Wi no musu frede libisma ma wi musu abi frede gi Gado

A YONKUMAN ben fruwondru, fu di didyonsro wan sani pasa di a no ben fruwakti srefisrefi. A leri wan nyun sani di a ben abi wan takimakandra nanga tu Kotoigi fu Yehovah. Furu yari langa a ben e aksi ensrefi fu san ede Gado e gi pasi taki sma e pina. Ma now a kisi wan krin piki fu Bijbel. A no ben sabi taki Bijbel abi so furu prenspari tori na ini, di kan naki sma ati.

Wan tu miniti baka di den fisitiman gowe, na uma di ben yuru a kamra gi en, kon esi-esi na ini a kamra èn nanga atibron a aksi en: „Suma na den sma dati?”

Fu di a yonkuman ben skreki, meki a no ben man piki na uma.

Na uma bari: „Mi sabi suma na den sma dati, èn efu yu meki den kon dyaso baka, yu kan froisi gowe èn suku wan kamra na wan tra presi!”

A naki a doro tapu, èn a gowe.

Den tru bakaman fu Krestes e fruwakti fu kisi gens

A sani disi di miti a yonkuman, na wan sani di e pasa furu tron. Gado Wortu, Bijbel, e taki: „Ala den wan di wani dini Gado na wan getrow fasi èn di de wán nanga Krestes Yesus, sa kisi frufolgu tu” (2 Timoteyus 3:12). Sensi ten, a de so taki sma no lobi tru Kresten. Fu san ede? Na apostel Yohanes ben taigi tra Kresten: „Wi sabi taki wi kon fu Gado, ma heri grontapu de na ini a makti fu na ogriwan.” Bijbel e taki tu dati Satan de leki „wan lew di e bari, fu di a e suku fu  swari wan sma” (1 Yohanes 5:19; 1 Petrus 5:8). Wan fu den moro prenspari fasi fa Satan e kisi sma, na a frede di den e frede trawan.

Sma ben spotu èn frufolgu Yesus Krestes srefi, di ben du someni bun sani èn di no ben du sondu. A ben taki: „Den ben teige mi aladi mi no du noti” (Yohanes 15:25). Tapu a neti bifo Yesus dede, a taigi den bakaman fu en san den ben kan fruwakti: „Efu grontapu e teige unu, dan sabi taki den ben teige mi bifo den ben teige unu. Prakseri den sani di mi ben taigi unu: Wan srafu no bigi moro en masra. Efu den frufolgu mi, dan den o frufolgu unu tu.”—Yohanes 15:18, 20.

A warskow dati di Yesus ben gi, meki taki furu sma ben draidrai fu teki a tru bribi. Wan leisi, wan tu sma ben e suku Yesus, èn Bijbel e taki disi fu den: „Nowan sma ben taki fu en na so wan fasi taki tra sma ben kan yere den, fu di den ben frede den Dyu” (Yohanes 7:13; 12:42). Den kerki fesiman fu a ten dati ben taki dati ala sma di e poti bribi na ini Krestes, den ben o yagi puru na ini a snoga. Sobun, furu sma no ben tron Kresten fu di den ben frede libisma.—Tori fu den Apostel 5:13.

Bakaten, di a Kresten gemeente ben seti, wi e leisi taki „sma bigin frufolgu” a gemeente na ini Yerusalem fayafaya (Tori fu den Apostel 8:1). Fu taki en leti, na ini a heri Gran Kownukondre fu Rome, Kresten ben kisi frufolgu. Prenspari man na ini Rome, ben taigi na apostel Paulus: „Wi sabi trutru taki na ala presi sma e taki takru fu den sma disi di e kon nanga wan tra leri” (Tori fu den Apostel 28:22). Iya, tru Kresten na ala sei ben e kisi gens.

