Yu ben sabi a sani disi?

Sortu wroko Yesus ben du leki temreman?

Yesus en kwekipapa ben de wan temreman. Yesus ben leri fu du a srefi wroko dati. Di a bigin en diniwroko di „a ben abi sowan dritenti yari”, dan sma ben sabi en leki „a manpikin fu a temreman”, èn sosrefi leki wan temreman.—Lukas 3:23; Mateyus 13:55; Markus 6:3.

Na ini a foto pe Yesus ben kweki, sma ben o abi wrokosani fanowdu fu wroko den gron. Kande den ben abi sani fanowdu soleki plugu nanga tyatyari, di ben meki fu udu. Tra sani di temreman ben e meki, na sani soleki tafra, sturu, bangi, nanga kisi pe sma ben poti sani na ini, èn sosrefi sani soleki doro, fensre, udu sroto, nanga postu fu poti na a plafon. Te yu e luku en bun, wan temreman ben e bow oso tu.

Na ini wan agersitori, Yohanes a Dopuman ben taki fu wan aksi, wan wrokosani di Yesus nanga tra temreman ben e gebroiki fu koti bon trowe. Baka dati, den ben koti postu puru na ini a udu noso den ben tyari na udu go na a wrokope fu den. A no de fu taki dati wan sma ben musu tranga fu du a sortu wroko disi (Mateyus 3:10). Yesaya e taki fu tra wrokosani di temreman ben e gebroiki na ini a ten dati: „A sma di sabi meki moi sani nanga udu, e teki en markitiki fu marki na udu. Nanga redi kreiti a e hari wan strepi fu luku o langa na udu de. Nanga wan skafu a e skafu na udu èn ibri tron a e hari strepi nanga wan passer fu marki na udu” (Yesaya 44:13). Den owruten sani di sma feni e sori taki sma na ini Bijbel ten ben e gebroiki isri sa, ston amra, nanga bronsu spikri (Exodus 21:6; Yesaya 10:15; Yeremia 10:4). Fu dati ede wi kan fruwakti taki Yesus ben gebroiki den sortu sani dati.

San na a „bangi” di Yesus ben taki fu en na ini wan fu den agersitori fu en, èn fa a bangi dati ben wroko?

Yesus ben taki fu wan masra di ben piri-ai gi wan lesi srafu, èn a ben taigi en: „Yu ben musu poti a solfru moni fu mi na bangi, so taki te mi ben o kon, dan mi ben o kisi mi moni baka nanga rente.”—Mateyus 25:27.

Na ini a ten fu Yesus yu no ben abi den bangi soleki fa wi sabi den na ini a ten disi. Ma langa ten na fesi yu ben abi sma di ben leni trawan moni. Te sma ben kon leni moni na den, dan den ben abi fu pai furu rente. Ma sma di ben poti moni na den sma dati, no ben kisi furu rente. Soleki fa wan buku e taki, dan na a di fu fo yarihondro bifo Krestes, den sma na ini Grikikondre ben abi a gwenti fu aksi rente gi a moni di den ben leni trawan (The Anchor Bible Dictionary). Na a ten di den Romesma ben tyari vrede kon, dan a rente di sma na ini a Gran Kownukondre Rome ben musu pai ibri yari, ben de na mindri 4 nanga 6 procent.

Na ini a Wet di Gado ben gi Moses, den Israelsma no ben mag aksi rente na tra Israelsma di ben kon leni moni na den èn di ben e pina (Exodus 22:25). A wet disi ben abi fu du moro furu nanga a moni di pôtisma ben go leni na trawan. Ma soleki fa na agersitori fu Yesus e sori, dan a ben de a gwenti taki sma e kisi rente te den ben poti moni na „bangi” noso na sma di ben e leni trawan moni. Sobun, Yesus ben taki dyaso tu fu wan sani di den arkiman fu en ben sabi.