Gado e broko en ede trutru nanga wi—Fa wi du sabi dati?

WAN tumusi prenspari aksi di sma e aksi densrefi dusundusun yari kaba, na: Efu Gado lobi wi, dan fu san ede so furu pina de? Kande yu e agri taki efu yu lobi wan sma, dan yu no o wani taki a sma dati pina. Efu a sma ben o de na ini problema, dan yu ben o pruberi fu yepi en. Fu dati ede, furu sma e feni taki Gado noiti no kan broko en ede nanga wi, fu di so furu pina de na grontapu. Dati meki, a de prenspari taki wi e go luku fosi san na den buweisi di e sori taki Gado trutru lobi wi, iya, taki Gado e broko en ede nanga wi.

Den sani di Gado meki e buweisi taki a lobi wi

Yehovah Gado na a Sma di „meki hemel nanga grontapu nanga a se nanga ala sani di de na den ini” (Tori fu den Apostel 4:24). Te wi e prakseri san Yehovah meki, dan wi o si krin taki a e broko en ede nanga wi. Fu eksempre, prakseri den sani di e gi yu prisiri na ini a libi. Yu lobi fu nyan wan bun nyanyan? Yehovah ben kan meki wán sortu nyanyan gi wi fu tan na libi. Ma na presi fu dati, a meki bun furu difrenti sortu sani fu nyan so taki wi kan prisiri nanga dati. Na so a de tu taki Yehovah moi a grontapu nanga furu difrenti sortu bon, bromki, nanga moi presi so taki wi kan nyan bun fu a libi èn so taki wi kan du sani di wi lobi.

Prakseri sosrefi a fasi fa wi meki. Wi man lafu, wi man lobi wan spesrutu sortu poku, èn wi man nyan bun fu moi sani di wi e si. Wi no abi den sani disi fanowdu fu tan na libi, ma Gado gi wi den sani disi leki kado fu meki wi libi kon moro switi. Prakseri sosrefi a matifasi di yu abi nanga trawan. Suma no lobi en fu  abi switi demakandra nanga bun mati, noso fu kisi wan brasa fu wan sma di wi lobi trutru? We, fu taki en leti, wi man sori lobi fu di dati na wan kado di wi kisi fu wan Gado di e sori lobi tu! Fu di Gado meki libisma na so wan fasi taki den man sori lobi, meki a musu de so taki Gado abi a fasi dati tu.

Bijbel e gi wi a dyaranti taki Gado lobi wi

Bijbel e taki dati Gado lobi wi (1 Yohanes 4:8). Na ini den sani di a meki wi kan si taki a lobi wi, ma sosrefi en Wortu, Bijbel, e sori wi dati krin. Fu eksempre, Bijbel e gi wi rai fa fu libi so taki wi kan abi wan bun gosontu, a e gi wi a deki-ati fu no du sani pasa marki, èn a e warskow wi fu no dringi èn nyan pasa marki.—1 Korentesma 6:9, 10.

Bijbel e gi koni rai sosrefi fa fu libi bun nanga trawan, a e gi wi deki-ati fu lobi makandra èn fu handri na wan lespeki fasi, na wan wartifasi, èn na wan switifasi nanga trawan (Mateyus 7:12). Bijbel e krutu fasi di abi takru bakapisi gi sma, soleki te sma gridi, te den e taki takru fu trawan, te den abi bigi-ai, te den e du hurudu, èn te den kiri trawan. Efu ala sma ben o pruberi fu fiti den bun Bijbel rai dati na ini den libi, dan a no de fu taki dati so furu pina no ben o de na grontapu.

Ma a moro bigi fasi fa Gado sori lobi, na di a gi en Manpikin, Yesus, fu frulusu libisma. Yohanes 3:16 e taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.” Sobun, Yehovah seti sani kaba fu tyari wan kaba kon na dede èn na ala a pina di libisma e pina.—1 Yohanes 3:8.

A de krin fu si taki bun furu buweisi de di e sori taki Yehovah lobi wi. Wi kan frustan fu dati ede, taki Gado no wani si taki wi e pina. Seiker a o du wan sani fu tyari wan kaba kon na a pina di libisma e pina. Wi no abi fu aksi wisrefi san o pasa, fu di Bijbel e taigi wi krin fa Gado o tyari wan kaba kon na a pina di wi e pina.

[Prenki na tapu bladzijde 4]

Wi man sori lobi fu di dati na wan kado di wi kisi fu wan Gado di e sori lobi