San Kownu David e leri wi fu poku?

TE WI e yere a nen David, dan dati e meki wi memre poku na ini Bijbel ten. David ben de wan prenspari man di ben libi sowan 3000 yari pasa. Fu taki en leti, den furu sani di wi sabi fu poku fu a ten dati, skrifi na ini den pisi fu Bijbel di e taki fu David. Den pisi dati e taki fu a ten di a ben de wan yongu skapuman te go miti a ten di a tron wan kownu di ben sabi heri bun fa fu orga sani.

Wi kan leri furu fu poku na ini Bijbel ten, te wi e leisi den tori fu David. Fu eksempre, sortu pokusani den ben e prei, èn sortu singi den ben e singi? O prenspari poku ben de gi David, èn gi a pipel Israel?

A fasi fa den Israelsma fu owruten ben e si poku

Te wi e taki den wortu fu wan singi safri, dan nofo tron dati e meki wi prakseri a poku fu a singi. Den wortu fu furu singi skrifi na ini Bijbel. Ma a de wan sari sani taki wi no sabi den poku fu den singi dati. A musu de so taki den poku dati ben moi srefisrefi. A buku Psalm skrifi na wan tumusi moi fasi, leki wan puwema. Fu dati ede a musu de so taki a poku fu den singi ben moi tu.

Ma Bijbel no e taki furu fu den pokusani fu a ten dati. (Luku a faki  „Pokusani na ini Bijbel ten”.) Bijbel no e taki srefi sortu harpu David ben e prei. Ma a moi fu sabi taki den Israelsma ben meki difrenti pokusani di sma no ben si ete, soleki harpu di meki fu diri udu.—2 Kroniki 9:11; Amos 6:5.

Ma wan sani de seiker: Poku ben de wan prenspari sani na ini a libi fu den Hebrewsma, spesrutu te den ben e anbegi Gado. Den ben e prei poku te den ben e poti wan kownu, te den ben e du spesrutu sani di abi fu du nanga na anbegi fu den, èn na ini sani di abi fu  du nanga feti. Den ben e prei poku tu fu meki den sma na ini kownu-oso firi bun, fu meki moro prisiri na trow-oso èn te famiriman ben kon makandra. Poku ben de tu na den fesa te den ben koti droifi nanga sani soleki aleisi. A de wan sari sani tu taki poku ben de na presi pe sma ben e tyari densrefi na wan fasi di no fiti. Boiti dati, te wan sma ben dede, dan poku ben e trowstu den wan di ben e sari.

Poku ben de prenspari na tra okasi tu. Poku ben e yepi fu puru broko-ede, èn a ben e meki taki profeiti kisi boskopu fu Gado. Elisa ben kisi boskopu fu Gado di wan sma bigin prei harpu gi en (2 Kownu 3:15). Te sma ben e meki spesrutu sani bekènti, dan den ben e prei poku tu. Te den ben e meki bekènti taki nyun mun nanga tra fesa ben o bigin, dan den ben e prei tu solfru trompeti. Na a dei fu a Prisiri-yari, den ben e prei tutu fu meki bekènti taki den srafu kon fri, taki sma ben kan drai go baka na den gron, èn taki sma ben kisi den oso baka. A no de fu taki dati den pôtisma ben musu fu breiti te den ben yere a poku di e sori taki den kon fri noso taki den kisi den sani fu den baka!—Lefitikus 25:9; Numeri 10:10.

A musu de so taki son Israelsma ben de kefalek bun pokuman, noso singiman. Fu taki en leti, soleki fa wan prenki di den Asiriasma koti na ini ston e sori, dan di Kownu Heskia ben musu pai Kownu Sanherib, dan a aksi Kownu Heskia mansma nanga umasma di ben de pokuman. Soleki fa a sori, dan den sma disi ben de heri bun pokuman. Ma David ben de wan fu den moro bun pokuman.

Wan kefalek bun pokuman

David ben de wan heri bun pokuman èn puwema skrifiman. A skrifi moro leki afu fu den psalm. Di a ben de wan boi ete, èn a ben e luku skapu, dan den tumusi moi kontren di a ben e si na ini Betlehem, ben abi furu krakti na en tapu. A ben e gi en prisiri fu yere fa a watra e lon na ini den kriki èn fa den pikin skapu e bari te den ben yere en sten. Fu di den sani disi di a ben e yere lontu en, ben naki en ati, meki a ben teki en harpu èn singi prèisesingi gi Gado. A no de fu taki dati a ben de wan tumusi moi sani fu yere a poku di David ben meki di a skrifi Psalm 23!

Di David ben de wan yonkuman, a ben e prei harpu so moi, taki sma fruteri Kownu Saul fu en, èn a kownu disi ben teki en fu wroko gi en. Te den prakseri fu Saul ben e trobi en èn a ben de nanga bigi broko-ede, dan David ben e kon prei harpu gi en, so taki a ben kan firi moro bun. Na so den takru prakseri di ben e trobi Saul gowe, èn a ben e firi bun baka.—1 Samuel 16:16.

