Leisiman e aksi

Didibri de trutru?

Iya, Bijbel e leri taki Satan Didibri na wan trutru sma. Ma sma di e krutu Bijbel feni taki Didibri no kan de wan trutru sma, soleki fa Bijbel e sori. Den e taki dati Satan na soso na ogri di de na ini libisma.

A musu fruwondru wi taki sma no sabi trutru suma na Satan? Nôno, kwetikweti. Fu eksempre, wan ogriman kan figi den finga marki fu en puru baka te a du wan ogri, so taki sma no sabi suma na en. Na so fasi a kan tan du den ogri fu en go doro, sondro taki sma sabi taki na en e du den sani dati. Na a srefi fasi, Satan sabi heri bun fa fu du ogri sondro taki sma sabi taki na en e gi den deki-ati fu du dati. Yesus ben sori krin taki Satan na a sma di de frantwortu gi den ogri sani di e miti libisma. Yesus ben kari Satan „a tiriman fu a grontapu disi”.—Yohanes 12:31.

Pe Didibri komoto? Na a bigin a ben de wan engel na ini hemel èn a no ben abi sondu. Na engel disi di ben opo ensrefi teige Gado, meki ensrefi tron Didibri di a ben de nomonomo taki libisma anbegi en na presi fu Gado. Bijbel e taki fu wan takimakandra di Satan nanga Yesus ben abi dyaso na grontapu, pe Didibri ben sori taki a e suku fu kisi grani gi ensrefi. Satan ben pruberi fu meki Yesus ’boigi èn anbegi en wan leisi nomo’.—Mateyus 4:8, 9.

Na a srefi fasi, di Satan ben abi wan takimakandra nanga Gado, soleki fa skrifi na ini a buku Yob, dan Satan sori krin san a abi na prakseri. A ben o du ala san a man fu meki sma drai baka gi Gado.—Yob 1:13-19; 2:7, 8.

Denki a tori: Efu Satan ben taki nanga Yehovah Gado èn nanga Yesus Krestes, dan fa Satan kan de na ogri na ini sma? A no kan de so kwetikweti taki ogri de na ini Gado nanga en Manpikin! Fu dati ede a de krin fu si taki Satan na wan trutru sma, iya, en na wan yeye di no abi lespeki gi Yehovah nanga Yesus.

Na ogri di e miti libisma, e sori taki Didibri de trutru. Den pipel fu a grontapu disi e meki a nyanyan fu den di tan abra, pori gowe, aladi ipi-ipi sma e dede fu angri. Den e kibri fetisani fu kiri makandra. Den e pori a grontapu. Ma toku furu sma no sabi fa a du kon taki sma abi bita-ati gi makandra èn taki den wani kiri makandra. Fu san ede?

Bijbel e sori taki Satan ’breni a frustan fu den sma di no e bribi’ (2 Korentesma 4:4). Fu man kori sma, Satan e gebroiki wan organisâsi di sma no man si nanga den ai. En na „a tiriman fu den ogri yeye” (Mateyus 12:24). Neleki fa wan basi fu wan grupu ogriman kan tiri wan organisâsi sondro taki ala sma na ini a grupu sabi suma na en, na so Satan e gebroiki na organisâsi fu en fu ogri yeye fu kori ipi-ipi sma. Furu fu den sma disi no sabi sortu krakti a abi tapu den.

Wi kan de nanga tangi trutru taki Bijbel e tyari kon na krin suma na Didibri èn san na a organisâsi fu en! Fu dati ede wi kan du sani fu kakafutu gi Didibri, so taki a no abi krakti na wi tapu. Bijbel e gi wi a rai disi: „Saka unsrefi na ondro Gado; ma kakafutu gi Didibri, èn a sa lon gowe fu unu.”—Yakobus 4:7.