Ala ten wi kan taki nanga Gado. Neleki fa wan lobi-ati papa e breiti te en pikin no frede fu taki nanga en, na so Yehovah Gado e breiti tu te wi e begi fu taki nanga en. Ma neleki wan koni papa, Gado sabi tu fu san ede a no e gi sma son leisi san den aksi en na ini begi. Wan sma kan kon sabi fu san ede Gado no e piki begi son leisi? Bijbel e taki wan sani fu disi?

Na apostel Yohanes taki: „Disi na san wi sabi seiker fu en, taki awansi san wi e aksi akruderi a wani fu en, a e yere wi” (1 Yohanes 5:14). Den sani di wi e aksi musu de sani di en feni bun. Son sma e aksi Gado sani di a no lobi kwetikweti, sani soleki fu wini wan lòt noso wan bigi moni. Trawan no abi bun sani na prakseri te den e begi. A disipel Yakobus ben warskow sma di e begi na a fasi disi. A ben taki: „Unu e aksi, ma toku unu no e kisi, bika unu e aksi nanga takru prakseri, fu di unu wani plisi den tranga lostu fu unu.”​—Yakobus 4:3.

Kon meki wi taki fu eksempre dati tu grupu sma o plèi bal èn ala tu grupu e begi fu wini a plèi. A de krin taki Gado no o piki den begi fu sma di e strei nanga makandra, a no so? Na so a de tu te sma o go na feti, èn ala tu grupu e begi fu wini a feti.

Den sma di e wisiwasi den wet fu Gado no musu fruwakti taki a o piki den begi fu den. Wan leisi Yehovah ben abi fu taigi wan grupu hoigriman: „Awansi unu e begi furu, toku mi no e arki, fu di un eigi anu kon furu nanga a brudu fu sma di unu kiri” (Yesaya 1:15). Bijbel e taki: „Gado e tegu gi den begi fu wan sma di no wani arki a wet.”​—Odo 28:9.

Ma na a tra sei, Yehovah o arki ala ten te den anbegiman fu en e begi en nanga wan krin ati, aladi den e du muiti fu dini en soleki fa en wani. Ma disi wani taki dati a e gi den ala sani di den e aksi en? Nôno. Meki wi luku wan tu eksempre na ini Bijbel.

Gado ben lobi Moses trutru, ma toku Moses ben musu aksi sani „akruderi a wani fu en”. Di Moses no du dati, dan Gado no arki en tu. Aladi Gado ben taki kaba san ben o pasa nanga en, toku Moses begi en fu go na ini a kondre Kanan. Moses ben taki: „Grantangi, meki mi abra Yordan-liba fu si a bun kondre di de na abrasei.” Wan pisi ten na fesi, Gado ben taigi Moses kaba taki a no ben o go na ini a kondre dati, fu di Moses ben du wan sondu. Dati meki Yehovah no du san Moses aksi en. Na presi fu dati a taigi en: „A nofo! Noiti moro yu musu taki a tori disi nanga mi.”​—Deuteronomium 3:25, 26; 32:51.

Na apostel Paulus ben begi Gado fu puru wan problema gi en di a ben kari ’wan maka na ini en skin’ (2 Korentesma 12:7). Kande a „maka” disi ben de wan seryusu siki na en ai, noso a muilek di gensman nanga „falsi brada” ben e muilek en (2 Korentesma 11:26; Galasiasma 4:14, 15). Paulus ben skrifi: „Mi begi Masra dri leisi fu puru a maka na ini mi skin.” Ma Gado ben sabi taki efu Paulus ben tan preiki go doro aladi ’a maka na ini en skin’ ben e muilek en, dan a ben o de krin fu si taki Gado abi furu krakti èn taki Paulus ben e frutrow na En tapu trutru. Sobun, na presi fu du san Paulus aksi, Gado taigi en: „A krakti fu mi e kon volmaakti te yu swaki.”​—2 Korentesma 12:8, 9.

Iya, Gado sabi moro wi efu den sani di wi aksi en bun gi wi, noso efu den no bun gi wi. Bijbel e sori taki ala ten Yehovah o gi wi sani di bun gi wi, fu di a lobi wi.