Na ini a ten disi srefi, a frede gi libisma, na wan sani di Satan e gebroiki fu tapu sma fu tron tru bakaman fu Krestes. Reti-ati sma di e studeri Bijbel nanga Yehovah Kotoigi, e kisi gens noso sma e spotu den na skoro, na wrokope, na ini a birti èn te den de nanga den mati. Kande den e frede taki sma no o lespeki den moro, taki den o lasi den mati, noso taki sma no o sorgu gi den moro. Na ini son boiti kontren, gronman e frede kande taki den birtisma fu den o weigri fu yepi den koti a nyanyan di den prani, noso taki den no o yepi fu luku den meti fu den. Ma aladi sma kan frede taki den sani dati pasa, toku neleki Yesus Krestes, milyunmilyun sma bosroiti fu frutrow tapu Gado, èn fu libi soleki fa Gado Wortu e taki. Yehovah blesi den fu di den du dati.

Fu san ede wi musu abi frede gi Gado, na presi fu frede libisma?

Bijbel e gi wi a deki-ati fu abi frede gi Gado, na presi fu frede libisma. Bijbel e taki: „A frede gi Yehovah na a bigin fu koni” (Psalm 111:10). Disi no wani taki dati wi o frede taki Gado o du wan sani nanga wi, ma a wani taki dati wi no o du sani di no e plisi a Sma di gi wi libi. Wi abi a frede disi gi Gado, fu di wi lobi en. Ma fu san ede wi musu abi frede gi Gado, na presi fu frede libisma? Meki wi go luku feifi reide fu san ede wi musu du dati.

1 Yehovah na a Almaktiwan. Yehovah abi makti moro leki iniwan libisma. Te wi abi frede gi Gado, dan wi e sori taki wi e anbegi na Almaktiwan, di e si ’den pipel leki wan dropu na ini wan embre’ (Yesaya 40:15). Fu di Gado na a Almaktiwan, meki a abi a makti fu broko iniwan „fetisani di den sa meki fu feti nanga” den sma di e tan dini en (Yesaya 54:17). Fu di na en e bosroiti suma warti fu kisi têgo libi, meki a de wan koni sani taki wi no e gi pasi fu sani tapu wi fu leri sabi en, èn fu du en wani.—Openbaring 14:6, 7.

2 Gado sa yepi èn kibri wi. „A frede gi libisma, na dati e seti wan trapu, ma a sma di e frutrow tapu Yehovah, sa kisi kibri”, na so Bijbel e taki na ini Odo 29:25. A frede gi libisma, na wan trapu fu di a kan tapu wi fu fruteri trawan taki wi e bribi na ini Gado. Gado e gi wi a dyaranti taki a man yepi wi. A e taki: „No frede, bika mi de nanga yu. No luku lontu, bika mi na yu Gado. Mi o tranga yu. Mi sa yepi yu trutru. Mi sa hori yu steifi trutru nanga mi reti-anu fu regtfardikifasi.”—Yesaya 41:10.

3 Gado lobi den sma di e kon krosibei na en. Na apostel Paulus ben skrifi den moi wortu disi: „Mi de seiker taki noti no sa man puru wi fu a lobi fu Gado; dede  no sa man du dati, èn libi no sa man du dati; nowan engel, nowan tirimakti, èn nowan sani fu a ten disi, noso fu a ten di musu kon ete, nowan krakti, nowan sani di hei, noso wan sani di dipi, èn nowan enkri tra sani di Gado meki, sa man puru wi fu a lobi fu Gado, iya, a lobi di de na ini Krestes Yesus, wi Masra” (Romesma 8:37-39). Te wi leri fu frutrow tapu Gado èn fu gi yesi na en, dan a Sma di abi a reti fu tiri hemel nanga grontapu, sa lobi wi. Disi na trutru wan bigi grani!

4 Wi abi warderi gi ala sani di Gado du gi wi. Yehovah na wi Mekiman, a sma di meki taki libi de. Boiti taki a gi wi den sani di wi abi fanowdu fu tan na libi, a gi wi sosrefi den sani di e meki a libi moro switi. Iya, en na trutru a Sma di e gi ibri bun kado (Yakobus 1:17). David, wan man di ben tan dini Gado èn di ben abi warderi gi a bun-ati fu Gado, ben taki: „Yu, o Yehovah mi Gado, du furu sani, yusrefi du furu wondruwroko gi wi, èn yu e prakseri wi . . . Den kon de so furu, taki mi no man fruteri fu den ala.”—Psalm 40:5.

