A „spesrutu ten” de krosibei

NELEKI a profeiti Habakuk, den disipel fu Yesus ben angri fu si taki wan kaba kon na a pina di sma e pina. Di den kon sabi san a Kownukondre fu Gado o du fu meki sani kon bun baka na grontapu, dan den aksi Yesus: „O ten den sani disi o pasa, èn san o de a marki fu yu denoya èn fu a kaba fu a grontapu sistema disi?” (Mateyus 24:3) Yesus ben taigi den taki na Yehovah Gado wawan sabi o ten a Kownukondre o bigin tiri heri grontapu (Mateyus 24:36; Markus 13:32). Ma Yesus nanga wan tu fu den bakaman fu en ben taki na fesi fu spesrutu sani di ben o pasa na grontapu, èn di ben o sori taki a ten de krosibei.—Luku a faki na a reti-anusei.

Yu no e agri taki den sani disi e pasa furu na ini a ten disi? Yesus ben taki na fesi tu dati wan wroko ben o du na heri grontapu pe sma ben o kisi leri. A ben taki: „A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon.”—Mateyus 24:14.

Na a sani dati e pasa na ini a ten disi èn Yehovah Kotoigi e du a wroko dati. Na ini sowan 236 kondre, moro leki seibi milyun Kotoigi e fruteri sma san a Kownukondre o du. Boiti dati, den Kotoigi e yepi sma fu hori densrefi na den bun markitiki fu Gado. Iya, Gado wani taki wan kaba kon na a pina di sma e pina. Tan leri moro fu Gado en Kownukondre, èn yu sa abi a howpu fu libi na ini wan grontapu pe sma no o pina noiti moro.

[Faki na tapu bladzijde 8]

Bijbeltekst di e taki fu den lasti dei

MATEYUS 24:6, 7; OPENBARING 6:4

• Noiti ete so furu feti ben de

MATEYUS 24:7; MARKUS 13:8

• Bigi gronseki

• Angriten

LUKAS 21:11; OPENBARING 6:8

• Siki di e kiri ipi-ipi sma

MATEYUS 24:12

• Moro nanga moro sma e du ogri

• A lobi fu sma e kon kowru

OPENBARING 11:18

• Sma e pori grontapu

2 TIMOTEYUS 3:2

• Sma lobi moni srefisrefi

• Pikin e trangayesi papa nanga mama

• Sma lobi densrefi nomo

2 TIMOTEYUS 3:3

• Sma no lobi trawan

• Sma no wani meki kruderi

• Ala sortu sma na ini a libimakandra no man dwengi densrefi

• Sma na heri grontapu no lobi san bun

2 TIMOTEYUS 3:4

• Sma lobi prisiri na presi taki den lobi Gado

2 TIMOTEYUS 3:5

• Furu sma e taki dati den na Kresten, aladi den e hoigri

MATEYUS 24:5, 11; MARKUS 13:6

• Furu falsi profeiti de

MATEYUS 24:9; LUKAS 21:12

• Sma e frufolgu tru Kresten

MATEYUS 24:39

• Sma no e poti prakseri na den warskow fu Bijbel

[Prenki na tapu bladzijde 8]

Na heri grontapu, Yehovah Kotoigi e leri trawan fu Gado Kownukondre