Kon krosibei na Gado

„A kownukondre fu yu o tan”

2 Samuel 7:1-16

NA INI a historia, sma puru furu libisma tiriman na a makti. Son leisi sma ben stem fu puru den, aladi den puru trawan nanga tranga. Fa a de nanga Yesus Krestes, a Kownu fu Gado Kownukondre di de na hemel? Wan sani kan tapu en fu tiri leki a Kownu di Gado poti? Wi kan feni a piki na ini den wortu di Yehovah taigi Kownu David fu Israel fu owruten, soleki fa a skrifi na ini 2 Samuel kapitel 7.

A bigin fu a kapitel e sori taki David e syen fu di en, leki wan libisma kownu e tan na ini wan moi kownu-oso, aladi na ark fu Gado di de so wan prenspari sani de na ini wan tenti nomo. * David ben sori taki a abi na angri fu bow wan warti oso noso tempel, gi Yehovah (vers 2). Ma a no David ben o bow na oso. Yehovah ben meki a profeiti Natan taigi David taki wan manpikin fu en o bow a tempel.—Vers 4, 5, 12, 13.

A e naki na ati fu Yehovah te a e si taki David abi na angri fu bow wan oso gi en. Fu di David ben wani du disi nanga en heri ati, meki Gado meki wan frubontu nanga en taki A o meki wan bakapikin fu David, tiri fu ala ten. A sani disi e kruderi tu nanga profeititori. Natan e taigi David san Gado sweri. A e taki: „Fu ala ten yu bakapikin o tiri leki kownu. A kownukondre fu yu o tan fu ala ten. Noiti tra sma o teki a kownukondre disi abra” (vers 16). Suma na a sma di o tiri fu ala ten?—Psalm 89:20, 29, 34-36.

Yesus fu Nasaret ben de wan bakapikin fu David. Di wan engel ben meki bekènti taki Yesus ben o gebore, dan a taki: „Yehovah Gado o gi en a kownusturu fu en papa David; a o tiri fu têgo leki kownu fu a famiri fu Yakob èn en kownukondre no sa kaba” (Lukas 1:32, 33). Sobun, a frubontu di Gado meki nanga David, ben kon tru na ini Yesus Krestes. Fu dati ede, Yesus e tiri no fu di libisma poti en drape, ma fu di Gado ben sweri dati. Na so fasi a abi a reti fu tiri fu ala ten. Meki wi hori na prakseri taki ala ten den pramisi fu Gado e kon tru.—Yesaya 55:10, 11.

Wi kan leri tu prenspari sani fu 2 Samuel kapitel 7. A fosiwan na taki noti èn nowan sma kan tapu Yesus Krestes fu tiri. Sobun, wi kan de seiker taki a o meki a wani fu Gado pasa na grontapu soleki fa a e pasa na hemel. Na fu dati ede a e tiri soleki fa ensrefi ben taki.—Mateyus 6:9, 10.

A di fu tu sani na taki a tori disi e leri wi wan sani fu Yehovah, èn a sani dati e naki wi ati trutru. Memre taki Yehovah ben si èn warderi na angri di David ben abi fu bow wan oso gi en. A e trowstu wi fu sabi taki Yehovah e warderi na anbegi fu wi di wi e du nanga wi heri ati. Son leisi wi no man yepi taki son sani pasa nanga wi di e tapu wi fu du ala san wi e angri fu du na ini a diniwroko fu Gado. Kande fu di a gosontu fu wi e go na baka, noso fu di wi e kon owru. Efu dati de so, dan a e trowstu wi fu sabi taki Yehovah e si srefi na angri di wi e angri fu du sani na ini na anbegi fu en.

[Futuwortu]