5 Son sma di e gens wi kan kenki. Te yu e tan gi Gado grani, èn te yu e sori taki yu lobi en, dan den sma di e gens yu sa si taki noti no man tapu yu fu dini Gado. Luku na eksempre fu den famiriman fu Yesus. Na a bigin, den no ben poti bribi na ini en, ma den ben taki dati „a lasi en frustan” (Markus 3:21; Yohanes 7:5). Baka di Yesus dede, èn di a kisi wan opobaka, furu fu den famiriman fu en tron bribiman. Yakobus nanga Yudas, den afubrada fu Yesus, ben skrifi wan tu pisi fu Bijbel srefi. Yu ben abi sosrefi Saulus di ben e frufolgu den Kresten fayafaya, èn di tron na apostel Paulus bakaten. Kande son sma di e gens wi now, o si taki wi abi a tru leri fu Bijbel, fu di wi abi deki-ati fu tanapu kánkan.—1 Timoteyus 1:13.

Luku fu eksempre Aberash, wan uma fu Afrika, di ben begi fu kon sabi den tru tori di abi fu du nanga Gado. Baka di a bigin studeri Bijbel nanga Yehovah Kotoigi, a kisi hebi gens fu famiriman nanga kerki fesiman. Sonwan fu den famiriman fu en di ben bigin studeri Bijbel tu, ben tapu nanga a studie, fu di den ben frede sma. Ma Aberash begi Gado fu gi en krakti nanga deki-ati, èn bakaten a teki dopu leki wan Kotoigi fu Yehovah. San ben de a bakapisi? Aiti famiriman fu en kisi deki-ati fu na eksempre fu en, den bigin studeri Bijbel baka, èn den e go na fesi now.

Yu kan sorgu taki a frede gi libisma no e tapu yu fu dini Gado

Efu yu no wani frede libisma, dan yu musu meki a lobi di yu abi gi Gado kon moro tranga. Yu kan du disi te yu e studeri Bijbel èn te yu e denki dipi fu tekst soleki Hebrewsma 13:6, di e taki: „Yehovah na mi yepiman; mi no sa frede. San libisma kan du mi?” Yu no musu frigiti fu san ede a de wan bun èn koni sani fu frede Gado na presi fu libisma.

Hori na prakseri tu taki yu o kisi furu blesi te yu e du san yu leri fu Bijbel. Yu kan kisi bun piki tapu prenspari aksi di abi fu du nanga a libi. Yu kan kon sabi san yu musu du na ini muilek situwâsi. Yu kan abi wan moi howpu, aladi a situwâsi na grontapu muilek srefisrefi. Èn yu kan begi na almakti Gado na iniwan momenti.

Na apostel Yohanes ben skrifi: „Grontapu e pasa gowe nanga den lostu fu en, ma a sma di e du a wani fu Gado sa tan fu têgo” (1 Yohanes 2:17). Now na a ten fu tanapu kánkan èn fu frede Gado. Na presi fu meki a frede gi libisma swaki yu bribi, yu kan du a sani disi di Gado e gi wi deki-ati fu du: „Sori taki yu koni, mi manpikin, èn meki mi ati prisiri, so taki mi kan gi wan piki na a sma di e spotu mi” (Odo 27:11). Dati na wan tumusi bigi grani!

Hori na prakseri taki nowan libisma kan gi yu san Gado o gi den sma di e frede en. „Te wan sma abi sakafasi nanga frede gi Yehovah, dan a o kisi gudu, glori nanga libi.”—Odo 22:4.

[Prenki na tapu bladzijde 24]

Fu di Aberash ben abi deki-ati, meki aiti famiriman fu en e go doro nanga a Bijbelstudie fu den