4 No tweifri moro

„Yu no e bribi nofo. Fu san ede yu bigin tweifri?”​—Mateyus 14:31.

FU SAN EDE SMA E FENI EN MUILEK? Srefi den disipel fu Yesus ben e tweifri son leisi (Mateyus 14:30; Lukas 24:36-39; Yohanes 20:24, 25). Fu taki en leti, te wi no abi nofo bribi, dan Bijbel e kari dati „a sondu di kan kisi wi makriki” (Hebrewsma 12:1). Na apostel Paulus ben skrifi: „A no ala sma e bribi” (2 Tesalonikasma 3:2). A no de so taki son sma no man abi bribi. Na presi fu dati, furu sma no e du muiti fu kon abi bribi. Gado sa blesi den sma di e du muiti fu kon abi bribi.

SAN YU KAN DU? Kon sabi san e meki yu tweifri. Fu eksempre, a disipel Tomas ben tweifri taki Yesus ben opo baka, aladi den tra disipel ben taki dati den ben si en. Tomas ben wani abi buweisi. San ben de a bakapisi? Yesus ben gi en a buweisi di a ben abi fanowdu  fu abi wan tranga bribi.​—Yohanes 20:24-29.

Nanga yepi fu Bijbel, Yehovah Gado e gi wi den piki di wi abi fanowdu so taki wi no e tweifri moro. Fu eksempre, furu sma e lasi bribi na ini Gado, fu di den e taki dati na en e meki taki feti, ogridu, nanga pina de. San Bijbel e taki fu a sani disi?

Gado no e tiri nanga yepi fu libisma tirimakti. Yesus ben kari a yeye di nen Satan, „a tiriman fu grontapu” (Yohanes 14:30). Satan ben wani gi Yesus a makti fu tiri ala den kownukondre fu grontapu efu Yesus ben o anbegi en wán leisi nomo. Satan ben taki: „Mi o gi yu a makti fu tiri ala den sani disi èn mi o gi yu a glori fu den tu, bika na mi kisi a makti, èn mi e gi en na suma mi wani.” Yesus no ben taki dati Satan no ben abi a makti dati. Na presi fu dati, Yesus ben taki: „Gado Buku taki: ’Na Yehovah yu Gado, yu musu anbegi èn na en wawan yu musu dini’” (Lukas 4:5-8). A no Gado meki taki so furu pina de na grontapu, ma na Satan nanga den libisma tirimakti.​—Openbaring 12:9, 12.

Heri esi Yehovah Gado o puru ala den sani di e meki taki libisma e pina. A seti wan Kownukondre kaba, noso wan tirimakti, pe en Manpikin, Krestes Yesus o tiri libisma (Mateyus 6:9, 10; 1 Korentesma 15:20-28). Leki kontru fu Bijbel profeititori, a bun nyunsu fu a Kownukondre disi, e preiki now na heri grontapu (Mateyus 24:14). Heri esi a Kownukondre disi sa puru ala den sma di e gens en, èn a sa pori ala den sani di e meki taki libisma e pina.​—Danièl 2:44; Mateyus 25:31-33, 46; Openbaring 21:3, 4.

SORTU WINI YU O KISI? Den sma di e tweifri, de neleki skwala di ’winti e naki go na ala sei èn di sma e bedrigi nanga ala sortu leri’ (Efeisesma 4:14; 2 Petrus 2:1). Tra fasi leki den sma dati, den wan di e kisi bun piki tapu den aksi di den abi, man „tanapu kánkan na ini a bribi”.​—1 Korentesma 16:13.

Yehovah Kotoigi, den sma di tyari a tijdschrift disi kon na doro, wani yepi yu fu kisi piki tapu aksi di e meki taki yu e tweifri. Den e gi yu a kari fu kon makandra nanga den èn fu ondrosuku den sani di den e leri. Te yu o du dati, dan yu o kisi wan moro tranga bribi na ini Gado.

Efu yu wani sabi moro, dan luku kapitel 8, di nen „San na a Kownukondre fu Gado?”, nanga kapitel 11, di nen „Fu san ede Gado e gi pasi taki libisma e pina?”, na ini a buku San Bijbel e leri wi trutru? *

[Futuwortu]

[Prenki na tapu bladzijde 9]

Den wan di e kisi bun piki tapu den aksi fu den, abi krin buweisi fu abi bribi