Wan sma e broko en ede trutru nanga mi?

Yu firi wan leisi kaba leki yu de yu wawan èn a ben de leki yu no man yepi yusrefi? A ben de leki nowan sma e frustan trutru sortu problema yu abi? Srefi efu den ben sabi sortu problema yu abi, yu ben feni taki den no e broko den ede trutru nanga yu.

TE WI e kisi problema, dan a libi fu wi de leki wan sibibusi di no o kaba noiti. Son leisi wi kan denki srefi taki wi no man horidoro moro, fu di den problema hebi trutru èn wi e feni taki wi no frudini den. Nofo tron, na dati e pasa te wi no man frigiti wan hati sani di ben pasa nanga wi, te wi brokosaka, te wi kisi wan ongoloku di e meki wi kon moro swaki, te wi abi wan siki di no man dresi, noso wan srefi sortu problema. Kande wi e firi taki wi no man yepi wisrefi èn taki howpu no de. Wi kan firi so takru taki wi e aksi wisrefi pe wi kan feni trowstu. Wan sma de di e broko en ede nanga wi?

„A Gado fu ala trowstu” e broko en ede nanga wi

Bijbel e taki fu Gado dati a de „a Tata di abi bigi sari-ati, èn en na a Gado fu ala trowstu” (2 Korentesma 1:3). Gado, di nen Yehovah, sabi taki wi abi trowstu fanowdu. Bijbel e gebroiki a wortu „trowstu” dusundusun leisi na difrenti fasi, èn dati e gi wi a dyaranti taki Gado e frustan sortu problema wi abi, èn taki a wani fu trowstu wi tu. Te wi sabi a sani disi, dan dati e gi wi na overtoigi taki Yehovah Gado e si san e miti wi, awansi a gersi leki trawan no e si den problema fu wi, den no e frustan wi, noso den no e broko den ede nanga wi.

Bijbel e sori krin taki Yehovah e broko en ede nanga ibriwan sma. Bijbel e taki: „Den ai fu Yehovah de na ibri presi, èn den e luku den takruwan nanga den bunwan” (Odo 15:3). Yob 34:21 e taki tu: „Gado e si den pasi fu libisma èn a e si fa den e waka.” Yehovah e si efu wi e tyari wisrefi na wan bun fasi noso na wan takru fasi, èn a sabi na ini sortu situwâsi wi de. Fu dati ede, a kan du iniwan sani di a feni taki de bun gi wi. Wi e kon si disi te wi e luku san Hanani, a man di ben kisi fisyun noso a profeiti, ben taigi Kownu Asa fu Yuda. A ben taki: „Yehovah en ai e luku heri grontapu fu sori en krakti fu a bun fu den sma di lobi en nanga den heri ati.”​—2 Kroniki 16:7, 9.

Yehovah e luku wi fu wan tra reide tu. Yesus e taki: „Nowan sma kan kon na mi, efu a Tata di seni mi kon no e hari en kon” (Yohanes 6:44). Fu di Yehovah e broko en ede so furu nanga wi, meki a man ondrosuku na ati fu wan sma fu si efu a wani kon sabi En. Te a si taki a sma wani kon sabi en, dan a kan yepi en na wan tumusi moi fasi. Fu eksempre, na ini a Dominikan Republiek, wan uma ben de na ati-oso fu du wan oparâsi fu di a ben abi kanker. A ben begi Gado fu yepi en feni a tru bribi. Leti baka dati, en masra tyari wan brochure di nen San Gado e aksi foe wi? *, gi en. A ben kisi a brochure disi fu wan fu den Yehovah Kotoigi di ben kon na en oso. Na uma leisi a brochure èn a kon frustan taki na Gado ben piki a begi fu en. A bigin studeri Bijbel nanga Yehovah Kotoigi èn na ini siksi mun nomo, a gi en libi abra na Gado èn a teki dopu.

