Yu ben sabi a sani disi?

Pontius Pilatus ben musu frede Caesar?

Fu di den Dyu fesiman ben wani dwengi a Rome tiriman Pontius Pilatus fu kiri Yesus, meki den ben taigi en: „Efu yu lusu a man disi, dan yu a no wan mati fu Caesar” (Yohanes 19:12). A „Caesar” di kari dyaso, ben de Kèiser Tiberius fu Rome. Fu san ede Pilatus ben musu frede a Caesar disi?

Fa Tiberius Caesar ben de? Furu yari bifo Yesus go na fesi krutu, Tiberius ben kon de „wan man di ben e du san a firi èn na wan morsu fasi a ben plisi den sekslostu fu en”, na so wan buku e taki (The New Encyclopædia Britannica). Fu di nofo tron a no ben e frutrow sma, meki a ben e pina èn kiri iniwan sma, te a ben denki taki a sma dati ben de teige en. A srefi buku dati e taki tu: „Efu wi musu bribi den sani di den historia skrifiman fu a ten dati e taki, dan Tiberius ben lobi ogri-ati sani èn morsu seks tori. A ben e kiri sma na wan ogri-ati fasi, a ben e kiri suma a wani èn o ten a wani.”

Fu di Tiberius ben abi so wan nen, meki a ben kan de so taki Pilatus teki a bosroiti fu du san den Dyu fesiman taki. Fu dati ede, Pilatus gi a komando fu kiri Yesus.​—Yohanes 19:13-16.

Fu san ede Yesus ben wasi den futu fu den apostel fu en?

Na ini Israel fu owruten, furu sma ben e waka sosofutu te den ben e du den aladei sani. Den sma di ben e weri susu, ben e weri opo-susu di den ben tai na den aifutu. Fu di sma ben waka na tapu santi pasi di ben abi tokotoko son leisi èn fu di den ben waka na ini den gron, meki den futu fu den ben kon doti.

Fu dati ede, sma ben abi a gwenti fu puru den susu te den ben go na ini wan oso. Te wan sma ben wani sori switifasi gi wan fisitiman, dan a ben wasi den futu fu a fisitiman. A sma fu na oso noso wan futuboi ben e du a sani disi. Bijbel e taki furu leisi fu a gwenti disi di sma ben abi. Fu eksempre, Abraham ben taigi den sma di ben kon luku en na ini en tenti: „Meki mi seni teki pikinso watra fu wasi un futu. Dan unu kan go rostu na ondro a bon. Meki mi teki wan pisi brede gi unu, so taki unu kan nyan dati fu kisi krakti baka.”​—Genesis 18:4, 5; 24:32; 1 Samuel 25:41; Lukas 7:37, 38, 44.

Te wi sabi a sani disi, dan wi e kon frustan fu san ede Yesus ben wasi den futu fu en disipel di a ben de nanga den na a lasti Paskafesa fu en. Na a okasi dati, wan ososma noso wan futuboi no ben de fu du a sani disi. Soleki fa a sori, dan nowan fu den disipel ben klariklari fu du dati. Sobun, di Yesus teki wan beki watra nanga wan duku fu wasi èn fu drei den futu fu den apostel fu en, dan na so a leri den fu sori lobi nanga sakafasi.​—Yohanes 13:5-17.