Yu ben sabi a sani disi?

Fu san ede Yosef ben prakseri fu gi Maria wan brokotrow papira aladi den ben meki mofo nomo?

Soleki fa na Evangelietori fu Mateyus e sori, dan Yosef kon sabi taki Maria de nanga bere aladi a ben „meki mofo fu trow nanga Yosef”. Ma na a ten dati den no ben libi nanga makandra ete. Fu di Yosef no ben sabi taki na a „santa yeye ben meki Maria de nanga bere”, meki a kan taki a ben prakseri taki Maria ben sribi nanga wan tra man. Fu dati ede, a ben abi na prakseri fu broko trow nanga en.—Mateyus 1:18-20.

Den Dyu ben si tu sma di ben meki mofo, leki sma di trow kaba. Ma den tu sma dati no ben e libi ete nanga makandra leki masra nanga wefi, teleki den ben du ala den sani di sma ben musu du na wan trow. Den ben si a meki di sma ben meki mofo fu trow, leki wan seryusu sani. Efu a trowmasra ben kenki prakseri noso wan tra sani ben pasa di meki taki den no trow moro, dan na uma no ben mag trow nanga wan tra man, solanga a no kisi wan brokotrow papira. Efu wan uma ben meki mofo nanga wan man, ma a man dati kon dede bifo den trow, dan sma ben si en leki wan wefi di lasi en masra na ini dede. Ma efu na uma ben du hurudu na a ten di a meki mofo, dan sma ben e si en leki wan uma di du sutadu èn a ben kisi dedestrafu.—Deuteronomium 22:23, 24.

Soleki fa a sori, dan Yosef ben musu prakseri san ben o pasa nanga Maria te sma ben o kon sabi taki a de nanga bere. Aladi Yosef ben wani tyari a tori go na fesi krutu, toku a no du dati fu di a no ben wani taki ogri miti Maria èn taki a kisi syen. Fu dati ede, a bosroiti fu broko trow nanga Maria sondro fu sma sabi. Te wan mama di no abi masra ben abi wan brokotrow papira, dan dati ben o sori taki a ben trow kaba wan leisi.

San Yesus ben wani taki di a taigi den leriman fu Wet nanga den Fariseiman taki den gersi „grebi di sma meki kon weti”?

Yesus ben kari den leriman fu Wet nanga den Fariseiman hoigriman èn a ben taigi den: „Un gersi grebi di sma meki kon weti èn di moi na dorosei, ma inisei den lai nanga dedesma bonyo nanga ala sortu morsu sani” (Mateyus 23:27). Den Dyu ben abi a gwenti fu moi den grebi, fu di den ben meki den kon weti nanga karki. Den ben du disi na a kaba fu na alenten tapu a di fu tinafeifi dei fu a mun Adar, wan mun bifo a Paskafesa. Fu taki en leti, na alen ben e wasi a karki puru fu den grebi.

Soleki fa wan buku e taki, dan den Dyu ben e meki den grebi kon weti fu sorgu taki „den ipi-ipi sma di ben waka na tapu den pasi na a ten fu a Paskafesa, ben kan si den grebi. Na so den no ben o fasi den grebi, fu di dati ben o meki taki den no krin moro” (The Jewish Encyclopedia). A wet di skrifi na ini Numeri 19:16, ben taki dati iniwan sma di fasi wan dedeskin, wan libisma bonyo, noso wan grebi no ben o de krin seibi dei langa. Efu wan Israelsma no ben krin soleki fa a wet ben taki, dan a no ben mag du sani di abi fu du nanga a tru anbegi, noso a ben o kisi dedestrafu (Lefitikus 15:31). Yesus gebroiki na agersitori disi wan tu dei bifo a Paskafesa. Sobun, a meki di sma ben meki den grebi kon weti, ben de ete na ini a prakseri fu den arkiman. Yesus ben sori taki den kerki fesiman di ben gens en, ben hoigri fu di den ben de tra fasi leki san sma ben si na dorosei. Efu sma ben abi demakandra nanga den man disi, dan na anbegi fu den sma disi no ben o krin moro.