Leisiman e aksi

Na Gado e strafu wi te wi abi problema?

Wan sari sani pasa na ini yu libi, di meki taki yu aksi yusrefi efu Gado wani taki yu e nyan pina? Kande yu kon siki, kande wan bigi ongoloku pasa, noso wan sma na ini yu famiri dede fruku. Te den sortu sani dati pasa, dan kande wi e firi leki na Gado e strafu wi spesrutu.

Tra fasi leki dati, yu musu kisi trowstu fu a prakseri taki Gado wani taki sma de koloku èn taki ogri no miti den. Disi de fu si te wi e luku san ben pasa di Gado meki den fosi libisma. A ben poti den na ini „a dyari fu Eden”, wan moi dyari di de leki wan paradijs, pe den ben o libi sondro wan problema.​—Genesis 2:15.

A de wan sari sani taki a fosi libisma trowpaar bosroiti fu no teki a tumusi moi okasi disi, ma fu trangayesi Gado fu espresi. Leki bakapisi fu dati, den nanga ala den bakapikin fu den kisi bigi problema, èn sosrefi wi na ini a ten disi. Fu san ede? Wi kan agersi a situwâsi disi nanga wan osofamiri-edeman di no e pai yuru oso. Te a no e pai yuru, dan a sma di abi na oso o poti a heri osofamiri na doro, pe den o abi en muilek srefisrefi èn den o de na nowtu. Na so a de tu, taki ala libisma e kisi fu du nanga problema, sensi di a fosi libisma trowpaar opo densrefi teige Gado (Romesma 5:12). Furu yari baka dati, a reti-ati man Yob ben kragi fu a pina di a ben pina èn fu den problema di a ben abi. A ben taki dati efu den sani dati ben kan poti „na tapu wan wegi”, den ben o „hebi moro leki a santi fu se”.​—Yob 6:2, 3.

Wan tra reide fu san ede wi e pina, na fu di wi no abi a koni fu man si san o pasa. Fu eksempre, kon meki wi taki dati wan sma bow wan tu oso èn a seri den, aladi na ini a birti dati busi e teki faya makriki. Sondro fu sabi a sani disi, yu e bai wan fu den oso disi èn yu e go libi na ini. Yu no ben o tyari yusrefi nanga yu osofamiri na ini bigi problema? Efu yu e kon de na ini wan muilek situwâsi leki bakapisi fu dati, dan yu no kan taki dati na Gado e strafu yu, a no so? Bijbel e taki a tru tori disi: „Wan sma di no abi ondrofeni, e bribi ibri wortu, ma a koniwan e luku pe a e poti en futu.”​—Odo 14:15.

Ma a de wan trowstu fu sabi taki aladi problema e miti wi alamala, toku Gado abi na prakseri fu frulusu libisma heri esi. Te a ten dati doro, dan noiti moro yu o kisi problema, èn yu no o si, noso yere fu iniwan problema. Sma no o krei moro fu di den e sari, fu di den e pina, noso fu di wan lobiwan fu den dede, iya, ala den sani disi o „pasa gowe” (Openbaring 21:4). Wan tra moi pramisi di e naki wi ati, na taki sma o bow oso noso prani gron di no o pori bakaten na ini wan feti noso wan rampu. Na presi fu dati, den sa „nyan bun dorodoro” fu a wroko fu den eigi anu.​—Yesaya 65:21-25.

San yu kan du now fu no kisi so furu problema, aladi yu e wakti fu Gado puru den sani disi fu ala ten? A fosi sani, èn a moro prenspari sani di yu kan du, na taki yu ’no musu frutrow tapu yu eigi frustan’, soleki fa Bijbel e taki, ma yu musu „frutrow tapu Yehovah nanga yu heri ati” (Odo 3:5). Suku tiri nanga trowstu na en. Poti prakseri na den koni rai fu en di skrifi na ini Bijbel. Dati sa yepi yu fu teki koni bosroiti èn dati sa kibri yu gi den problema di yu kan wai pasi gi.​—Odo 22:3.