3 Leri sabi suma na Yesus trutru

„Bika Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.” ​—Yohanes 3:16.

FU SAN EDE SMA E FENI EN MUILEK? Son sma ben o wani meki yu bribi taki Yesus no ben de wan trutru sma. Trawan e agri taki Yesus ben libi trutru, ma den e taki dati a no ben de wan prenspari man èn taki a dede langa ten kaba.

SAN YU KAN DU? Teki na eksempre fu a disipel Natanael. * En mati Filipus ben taigi en taki a denki taki a feni a Mesias, „Yesus, a manpikin fu Yosef fu Nasaret”. Ma Natanael no ben bribi Filipus wantronso. Fu taki en leti, a taigi en: „Wan bun sani kan komopo fu Nasaret?” Toku Natanael teki a kari fu Filipus èn a go „luku” fu ensrefi si (Yohanes 1:43-51). Yu sosrefi sa kisi wini te yu e ondrosuku den buweisi di abi fu du nanga Yesus. San yu kan du?

Ondrosuku den owruten buweisi di e sori taki Yesus ben de wan trutru sma. Josephus nanga Tacitus, ben de tu lespeki historia skrifiman, di ben e libi na ini a fosi yarihondro èn di no ben de Kresten. Den e taki dati Yesus Krestes ben de wan sma di ben libi trutru. Tacitus ben skrifi fa Nero, a Kèiser fu Rome, ben taki dati na den Kresten ben bron Rome na ini a yari 64. Tacitus ben skrifi: „Nero ben feni taki na a grupu di sma ben e kari Kresten ben bron a foto. Den Romesma ben e teige den, fu di den ben hori densrefi na Kresten gwenti, èn fu dati ede den ben pina den na wan ogri-ati fasi. A nen fu a grupu disi teki puru fu Krestes, wan man di ben kisi a moro hebi strafu fu wan fu den granman fu wi, Pontius Pilatus, na a ten di Tiberius ben e tiri.”

Te a abi fu du nanga den sani di den historia skrifiman fu a fosi yarihondro nanga a di fu tu yarihondro ben taki fu Yesus èn fu den fosi Kresten, dan wan buku e taki: „Ala den difrenti tori disi e sori krin taki srefi den feanti fu a Kresten bribi no ben e tweifri taki Yesus ben libi trutru. A pisi ten di sma bigin tweifri na dati, ben de na a kaba fu a di fu 18 yarihondro, na a di fu 19 yarihondro, èn na a bigin fu a di fu 20 yarihondro. Den bigin tweifri sondro taki dati ben de fanowdu” (Encyclopædia Britannica, 2002 Edition). Na ini 2002 wan tijdschrift ben taki: „Furu sabiman, boiti den wan di no e bribi na ini Gado, e bribi taki Yesus fu Nasaret ben libi trutru.”

Luku den buweisi di e sori taki Yesus ben kisi wan opobaka. Di den feanti fu Yesus grabu en, dan den moro bun mati fu en gowe libi en, èn en mati Petrus ben taki dati a no sabi en, fu di a ben frede (Mateyus 26:55, 56, 69-75). Baka di  den grabu Yesus, den bakaman fu en ben panya go na ala sei (Mateyus 26:31). Baka dati, den disipel fu en kon de fayafaya baka. Petrus nanga Yohanes ben opo taki na fesi den srefi man di ben meki taki Yesus dede. Den disipel fu Yesus ben kon kisi so furu deki-ati, taki den ben panya den leri fu Yesus na ini a heri Gran Kownukondre Rome. Den disipel ben de klariklari fu dede, na presi fu drai baka gi a bribi fu den.

San ben meki taki den kenki so? Na apostel Paulus ben taki dati Yesus ben opo baka fu dede èn taki „a sori ensrefi na Seifas [Petrus], èn baka dati na den twarfu apostel”. Paulus e taki moro fara: „Baka dati a sori ensrefi na moro leki feifi hondro brada na a srefi ten.” Furu fu den sma di ben si Yesus baka di a opo baka, ben de na libi ete di Paulus ben skrifi den wortu dati (1 Korentesma 15:3-7). Efu na wán, noso tu sma nomo ben si Yesus baka di a opo baka, dan a ben o makriki gi den sma di no e bribi den tori dati, fu taki dati Yesus no kisi wan opobaka (Lukas 24:1-11). Ma fu di moro leki 500 sma ben si Yesus baka di a kisi wan opobaka, meki dati e sori krin taki Yesus ben opo baka fu dede.

SORTU WINI YU O KISI? Den sma di e bribi na ini Yesus, èn di e gi yesi na en, kan kisi pardon gi den sondu èn den kan abi wan krin konsensi (Markus 2:5-12; 1 Timoteyus 1:19; 1 Petrus 3:16-22). Efu den dede, Yesus pramisi fu opo den baka „na a lasti dei”.​—Yohanes 6:40.

Efu yu wani sabi moro, dan luku kapitel 4, di nen „Suma na Yesus Krestes?”, nanga kapitel 5, di nen „A lusu-paiman—A moro warti kado di Gado gi wi”, na ini a buku San Bijbel e leri wi trutru? *

[Futuwortu]

[Prenki na tapu bladzijde 7]

Neleki Natanael, yu musu ondrosuku den buweisi taki Yesus ben libi trutru