YESUS ben leri sma fu abi lespeki gi Gado Wortu, Bijbel. Disi de krin fu si te wi e luku a fasi fa a ben piki Didibri di ben kon tesi en (Mateyus 4:4-11). Fu eksempre, san Yesus du di Satan taigi en fu meki den ston tron brede? Yesus weigri fu du san Satan taigi en, èn a ben taki san Moses ben skrifi na ini Deuteronomium 8:3. Didibri ben wani gi Yesus a makti fu ala den kownukondre fu grontapu, efu Yesus anbegi en wán leisi nomo. San Yesus piki en? A ben weigri fu teki san Didibri ben wani gi en. Boiti dati, a kari a Bijbel gronprakseri di yu kan feni na ini Deuteronomium 6:13.

Denki a tori disi! Aladi Yesus ben de a Manpikin fu Gado, toku a no ben taki san ensrefi ben denki, ma a ben leri sma san skrifi na ini Bijbel. Èn noiti a ben poti Gado Wortu na wan sei, soso fu hori ensrefi na libisma gwenti (Yohanes 7:16-18). Ma tra fasi leki Yesus, furu fu den kerki fesiman na ini a ten dati no ben abi lespeki gi Gado Wortu. Fu san ede? Fu di den bigin si libisma gwenti moro prenspari leki den Santa Buku. Yesus ben taigi den kerkiman dati krin: „So unu no e teri a wortu fu Gado moro, fu du san den bigisma fu unu ben leri unu. Un hoigriman unu! Yesaya ben abi leti di a taki fu unu taki: A folku disi e gi Mi grani nanga den mofo, ma den no lobi Mi srefsrefi. Na fu soso den e anbegi Mi, bika den e leri den sma sani san libisma srefi meki.”​—Mateyus 15:6-9, Nyun Testamenti.

Furu fu den Kresten kerki nanga tra kerki, e taki dati den abi lespeki gi Bijbel. Ma omeni fu den kerki disi e poti libisma gwenti na wan sei te den no e kruderi kwetikweti nanga den leri na ini Gado Wortu? Luku tu eksempre nomo.

SAN BIJBEL E LERI: Yesus ben krutu den kerki fesiman na ini a ten fu en, fu di den ben lobi en taki sma kari den na wan spesrutu nen èn den ben wani kisi biginen. Yesus ben taki dati den man dati ben lobi „fu sidon na den moro prenspari presi te den go nyan na sma oso. So tu den e sidon na den moro bun presi ini den kerki. Den lobi te sma e gi den lespeki odi na wowoyo, èn te sma e kari den ’leriman.’” Baka dati Yesus ben taigi den disipel fu en: „Un no mus meki sma kari un ’leriman’, bika un alamala na brada èn un abi wan enkri ’Leriman’ nomo. Un no mus kari no wan sma dya na grontapu un ’p’pa’, bika un abi wan enkri P’pa nomo, èn dati na Gado di de na heimel.”​—Mateyus 23:1-10, Nyun Testamenti.

NA AKSI: Den kerki fesiman fu a kerki disi lobi en te sma e kari den na spesrutu nen fu gi den grani, èn den e suku biginen na ini a libimakandra, noso den e gi yesi na a komando fu Yesus fu no du dati?

SAN BIJBEL E LERI: „Joe no moesoe meki wan popki gi joesrefi efoe wan sani disi de gersi wan sani disi de na loktoe ini hemel, efoe wan sani disi de na grontapoe na ondro, efoe wan sani disi de na ini da watra na ondro grontapoe. Joe no moesoe boigi joesrefi gi dem efoe dini dem.”​—Exodus 20:4, 5, Da Bijbel na ini Sranantongo.

Na apostel Yohanes ben skrifi disi gi den Kresten: „Kibri oen srefi vo dem kroekoetoe gado!”​—1 Yohanes 5:21, Njoe Testament Nanga Dem Psalm.

NA AKSI: A kerki disi e gi yesi na a komando fu Bijbel di e taki krin dati sma no musu gebroiki prenki nanga popki na ini na anbegi fu Gado?

Aladi so furu difrenti sortu kerki de na ini a ten disi, toku yu kan feni a wan di o tyari yu go na libi. Furu sani de di e sori san na a „soifri fasi fu dini Gado” (Yakobus 1:27, Nyun Testamenti). Den Bijbeltekst di wi ben taki fu den na ini den artikel disi, de leki marki di kan yepi yu fu feni a bun pasi di e tyari sma go na a tru kerki, noso bribi.

Fu san ede yu no e aksi Yehovah Kotoigi sortu piki den ben o gi tapu den aksi na ini den artikel disi? Te yu o prakseri den sani di den taki, dan a ben o bun fu teki na eksempre fu den sma di ben e libi na ini a fosi yarihondro, na ini a foto Berea. Baka di den ben yere den sani di na apostel Paulus ben taki, „den ben e ondrosuku a Santa Buku fu si efu den sani [di Paulus ben taki] de so trutru” (Tori fu den Apostel 17:11, Nyun Testamenti). Efu yu abi lespeki gi Gado Wortu èn yu e studeri en fayafaya neleki den Bereasma, dan yu sa feni a pasi di e tyari sma go na libi. Yusrefi sa musu teki a bosroiti efu yu o waka na tapu a pasi dati.