San na bribi?

SAN na bribi gi yu? Son sma e taki dati bribi na te wan sma e teki ala san trawan fruteri en sondro fu abi buweisi gi dati. H. L. Mencken, wan prenspari Amerkan skrifiman nanga nyunsuman, ben taki dati bribi na „te wan sma e bribi sani di no kan èn di a no man frustan”.

Ma Bijbel e taki wan heri tra sani fu bribi. Gado Wortu e taki: „Bribi na te wan sma e fruwakti taki den sani di a e howpu, o kon seiker; a de a krin buweisi fu sani di de trutru, ma di wi no man si.”​—Hebrewsma 11:1.

Fu di sma e taki difrenti sani fu bribi, meki a bun fu go luku den piki tapu den aksi di e kon now:

• Fa den sani di furu sma e taki fu bribi, e difrenti fu san Bijbel e taki?

• Fu san ede a de prenspari fu abi a bribi di Bijbel e taki fu en?

• Fa yu kan kon abi wan tranga bribi?

Wan dokumenti di de wan krin buweisi

Na a ten di a Bijbel buku Hebrewsma ben skrifi, nofo tron sma ben gwenti gebroiki den Griki wortu di abi fu du nanga a fruwakti di wan sma e ’fruwakti wan sani di o kon seiker’. Nofo tron, den Griki wortu dati ben skrifi na tapu bisnis dokumenti, èn den ben gi sma a dyaranti taki den o kisi wan sani. Fu dati ede, wan buku e taki dati Hebrewsma 11:1 kan vertaal so: „Bribi na a dokumenti di e gi wan sma a dyaranti taki a o kisi san a e howpu na tapu.”

Efu wan leisi yu ben bai wan sani na wan bun wenkri, èn yu ben wakti fu den sma tyari en kon gi yu, dan yu ben abi a sortu bribi dati. A papira di e sori taki yu bai a sani dati, e gi yu a dyaranti fu bribi taki a wenkri o tyari a sani gi yu. Fu taki en leti, a papira dati na a dokumenti di e gi yu a dyaranti taki yu o kisi a sani di yu bai. Efu yu ben o lasi a papira dati noso efu yu ben o trowe en, dan yu no ben o abi a buweisi taki na yu abi a sani dati. Na so a de tu taki den sma di e bribi taki Gado sa meki den pramisi fu en kon tru, abi a dyaranti taki den o kisi san den e howpu. Na a tra sei, den sma di no abi bribi noso di lasi bribi, no kan taki dati den o kisi den sani di Gado pramisi.​—Yakobus 1:5-8.

A tra pisi fu Hebrewsma 11:1, di vertaal nanga „krin buweisi”, abi fu du nanga a tyari di wan sma e tyari wan buweisi kon na fesi di de heri tra fasi leki san furu sma e denki. Fu eksempre, a gersi leki a son e drai lontu grontapu, fu di a e opo na a owstusei èn a e dongo na a westsei. Ma sabiman di e ondrosuku den stari nanga tra sani na hemel, kon nanga buweisi di e sori taki a son no e drai lontu grontapu, ma na grontapu e drai lontu. Te yu kon sabi a buweisi disi èn yu agri taki a tru, dan yu o bribi taki grontapu e drai lontu a son, awansi a gersi leki dati no de so. Sobun, disi no wani taki dati yu e bribi wan sani sondro fu frustan dati. Ma fu di yu abi bribi, meki yu man frustan sani soleki fa den de trutru.

O prenspari a de fu abi wan tranga bribi?

Bijbel e gi wi a deki-ati fu kon abi a sortu bribi dati. Iya, fu kon abi wan tranga bribi fu di wi abi krin buweisi, awansi wi musu kenki san wi ben e bribi fosi. Na a sortu bribi dati de prenspari. Na apostel Paulus ben skrifi: „Sondro bribi wan sma no kan prisiri Gado, bika a sma di e anbegi Gado musu bribi taki a de trutru èn taki a sa pai den sma di e suku en fayafaya.”​—Hebrewsma 11:6.

Furu sani de di kan tapu wi fu kon abi wan tranga bribi. Ma efu yu du den fo sani di skrifi na ini den artikel di e kon, yu sa man abi wan tranga bribi.