Ma a poku di David ben lobi so te, èn di ben e gi en prisiri, ben tyari problema kon  son leisi. Wan dei, di David nanga Saul ben drai kon baka fu wan feti nanga den Filisteasma di den ben wini, dan a kownu ben yere fa sma ben e prei prisiri poku, fu di den ben wini a feti. Den umasma ben e singi: „Saul kiri dusundusun sma, ma David kiri someni tenti dusun sma.” A sani disi meki Saul ati bron èn dyarusu so te, taki „sensi a dei dati, Saul no ben e frutrow David moro”.—1 Samuel 18:7-9.

Poku ben abi krakti na tapu David

Na difrenti fasi den poku di Gado meki David skrifi, bun moro tra poku. Den singi fu en ben de psalm di e sori taki a ben e denki dipi fu sani, èn taki a ben kisi yepi fu Gado na ini muilek ten. Den psalm ben de prèisesingi, den ben de tori di pasa fositen, den ben e sori fa sma ben e prisiri te den ben e koti droifi, èn den ben e sori o bigi a fesa ben de di den gi a kownu-oso abra na Gado. Boiti dati, den ben e taki fu sani di sma musu memre, den ben e gi howpu, èn den ben e taki fu sani di sma ben aksi noso begi Gado. (Luku Psalm 32, 23, 145, 8, 30, 38, 72, 51, 86 nanga den sani di skrifi na a bigin fu den psalm disi.) Di Saul nanga en manpikin Yonatan dede, dan David meki wan sarisingi di nen „A bo”. A singi disi e bigin so: „Ke Israel, sma kiri a moi sani na den pikin bergi fu yu.” A ben de wan sari poku. Nanga wortu èn nanga poku di David ben e prei nanga en harpu, a ben man sori fa a e firi.—2 Samuel 1:17-19.

David ben de wan sma di lobi prisiri èn dati meki a ben lobi prisiri poku di ben e naki moi. Di a ben tyari na ark fu a frubontu go na Sion, dan a ben e dyompo èn dansi fu prisiri na a okasi dati. A tori na ini Bijbel e sori taki a ben musu de so taki a poku ben e gi sma fu  dansi. Yu e si kaba fa a sani disi e pasa? A sani disi meki taki en wefi Mikal wisiwasi en. Ma David no ben luku a sani dati. A ben lobi Yehovah èn a poku disi ben gi en so furu prisiri, taki a ben dyompo na fesi en Gado.—2 Samuel 6:14, 16, 21.

Efu dati no sari ete, dan David ben meki pokusani di sma no ben sabi ete (2 Kroniki 7:6). Fu taki en leti, David ben de wan man di ben abi spesrutu koni, iya, a ben sabi meki pokusani, a ben e skrifi puwema, a ben e meki poku, a ben sabi prei poku èn singi gi sma. Ma David ben man du moro kefalek sani tu.

Singi nanga poku na ini a tempel

Wan sani di David ben du, na taki a ben orga singiman nanga pokuman na ini na oso fu Yehovah. A ben poti Asaf, Heiman, nanga Yedutun (soleki fa a sori den ben e kari en Etan), fu teki fesi na ini wan grupu fu 4000 singiman nanga pokuman. Na ini a grupu dati, David ben poti 288 man di ben sabi poku heri bun. Den man disi ben musu gi leri èn sori den tra sma fu a grupu san fu du. Den 4000 singiman nanga pokuman ben de na ini a tempel te den dri bigi fesa ben e hori ibri yari. Prakseri o bigi èn o moi a ben musu de fu yere so furu sma e singi makandra!—1 Kroniki 23:5; 25:1, 6, 7.

Na soso mansma ben e singi na ini a tempel. Den wortu „soleki fa den yonguwenke e singi” na a bigin fu Psalm 46, abi fu du nanga fini sten noso pokusani di seti fu prei gi fini sten. Den singiman ben e singi makandra. Soleki fa 2 Kroniki 5:13 e sori, dan „den singiman ben e meki poku leki wán man”. Den singi ben kan de poku, soleki Psalm 3 nanga furu tra psalm fu David. Son leisi son wortu ben e kon ibri leisi baka na ini den singi, soleki na ini Psalm 42:5, 11 nanga 43:5. Den ben lobi singi tu pe tu grupu singiman ben e piki makandra na ini a singi, noso pe wán sma ben e singi èn wan trawan ben e piki en. Wan eksempre fu disi de na ini Psalm 24, di ben meki na a ten di David tyari na ark fu a frubontu go na Sion.—2 Samuel 6:11-17.