 Na ini a Bijbel buku Psalm, wi e feni moi wortu fu den owruten Hebrew psalm skrifiman, soleki Kownu David. Den wortu dati e naki wi ati, fu di den e sori taki Yehovah e broko en ede nanga den futuboi fu en na wan lobi-ati fasi. Na ini Psalm 56:8 Kownu David e begi Gado: „Grantangi, poti den watra-ai fu mi na ini a leer-saka fu yu. Den no de na ini a buku fu yu?” Na agersitori disi e sori taki David ben sabi taki Yehovah no ben si a pina fu en nomo, ma a ben sabi tu sortu krakti dati abi tapu en. Yehovah ben sabi a pina di David ben pina èn a ben memre sortu sari sani David ben ondrofeni di ben meki taki a krei. Fu tru, wi Mekiman e luku ala den sma di e du muiti fu du en wani, iya, „den sma di lobi en nanga den heri ati”.

Wan tra pisi fu Bijbel di e sori taki Yehovah e broko en ede nanga wi na wan lobi-ati fasi, na Psalm 23, di furu sma sabi. Den biginwortu fu a psalm dati e agersi Gado nanga wan lobi-ati skapuman. Drape skrifi: „Yehovah na mi Skapuman. Mi no sa mankeri noti.” Wan skapuman na ini den kondre pe Bijbel skrifi, ben e sorgu gi ibriwan fu en skapu. A ben gi ibriwan fu den wan nen srefi. Ala dei a ben e kari ibriwan fu den skapu kon na en, èn na wan lobi-ati fasi a ben e prei nanga den fu luku efu den kisi mankeri. Efu a ben si taki den kisi mankeri, dan a ben e poti oli noso wan salfu gi den fu meki den kon betre gaw. Efu a skapu siki, dan a skapuman kande ben musu dwengi en fu swari a dresi èn a ben e hori en tanapu so taki a no kanti didon èn dede. A no de fu taki dati disi na wan heri moi agersitori di e sori fa Yehovah e broko en ede nanga den wan di e suku yepi na en.

 Begi èn na opobaka e sori taki Gado e broko en ede nanga wi

Den psalm disi èn sosrefi tra moi psalm, no skrifi na ini Bijbel nomo fu wi leisi den èn feni den moi. Den e sori wi fa reti-ati futuboi fu Gado na ini owruten ben e taigi Yehovah ala san de na tapu den ati, èn na so den ben sori taki den abi a yepi fu Gado fanowdu. Boiti dati, den futuboi disi ben sori tu taki den de nanga tangi taki Gado ben e tiri den èn taki a ben e blesi den. Den sani di den owruten futuboi disi fu Gado ben taki, e sori krin taki den ben e bribi trutru taki Gado e broko en ede nanga den. Te wi e leisi èn denki dipi fu den sani disi di e sori san ben de na tapu na ati fu den futuboi dati, dan dati kan yepi wi fu denki a srefi fu Gado. Fu di Gado e gi pasi taki wi e begi en, meki dati e sori krin taki a e broko en ede nanga wi.

Ma son leisi wan problema e moro wi so te, taki wi no sabi srefi san fu taki na ini begi. A sani dati e meki taki Yehovah no sabi den broko-ede fu wi? Romesma 8:26 e gi a piki disi: „Sosrefi, a yeye e yepi wi tu te wi swaki; bika wi no sabi fu sortu sani wi musu begi te a de fanowdu, ma a yeye srefi e taki gi wi te wi e geme, aladi dati no de fu yere.” A tekst disi e sori taki den begi fu den futuboi fu Gado na ini owruten, kan sori fa wi e firi. Yehovah, a „Yereman fu begi”, e teki den begi disi leki den kon fu wi.​—Psalm 65:2.

Na opobaka howpu na wan tra krin buweisi taki Gado e broko en ede nanga ibriwan fu wi. Yesus Krestes ben taki: „A yuru o kon te ala den sma di de na ini den grebi o yere [Yesus] en sten, èn den o komopo drape” (Yohanes 5:28, 29). A Griki wortu di vertaal nanga „grebi”, teki puru fu wan wortu di wani taki „fu memre”. A wortu disi e sori taki Gado e memre fa a sma ben de di a ben de na libi.

