Den sani di Yesus leri wi

San o pasa na ini a ten di e kon?

Yesus ben pramisi taki sma o libi na ini hemel?

Iya, a ben pramisi dati! Yesus srefi ben kisi wan opobaka, èn a ben opo go na hemel fu de nanga en Tata. Ma bifo a dede èn opo baka, a taigi den 11 apostel fu en di ben tan horibaka gi en: „Furu tanpresi de na ini na oso fu mi Tata. . . . Mi e gowe fu sreka wan presi gi unu” (Yohanes 14:2). Ma furu sma no ben o kisi a grani disi. Yesus ben tyari a sani disi kon na krin di a taigi den disipel fu en: „No frede, un pikin ipi, bika un Tata feni en bun fu gi unu a kownukondre.”​—Lukas 12:32.

San a „pikin ipi” o du na ini hemel?

A Tata wani taki a pikin grupu disi tiri makandra nanga Yesus na ini hemel. Fa wi du sabi dati? We, baka di Yesus opo baka, a taigi na apostel Yohanes taki sonwan fu den sma di tan horibaka gi en, ben o „tiri grontapu leki kownu” (Openbaring 1:1; 5:9, 10). Disi na bun nyunsu. Wan fu den moro prenspari sani di libisma abi fanowdu, na wan bun tirimakti. San a tirimakti disi, pe Yesus de leki kownu, o du? Yesus ben taki: „Te sani o meki kon nyun baka, èn a Manpikin fu libisma o sidon na tapu en glori kownusturu, dan unu di waka na mi baka, sa sidon tu na tapu twarfu kownusturu”(Mateyus 19:28). Te Yesus nanga den bakaman fu en o tiri, dan sani o „meki kon nyun baka”. Sani o de bun baka, neleki fa grontapu ben de fosi den tu libisma sondu.

 Sortu howpu Yesus ben gi den tra libisma?

Gado ben meki libisma fu libi na grontapu, èn dati de tra fasi leki Yesus, di ben meki fu libi na ini hemel (Psalm 115:16). Fu dati ede, Yesus ben taki: „Unu na fu den kontren na ondrosei; mi na fu den kontren na tapusei” (Yohanes 8:23). Yesus ben taki fu wan heri moi tamara gi libisma na grontapu. Wan leisi a ben taki: „Koloku fu den safri-ati sma, bika den o kisi grontapu” (Mateyus 5:5). A ben taki fu a psalm disi: „Den safri-ati sma o kisi grontapu, èn den o prisiri srefisrefi, fu di vrede o de pasa marki. Na den reti-ati sma o kisi grontapu, èn fu têgo den o tan libi drape.”​—Psalm 37:11, 29.

Sobun, a „pikin ipi”, di e go na hemel, a no den wan-enkri sma di o kisi têgo libi. Yesus ben taki tu fu wan howpu di de gi milyunmilyun sma na heri grontapu. A ben taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”​—Yohanes 3:16.

Fa Gado o frulusu libisma fu a pina di den e pina?

Yesus ben taki dati sma o kisi frulekti fu tu sani di e meki taki den e pina. A ben taki: „Nownowde grontapu e kisi krutu; nownowde a tiriman fu a grontapu disi o trowe go na dorosei” (Yohanes 12:31). A fosi sani di o pasa, na taki ogri libisma di e meki taki trawan e pina, o kisi krutu èn den o kisi pori. A di fu tu sani, na taki den o trowe Satan go na wan presi pe a no o man kori libisma moro.

Fa a de nanga ala den sma di ben libi èn di dede sondro fu abi na okasi fu leri sabi Gado nanga Krestes èn fu sori bribi na ini den? Yesus ben taigi wan ogriman di dede na en sei: „Yu o de nanga mi na ini Paradijs” (Lukas 23:43). A man disi, makandra nanga milyunmilyun tra sma, o abi na okasi fu leri sabi Gado, te Yesus o gi en wan opobaka na ini wan paradijs na grontapu. Dan a man disi o abi na okasi fu de wan fu den safri-ati sma, noso reti-ati sma di o kisi têgo libi na grontapu.​—Tori fu den Apostel 24:15.

Efu yu wani kon sabi moro, dan luku kapitel 3 nanga 7 fu a buku San Bijbel e leri wi trutru? *

[Futuwortu]

[Prenki na tapu bladzijde 23]

„Na den reti-ati sma o kisi grontapu, èn fu têgo den o tan libi drape.”​—Psalm 37:29