A fasi fa Gado gebroiki Maria fu meki a wani fu en kon tru

NA A ten fu Yesus en diniwroko, wan uma ben opo en sten na mindri na ipi sma èn a taki: „Koloku fu na uma di ben tyari yu na ini en bere èn di ben gi yu bobi!” Efu Yesus ben wani taki sma gi en mama spesrutu grani, dan disi ben o de wan moi okasi fu taigi den taki den musu anbegi en mama. Na presi fu dati, a taki: „Nôno, koloku fu den sma di e yere a wortu fu Gado èn di e du san a wortu e taki!”​—Lukas 11:27, 28.

Yesus no ben gi en mama spesrutu grani, èn noiti a taigi en bakaman fu du dati. Dan fu san ede furu sma e anbegi Maria? Meki wi go luku san Bijbel e taki te a abi fu du nanga den sani di sma e leri trawan fu Yesus en mama.

Wan uma di Gado blesi

Na engel Gabrièl ben taigi Maria na sortu fasi Gado ben o gebroiki en fu du En wani. Na a okasi dati, na engel gi Maria odi èn a taki: „Odi, yu di kisi wan bigi grani, Yehovah de nanga yu” (Lukas 1:28). Syatu baka dati, Elisabet gi Maria odi èn a taki: „Yu na a moro blesi uma; blesi fu a pikin di de na ini yu bere” (Lukas 1:42). Den wortu disi no e sori taki Maria musu kisi spesrutu grani?

Fu taki en leti, dati no de so. Aladi den Lomsu sma e gebroiki den wortu dati te den e begi Maria, toku Bijbel srefi no e taki dati wi musu du dati. Gabrièl nanga Elisabet ben frustan taki Maria kisi a bigi grani fu meki a pikin di ben o tron a Mesias, ma Bijbel no e sori taki den ben abi na prakseri fu begi Maria. Na presi fu dati, di den disipel fu Yesus aksi en fu leri den begi, dan Yesus sori den taki den musu begi en Tata. Fu taki en leti, a begi di Yesus leri den disipel fu en, èn di furu sma sabi,  e bigin nanga den wortu disi: „Wi Tata na hemel.”​—Mateyus 6:9.

Wán fu den sma di o tiri

Wan tra sani di sma e leri fu Maria, na taki en na „a Umakownu fu hemel” now. Bijbel no e gi en so wan posisi. Ma Bijbel e sori taki Maria abi wan spesrutu presi na ini a hemel seti fu Gado. San na dati?

Yesus ben sori taki sonwan fu den disipel fu en di ben tan waka na en baka, ben o tiri makandra nanga en na ini en Kownukondre (Lukas 22:28-30). Yesus sa gi den sma dati a makti fu dini leki „priester gi wi Gado, èn den o tiri grontapu leki kownu” (Openbaring 5:10). Te wi e leisi Bijbel, dan wi e frustan krin taki Maria na wan fu den sma di kisi a spesrutu grani disi. Fu san ede wi kan taki dati?

Kande yu kan memre taki baka di Yesus dede, Maria ben e „tan begi” makandra nanga den disipel èn nanga den brada fu Yesus. Sowan 120 sma ben kon makandra fu du dati, èn na mindri den yu ben abi sosrefi „wan tu umasma” (Tori fu den Apostel 1:12-15). Bijbel e taki dati di „a Pinksterfesa” ben e hori, dan „den alamala ben de makandra na wán presi” èn Gado santa yeye ben kon na den tapu. Na so den bigin taki na ini difrenti tongo.​—Tori fu den Apostel 2:1-4.

Fu di Maria ben de na mindri den sma disi di ben kisi santa yeye, meki dati e sori taki Maria ben de wan fu den sma di Gado teki fu tiri makandra nanga Yesus na ini en Kownukondre na hemel. Sobun, disi e sori krin taki Maria de now na ini hemel nanga Yesus pe den e kisi glori (Romesma 8:14-17). Luku wan tu fu den grani di Maria nanga den tra sma di o tiri makandra nanga Yesus o kisi, fu meki a wani fu Gado kon tru.

Den o meki libisma kisi tumusi moi blesi

A Bijbel buku Openbaring e sori taki 144.000 sma ben o kisi wan opobaka fu go na hemel pe den o kisi glori, èn pe den o dini makandra nanga Yesus leki priester, krutuman, nanga kownu (Openbaring 14:1, 4; 20:4, 6). Den sma disi di o dini leki priester, o meki ala libisma di e gi yesi, kisi blesi nanga yepi fu a lusu-paiman fu Yesus. Na so fasi libisma o man anbegi Gado na wan fasi di bun dorodoro, den o tyari densrefi na wan fasi di bun dorodoro, èn a gosontu fu den o bun dorodoro (Openbaring 21:1-4). A o de trutru wan bigi grani gi ala den anbegiman fu Yehovah fu libi na ini a tumusi moi ten dati! *

Yehovah ben gebroiki Maria na ini a ten di pasa, èn a e gebroiki en te now ete fu meki a wani fu en kon tru. Maria ben abi sakafasi, a ben abi bribi, a ben e gi yesi, èn a ben de wan bun mama. Ma moro prenspari na taki a ben horidoro aladi a ben kisi tesi. Fu dati ede, a de wan moi eksempre gi wi. Fu di Maria ben meki a pikin di ben o tron a Mesias, èn fu di en na wan fu den sma di o meki libisma kisi den blesi di e kon leki bakapisi fu a lusu-paiman, meki wi musu abi bigi lespeki gi en.

Ma a moro prenspari sani di wi e leri fu Maria, na taki en, èn sosrefi ala tra futuboi fu Gado, e anbegi Yehovah wawan èn nowan tra gado. Maria, makandra nanga den tra sma di o tiri nanga Krestes, e opo den sten fu meki bekènti: „A Sma [noso Yehovah Gado] di e sidon na tapu a kownusturu, nanga a Pikin Skapu [Yesus Krestes] musu kisi blesi, grani, glori, nanga makti fu têgo, iya, fu ala ten.”​—Openbaring 5:13; 19:10.

[Futuwortu]

[Prenspari pisi na tapu bladzijde 10]

A sakafasi, a bribi nanga a fasi fa Maria gi yesi, na wan moi eksempre gi wi