SOLEKI fa John nanga Carol taki, dan a fasi fa wan sma kweki abi bun furu krakti tapu a fasi fa a e gi en eigi pikin trangaleri. Te wan masra nanga wan wefi kweki na difrenti fasi, dan nofo tron den e gi den pikin trangaleri na difrenti fasi. Son leisi, a sani disi kan tyari problema kon na ini a trowlibi.

Den problema kan kon moro bigi, te papa nanga mama weri srefisrefi. Wan trowpaar di kisi den fosi pikin, e kon si heri esi taki a gi di den musu gi den pikin leri, e teki ala den ten. Joan nanga en masra Darren, kweki tu umapikin, èn a e taki: „Mi lobi den meisje fu mi, ma nofo tron den meisje no ben wani go sribi te mi ben taigi den. Den ben e wiki na a yuru te den ben musu sribi. Den ben e koti mi mofo te mi ben e taki nanga den. Den ben e libi den susu, krosi, nanga den  preisani na dorosei, èn noiti den ben e poti a botro baka na ini na ijskasi.”

Jack en wefi ben brokosaka srefisrefi, baka di a kisi a di fu tu pikin fu en. Jack e taki: „Nofo tron te mi ben komoto na wroko kon na oso, mi ben weri srefisrefi, èn mi ben de na ai pikinmoro heri neti nanga a beibi fu wi. Disi ben meki taki wi no ben e gi a moro owru umapikin fu wi trangaleri te dati ben de fanowdu. A ben e dyarusu fu di wi ben poti prakseri tu na en pikin sisa.”

Te papa nanga mama weri èn den e haritaki nanga makandra fu a fasi fa den musu gi den pikin leri, dan wan pikin trobi kan tron wan bigi sani. Te den no e lusu a trobi, dan dati kan meki taki den no e agri moro nanga makandra. Na so fasi, te den pikin wani wan sani, dan den sabi efu den musu go na den papa noso efu den musu go na den mama, fu kisi san den wani. Sortu Bijbel gronprakseri sa yepi wan trowpaar fu abi wan krosibei matifasi nanga makandra na ini a trowlibi, aladi den e kweki den pikin na wan bun fasi?

Gado wani taki tu sma musu trow bifo den meki pikin, èn fu tan makandra srefi te den pikin komoto na ini oso kaba. Te a abi fu du nanga a trowlibi, dan Bijbel e taki: „Nowan sma musu prati san Gado poti na ondro wán tyatyari” (Mateyus 19:6). Na a tra sei, a srefi kapitel disi e sori taki Gado wani taki wan pikin „gowe libi en papa nanga mama” te fu kaba (Mateyus 19:5). Sobun, fu kweki pikin, a no a moro prenspari sani di e meki taki wan trowpaar tan makandra. A no de fu taki dati papa nanga mama e teki den ten fu gi den pikin leri, ma den musu hori na prakseri a moro bun fasi fa den kan du dati, na te den abi wan bun matifasi nanga makandra na ini trowlibi.

San na wan fasi fa trowpaar kan sorgu taki den tan abi wan bun matifasi nanga makandra na a ten te den pikin e gro kon bigi? Efu a kan, poti wan spesrutu ten doronomo, fu de makandra nanga yu trowpatna sondro taki den pikin de drape. Te yu o du dati, dan yu o abi na okasi fu taki fu prenspari sani di abi fu du nanga na osofamiri, èn yu o abi ten fu de nanga makandra. A no de fu taki dati a no makriki fu feni ten fu de nanga makandra leki trowpaar. Alison, a mama di wi ben taki fu en kaba, e taki: „Leti na a momenti te a gersi leki mi nanga mi masra kan de pikinso nanga makandra, a moro yongu meisje fu wi e du sani fu wi poti prakseri na en. Noso a meisje fu wi di abi siksi yari, e du leki wan bigi problema de, fu di a no man feni en kreiti.”

Joan nanga Darren, di wi ben taki fu den na fesi, ben poti wan yuru te den meisje fu den ben musu go sribi, èn na so den ben man abi ten gi makandra. Joan e taki: „Wi ben poti wan spesrutu yuru gi den meisje fu wi fu de na bedi, èn wi ben e sorgu taki den hori densrefi na dati ala ten. Na so mi nanga Darren ben abi ten fu rostu pikinso èn fu taki nanga makandra.”

Te wan trowpaar e poti wan yuru gi a pikin fu go sribi èn te den e meki dati tron wan gwenti, dan na so den kan abi ten gi makandra èn den kan yepi a pikin fu frustan taki a no musu ’denki moro fu ensrefi leki san de fanowdu’ (Romesma 12:3). Te fu kaba, te den pikin leri fu hori densrefi na a yuru te den musu go sribi, dan den o frustan taki den de prenspari na ini na osofamiri, ma taki den no de a moro prenspari pisi fu na osofamiri. Den musu frustan taki den musu hori densrefi na den wet fu na osofamiri na presi fu fruwakti taki na osofamiri o du san den wani.