Ma a no den Leifisma wawan ben e singi. Na a pipel ben singi di den ben opo go na Yerusalem gi den fesa di ben e hori ala yari.  Kande disi e sori go na den wortu „Wan singi fu den wan di e kren go na a foto” (Psalm 120 te go miti 134). Fu eksempre na ini Psalm 133, David e prèise a bradafasi di den Israelsma ben abi na den momenti dati. A e bigin nanga den wortu: „Luku! O bun èn o switi a de te brada e libi nanga makandra na ini wánfasi!” Pruberi fu denki fa a poku fu a singi disi ben de!

Poku prenspari na ini na anbegi fu Yehovah

Wan di fu tin pisi fu Bijbel na singi, èn a buku Psalm e gi ala libisma a deki-ati fu prèise Yehovah (Psalm 150). Poku kan meki sma frigiti den broko-ede fu a libi èn te wan sma e singi, dan dati kan de leki dresi gi en te a e sari. Ma Bijbel e gi den wan di e prisiri a deki-ati tu fu singi prèisesingi.—Yakobus 5:13.

Nanga yepi fu singi wan sma kan sori taki a abi bribi èn taki a lobi Gado. A neti fosi Yesus dede, en nanga den apostel fu en ben singi di den kaba nyan (Mateyus 26:30). A no de fu taki dati a Manpikin disi fu David, di ben sabi fa den engel na ini hemel e singi moi na fesi Gado, ben musu fu singi moi! Kande den ben e singi a Hallel, dati na Psalm 113 te go miti 118. Efu dati de so, dan den apostel di no ben sabi san ben o pasa, ben e singi makandra nanga Yesus, di ben e singi nanga wan tranga sten: „Mi lobi Yehovah, bika a e arki mi te mi e begi en. . . . Den titei fu dede ben tai mi hori. Sani ben e moro mi so te, taki a ben gersi leki mi de na ini grebi. . . . ’Ke Yehovah, frulusu mi!’”—Psalm 116:1-4.

A no libisma tyari poku kon. Bijbel e taki dati poku e prei èn singi e singi na ini hemel pe yeye libisani e prei harpu na agersifasi èn den e singi prèisesingi lontu a kownusturu fu Yehovah (Openbaring 5:9; 14:3; 15:2, 3). Yehovah Gado gi libisma poku, fu di na en gi den a firi fu warderi poku. Boiti dati, a gi den na angri fu sori fa den e firi te den e prei pokusani noso te den e singi. Gi wan sma di abi bribi, poku na wan presenti fu Gado.—Yakobus 1:17.

[Prenspari pisi na tapu bladzijde 11]

„Na den fesadei te unu o meki prisiri, . . . un musu bro den trompeti.”—NUMERI 10:10

[Prenspari pisi na tapu bladzijde 12]

„Yehovah na mi Skapuman. Mi no sa mankeri noti. A e meki mi didon na ini wei pe furu grasi e gro. A e tyari mi go rostu na presi pe furu watra e lon.”—PSALM 23:1, 2

[Prenspari pisi na tapu bladzijde 13]

„Fo dusun [sma] ben e prei poku fu prèise Yehovah. Fu den pokusani di den ben gebroiki, David ben taki: ’Mi meki den fu prèise Gado.’”—1 KRONIKI 23:4, 5

[Prenspari pisi na tapu bladzijde 13]

Nanga wortu èn nanga poku David ben man sori fa a e firi

[Prenspari pisi na tapu bladzijde 14]

„Prèise Yah, un pipel! Prèise en nanga tyengretyengre èn dansi gi en. Meki ala libisani prèise Yah.”—PSALM 150:1, 4, 6

[Faki/​Prenki na tapu bladzijde 12]

 Pokusani na ini Bijbel ten

Sma ben e gebroiki siter, harpu nanga tra pokusani di gersi harpu (Psalm 92:3). Den pokusani dati ben seti fu prei hei nanga lagi (1 Kroniki 15:20, 21). Tra pokusani di den ben e bro, ben de peipi, froiti, tutu, nanga trompeti di sma ben e bro „bun tranga” (2 Kroniki 7:6; 1 Samuel 10:5; Psalm 150:3, 4). Di den ben gi a tempel abra na Yehovah, dan den sma di ben e bro trompeti nanga den singiman, „ben e meki poku leki wán man” (2 Kroniki 5:12, 13). Disi wani taki dati den no ben e prei bruyabruya. Pokusani di sma ben naki ben de tyengretyengre nanga sistrum, wan sortu sekiseki, èn sosrefi „ala sortu pokusani di meki fu yaneifer-udu”. Yu ben abi sosrefi pikin gengen di e „piki moi” nanga bigiwan di e „piki krin”.—2 Samuel 6:5; Psalm 150:5.

[Prenki na tapu bladzijde 12]

Na tapusei: Wan pisi fu a Titusboog, na ini Rome, Italiakondre. A monumenti disi e sori den trompeti di sma ben teki fu a tempel na ini Yerusalem na ini a yari 70. Tu sensi fu wan pisi ten fu a yari 130, di e sori den pokusani fu den Dyu

[Sma di abi a reti fu a prenki]

Coins: © 2007 by David Hendin. All rights reserved.