yohanes 19:26, 27.

□ Yu man waka baka na eksempre fu Yesus fu di yu e sorgu gi yu famiri soleki fa Yesus ben du dati?

Yesus ben de wan trutru mati. Yesus ben de wan tumusi bun mati. Fa so? A no ben libi den mati fu en, soso fu di den ben meki fowtu, srefi efu den ben e meki a srefi fowtu ibri tron baka. A no ala ten den disipel fu en ben du san a ben wani taki den du. Ma a ben sori taki a ben de wan mati fu den, fu di a ben poti prakseri na den bun fasi fu den na presi fu luku den takru fasi fu den nomo (Markus 9:33-35; Lukas 22:24-27). Yesus no ben dwengi den disipel fu en fu denki leki en, ma na presi fu dati a ben meki den taki san de tapu den ati.—Mateyus 16:13-15.

San de moro prenspari, na taki Yesus ben lobi den mati fu en (Yohanes 13:1). San a ben du srefi fu sori taki a lobi den trutru? A ben taki: „Nowan sma abi moro lobi leki a sma di gi en libi gi den mati fu en” (Yohanes 15:13). Wan sma kan gi en mati wan moro bigi sani leki a libi fu en?

□ Yu e tan abi wan bun matifasi nanga trawan, srefi te den e tanteri yu noso te den e hati yu firi?

A ben tyari ensrefi leki wan mansma di abi deki-ati. Yesus no de leki a swaki mansma di no man du noti, soleki fa dati de fu si na den skedrei di sma meki fu en. Den Evangelietori e sori taki Yesus ben de wan tranga man di ben de fayafaya. Tu leisi, Yesus ben yagi den seriman puru na ini a tempel èn a ben trowe den sani di den ben seri (Markus 11:15-17; Yohanes 2:14-17). Di wan bigi grupu sma ben kon fu grabu „Yesus fu Nasaret”, dan nanga deki-ati a waka go na fesi fu taki dati na en ben de a man dati. Boiti dati a ben kibri den disipel fu en tu, fu di a ben taki krin: „Na mi. Fu dati ede, efu na mi unu e suku, dan meki den wan disi gowe” (Yohanes 18:4-9). Pontius Pilatus ben si taki Yesus ben abi deki-ati di sma grabu en èn di den handri na wan ogri-ati fasi nanga en. Fu dati ede, a no de fu fruwondru taki Pontius Pilatus ben taki: „Luku! A man!”—Yohanes 19:4, 5.

□ Yu e sori deki-ati èn yu no e draidrai te yu e si taki yu musu du wan sani?

Den fasi disi fu Yesus, èn sosrefi tra moi fasi fu en, e meki taki en na a moro bun eksempre gi wi. Te wi e gi pasi taki a fasi fa a ben e tyari ensrefi abi krakti tapu wi, dan wi sa de moro bun sma di de moro koloku. Na fu dati ede na apostel Petrus ben gi Kresten a deki-ati fu waka soifri baka Yesus. Yu e pruberi fu du ala san yu man fu waka soifri baka Yesus?

A de moro leki wan eksempre gi wi

Ma Yesus ben de moro leki wan eksempre di wi kan waka na baka. A ben taki: „Mi na  a pasi, a waarheid nanga a libi. Nowan sma kan kon na a Tata, efu mi no yepi en” (Yohanes 14:6). Yesus ben meki sma kon sabi den tru tori di abi fu du nanga Gado, so taki den kan kon krosibei na Gado. Boiti dati, nanga yepi fu Yesus, sma di e gi yesi na Gado kan kisi libi.—Yohanes 3:16.

Na fu a sani disi meki Yesus ben kon na grontapu. Yesus ben taki: „A Manpikin fu libisma no kon fu sma dini en, ma a kon fu dini sma èn fu gi en sili leki wan lusu-paiman fu frulusu furu sma” (Mateyus 20:28). Fu di Yesus gi en libi leki wan srakti-ofrandi, meki libisma man kisi têgo libi. San ibriwan fu wi musu du fu kisi a libi dati? Yesus ben taki: „Efu sma wani kisi têgo libi, dan den musu tan leri sabi yu, a wan-enkri tru Gado, èn a sma di yu seni kon, Yesus Krestes.”—Yohanes 17:3.

Iya, te wan sma e kon sabi Yesus, te a e waka baka na eksempre fu en, èn te a e sori bribi na ini a srakti-ofrandi fu en, dan a kan kisi têgo libi. Wi e gi yu a kari fu studeri Bijbel, a buku pe a sabi dati skrifi, èn fu du muiti fu du den sani di yu leri, soleki fa Yesus ben du dati. *

A fasi fa Yesus libi, e sori wi fa wi musu libi. A dede fu en di de leki wan srakti-ofrandi, kan puru wi na ini sondu èn dede di de a bakapisi fu sondu (Romesma 6:23). A no de fu taki dati wi no ben o abi nowan howpu efu Yesus Krestes no ben kon na grontapu! Noiti no gi pasi taki den furu sani di de fu du na ini a libi èn sosrefi den broko-ede fu a libi, meki taki yu e lasi na okasi fu poti prakseri èn fu waka baka na eksempre fu a moro prenspari man di ben libi, namku Yesus Krestes.

[Futuwortu]

[Faki/​Prenki na tapu bladzijde 7]

▪ Yesus no ben e teki sma sei èn a ben abi lespeki gi ala sma

▪ Yesus ben de wan trutru mati srefi te na dede

▪ Yesus ben abi deki-ati

Yu e pruberi fu du ala san yu man fu waka soifri baka Yesus?

[Prenki na tapu bladzijde 5]

Yesus ben sabi san de prenspari trutru . . .

sma ben lobi fu go na en . . .

a ben abi sari-ati gi sma