2 Kon kisi soifri sabi fu Gado

„Efu sma wani kisi têgo libi, dan den musu tan leri sabi yu, a wan-enkri tru Gado.”​—Yohanes 17:3.

FU SAN EDE SMA E FENI EN MUILEK? Son sma e taki dati Gado no de. Trawan e taki dati en a no wan sma, ma wan bigi krakti. Den sma di e bribi taki Gado na wan trutru sma, e leri trawan difrenti sani di no e kruderi nanga makandra, te a abi fu du nanga suma a de èn sortu fasi a abi.

SAN YU KAN DU? Wán fasi fa yu kan kon sabi Gado, na fu luku den sani di a meki. Na apostel Paulus ben taki: „A de krin fu frustan san na den eigifasi fu Gado di sma no man si nanga den ai, bika den eigifasi fu en de fu si na den sani di a meki, iya, den sani disi e sori taki a abi têgo krakti èn taki en na Gado” (Romesma 1:20). Te yu e luku den sani na grontapu èn na hemel, dan yu kan leri furu fu a koni nanga a krakti fu wi Mekiman.​—Psalm 104:24; Yesaya 40:26.

 Ma fu man kon sabi soifri sortu fasi Gado abi, dan ibri sma musu studeri Gado Wortu, Bijbel. No gi pasi taki tra sma e meki yu denki leki fa den wani. Na presi fu dati, teki a rai disi fu Bijbel: „No libi moro leki fa a grontapu sistema disi wani taki un musu libi, ma un musu kenki fu di unu e teki wan nyun fasi fu denki, so taki unu kan kon sabi san na Gado en wani di bun, di e plisi en èn di de volmaakti” (Romesma 12:2). Fu eksempre, luku den sani di Bijbel e tyari kon na krin fu Gado.

Gado abi wan nen. Na ini a bigin, a nen fu Gado ben skrifi dusundusun leisi na ini Bijbel. Na ini furu bijbelvertaling a nen disi skrifi na ini Psalm 83:18. „So dati libisoema sa sabi dati Joe, disi Joe nem wawan de JEHOVAH, de da Moro Hei Wan abra heri grontapoe.”​—Psalm 83:19, Da Bijbel na ini Sranantongo.

Yehovah Gado abi firi, èn den sani di libisma e du abi krakti tapu den firi fu en. Baka di Yehovah puru a pipel Israel na ini katibo na Egepte, dan furu tron den no ben e gi yesi na den koni rai fu En. Fu di den ben opo densrefi teige en, meki den ben „hati” en. Den sani di den ben e du ben meki „a Santawan fu Israel firi sari”.​—Psalm 78:40, 41.

Yehovah e sorgu gi ibriwan fu wi. Yesus ben taigi den disipel fu en: „A no de so, taki sma e seri tu pikin fowru gi wan sensi di no warti furu? Ma toku nowan fu den fowru sa fadon na gron sondro fu un Tata sabi. Ma a Tata teri srefi ala den wiwiri na tapu un ede. Fu dati ede no frede: un warti moro leki wan heri ipi pikin fowru.”​—Mateyus 10:29-31.

Gado no lobi a wan ras noso pipel moro a trawan. Na apostel Paulus ben taigi den Grikisma na ini Ateine taki „fu wán sma nomo [Gado] meki ala tra sma fu libi na heri grontapu”. A taki tu dati Gado „no de fara fu nowan fu wi” (Tori fu den Apostel 17:26, 27). Na apostel Petrus ben taki: „Gado no lobi a wan sma moro a trawan, ma awansi fu sortu kondre wan sma de, efu a e du san de regtfardiki èn a e frede Gado, dan Gado feni a sma dati bun.”​—Tori fu den Apostel 10:34, 35.

SORTU WINI YU O KISI? Son sma „de fayafaya fu dini Gado, ma den no abi soifri sabi” (Romesma 10:2). Te yu sabi san Bijbel e leri trutru fu Gado, dan yu no o meki sma kori yu èn yu o man „kon krosibei na Gado”.​—Yakobus 4:8.

Efu yu wani sabi moro, dan luku kapitel 1, di nen „Suma na Gado trutru?”, na ini a buku San Bijbel e leri wi trutru? *

[Futuwortu]

[Prenki na tapu bladzijde 6]

Wán fasi fa yu kan kon sabi Gado, na fu luku den sani di a meki