„Arki, mi manpikin, a trangaleri fu yu papa, èn no gowe libi a wet fu yu mama”, na so wan moi odo e taki (Odo 1:8). A Bijbeltekst disi e sori taki a papa èn sosrefi a mama abi a reti fu poti wèt gi den pikin. Ma srefi efu papa nanga mama kweki na a srefi fasi, toku a kan de so taki den no e agri nanga makandra te a abi fu du nanga a fasi fa den e gi den pikin trangaleri èn nanga den wèt di den o poti gi na osofamiri na ini wan spesrutu situwâsi. San papa nanga mama kan du na ini a situwâsi disi?

John, di wi ben taki fu en na fesi, e taki: „Mi e feni taki a de prenspari fu no sori den pikin taki wi no e agri nanga makandra.” Ma a e feni en muilek fu du dati. John e taki: „Pikin kan si wan sani esi-esi. Srefi efu wi no taki dati wi no e agri nanga makandra, toku na umapikin fu wi kan si na a fasi fa wi e handri taki wi no e agri nanga makandra.”

Fa John nanga Alison e handri na ini a situwâsi disi? Alison e taki: „Efu mi no e agri nanga a fasi fa mi masra strafu na umapikin fu wi, dan mi e wakti teleki a meisje fu wi no de na ini a birti pe a kan yere san wi e taki. Dan fosi mi e taigi mi masra fa mi e denki. Mi no wani a meisje fu wi denki taki a kan du san a wani sondro fu kisi strafu, fu di wi no e agri nanga a fasi fa wi musu gi trangaleri. Efu a meisje fu wi e si taki wi no e agri nanga makandra, dan mi e taigi en taki ibri memre fu na osofamiri musu saka ensrefi na ondro na ede fu na osofamiri, soleki fa Yehovah seti dati. Mi e taigi en tu taki mi de klariklari fu saka misrefi na ondro en papa, neleki fa en musu saka ensrefi na ondro wi, leki papa nanga mama” (1 Korentesma 11:3; Efeisesma 6:1-3). John e taki: „Te wi de makandra leki osofamiri, dan nofo tron na mi e gi den umapikin fu wi trangaleri. Ma efu Alison sabi moro fu a tori, dan mi e meki en gi den trangaleri èn mi e horibaka gi en tu. Efu mi no e agri nanga en fu wan sani, dan mi e taki nanga en bakaten.”

Fa yu kan sorgu taki yu nanga yu trowpatna no e atibron nanga makandra fu di unu no e agri nanga a fasi fa unu gi un pikin trangaleri? Fa yu kan sorgu taki yu pikin no e lasi lespeki gi yu, fu di a e si taki unu no e agri nanga makandra?

A no de fu taki dati yu musu du tranga muiti fu gi yu pikin leri. Son leisi a kan gersi leki yu e gebroiki ala yu krakti fu du dati. Ma te fu kaba, yu pikin o komoto na ini na oso, èn yu nanga yu trowpatna o de unu wawan baka. A matifasi di yu abi na ini a trowlibi kon moro bun fu di unu kweki un pikin? A piki tapu na aksi disi, abi fu du nanga a fasi fa yu e fiti a rai di skrifi na ini Preikiman 4:9, 10. Drape skrifi: „Tu moro bun leki wán, bika den abi wan bun paiman gi a tranga wroko fu den. Bika efu wan fu den ben sa fadon, dan a trawan kan opo en patna.”

Te papa nanga mama e wroko makandra, dan den kan abi bun bakapisi. Carol, di wi ben taki fu en kaba, e taki fa a e denki fu a sani disi: „Mi ben sabi taki mi masra abi furu bun fasi, ma di wi kweki wi pikin makandra, mi kon si taki a abi furu tra bun fasi tu. Mi kon kisi moro lespeki nanga lobi gi en, fu di mi si fa a sorgu gi den meisje fu wi na wan lobi-ati fasi.” John e taki disi fu Alison: „Mi kon si fa mi wefi kon tron wan lobi-ati mama, èn disi meki taki mi kon kisi moro lobi nanga lespeki gi en.”

Te yu e poti ten fu de nanga yu trowpatna èn te yu e wroko makandra nanga en fu kweki un pikin, dan yu sa abi wan moro bun matifasi nanga yu trowpatna aladi un pikin e gro kon bigi. Disi na wan heri moi eksempre gi yu pikin, a no so?