Prakseri a tori disi. Fu tyari wan sma kon na libi baka, Gado musu sabi ala sani fu a sma dati, a musu sabi tu fa a sma ben tan, sortu fasi a teki fu en papa nanga mama, sortu fasi ensrefi ben kon abi, èn a musu sabi ala en prakseri! (Markus 10:27) Gado no e frigiti a sma dati, srefi baka dusundusun yari (Yob 14:13-15; Lukas 20:38). Sobun, Yehovah Gado e memre ala sani finifini fu ala den milyardmilyard sma di dede. Dati na wan krin buweisi taki Gado e broko en ede nanga ibriwan fu wi!

Yehovah e pai den sma di e suku en

San wi musu du efu wi wani taki Gado broko en ede nanga wi na wan lobi-ati fasi èn taki a sorgu gi wi? A fosi sani na taki wi musu sori taki wi e frutrow en, wi musu gi yesi na en èn wi musu poti bribi na ini en. Na apostel Paulus e sori o prenspari a de fu abi bribi efu wi wani taki Gado sorgu gi wi. A ben skrifi: „Sondro bribi wan sma no kan prisiri Gado, bika a sma di e anbegi Gado musu bribi taki a de trutru èn taki a sa pai den sma di e suku en fayafaya.”​—Hebrewsma 11:6.

Luku taki a bribi di wi musu abi fu plisi Gado, abi fu du nanga tu sani. A fosi sani na taki wi musu „bribi taki a de trutru”. Disi wani taki dati wi musu bribi taki Gado de èn taki en na wi Moro Hei Tiriman di wi musu anbegi èn gi yesi na en. A di fu tu sani, na taki wi musu bribi taki a sa „pai den sma di e suku en fayafaya”. Wan sma di abi bribi trutru, e bribi taki Gado e broko en ede nanga a tanbun fu ala den sma di e suku fu du en wani fayafaya èn taki a e pai den sma dati. Te yu e studeri Gado Wortu èn te yu abi demakandra nanga den sma di e gi yesi na en, dan yu sosrefi sa kon abi a bribi di o meki taki Gado pai yu èn sorgu gi yu na wan lobi-ati fasi.

Furu sma na ini a ten disi e bribi taki Gado no e broko en ede nanga libisma afersi. Ma soleki fa wi si, Bijbel e sori krin taki Gado e broko en ede trutru nanga den sma di e sori taki den e bribi trutru na ini en. Aladi a libi na ini a ten disi lai nanga banawtu, broko-ede, sari situwâsi, nanga pina, toku wi no abi fu lasi-ati. Yehovah Gado e broko en ede nanga wi. Fu taki en leti, na wan lobi-ati fasi a e gi wi a kari fu suku yepi na en. A psalm skrifiman ben taki: „Trowe yu hebi na tapu Yehovah, dan ensrefi sa horibaka gi yu. Noiti a o gi pasi taki wan reti-ati sma degedege.”​—Psalm 55:22.

[Futuwortu]

[Faki/​Prenki na tapu bladzijde 30]

Bijbeltekst di e sori krin taki Gado trutru e broko en ede nanga yu

„Yehovah en ai e luku heri grontapu fu sori en krakti fu a bun fu den sma di lobi en nanga den heri ati.”​—2 KRONIKI 16:9

„Grantangi, poti den watra-ai fu mi na ini a leer-saka fu yu. Den no de na ini a buku fu yu?”​—PSALM 56:8

„Yehovah na mi Skapuman. Mi no sa mankeri noti.”​—PSALM 23:1

„O Yereman fu begi, iya, na yu ala sortu sma sa kon.”​—PSALM 65:2

„Yu sa kari, èn misrefi sa piki yu. Yu sa angri gi a wroko fu yu anu.”​—YOB 14:15

„A sma di e anbegi Gado musu bribi taki a de trutru èn taki a sa pai den sma di e suku en fayafaya.”​—HEBREWSMA 11:6

„Trowe yu hebi na tapu Yehovah, dan ensrefi sa horibaka gi yu. Noiti a o gi pasi taki wan reti-ati sma degedege.”​—PSALM 55:22