A snoga—A presi pe Yesus nanga den disipel fu en ben e preiki

„Dan a waka lontu na ini heri Galilea, aladi a ben e gi leri na ini den snoga fu den, èn ben e preiki a bun nyunsu fu a kownukondre.”—MATEYUS 4:23.

IBRI TRON baka den Evangelietori e taki dati Yesus ben de na ini a snoga. Awansi a ben de na ini Nasaret, a foto pe a gro kon bigi, noso na ini Kaperna-um, a foto pe a ben tan. Te Yesus ben go na den tra foto noso dorpu, dan a ben go na a snoga tu fu preiki èn gi leri fu Gado Kownukondre na ini den dri nanga afu yari fu en diniwroko. Fu taki en leti, Yesus ben taki disi fu en diniwroko: „Ala ten mi ben gi sma leri na ini wan snoga èn na ini a tempel pe ala Dyu e kon makandra.”—Yohanes 18:20.

Na a srefi fasi, den apostel fu Yesus èn sosrefi tra Kresten fu a fosi yarihondro nofo tron ben e gi leri na ini den Dyu snoga. Ma fa a du kon taki den Dyu ben anbegi Gado na ini den snoga? Fa den presi dati pe sma ben anbegi Gado, ben de na ini a ten fu Yesus? Meki wi go luku a tori disi moro bun.

Wan prenspari sani na ini a libi fu den Dyu Dri leisi na ini wan yari, den Dyu mansma ben gwenti go na Yerusalem gi den fesa di ben hori na a santa tempel drape. Ma te a abi fu du nanga na anbegi fu den na ini na aladei libi, dan den ben go na a snoga na ini a kontren fu den, awansi dati ben de na ini Palestina noso  wan fu den tra Dyu libimakandra dorosei fu Palestina.

O ten den bigin gebroiki a snoga? Son sma e bribi taki a ben de na a pisi ten di den Dyu ben de na ini katibo na Babilon (607-537 bifo Krestes). Na a pisi ten dati a tempel fu Yehovah ben de wan brokopresi. A kan de so tu taki den ben gebroiki a snoga syatu baka di den Dyu komoto na ini katibo, di a priester Esra ben gi en pipel deki-ati fu kon sabi moro fu Gado Wet èn fu frustan en moro bun.—Esra 7:10; 8:1-8; 10:3.

A wortu „snoga” wani taki „kon makandra” noso „gemeente”. Na so a wortu dati gebroiki na ini a Septuaginta, di de a Griki vertaling fu den Hebrew Buku fu Bijbel. Ma baka wan pisi ten, a wortu dati ben wani taki den gebow pe sma ben kon makandra fu anbegi. Na a pisi ten fu a fosi yarihondro, pikinmoro ibri foto pe Yesus ben go, ben abi wan snoga. Den moro bigi foto ben abi wan tu snoga èn Yerusalem ben abi furu snoga. Fa den gebow dati ben de?

Wan presi sondro furu pranpran Te den Dyu ben go suku wan presi fu bow wan snoga, dan nofo tron den ben suku wan hei presi. Den ben seti sani so taki a mofodoro fu a gebow ben de (1) na a sei pe Yerusalem de. Ma soleki fa a sori, dan a no ala ten den ben du dati, fu di a no ala ten dati ben man.

Te a snoga ben kaba bow, dan nofo tron a no ben abi furu pranpran èn den ben abi wan tu sani na inisei nomo. Ma wan prenspari sani na ini a snoga ben de wan ark (2), noso wan kisi pe den ben kibri a moro prenspari sani fu a libimakandra, èn dati ben de den bukulolo fu den Santa Buku fu Bijbel. Te den ben hori konmakandra, dan den ben tyari na ark kon, èn baka dati den ben poti en baka na ini a kamra pe den ben kibri en (3).

Krosibei fu na ark, den fesisei sidonpresi (4)  ben de pe den fesiman fu a snoga nanga iniwan tra prenspari fisitiman ben sidon, so taki den ben kan si a gemeente (Mateyus 23:5, 6). Na a mindrisei, yu ben abi wan podium pe wan hei tafra nanga wan sidonpresi ben de gi a takiman (5). Na dri sei fu a gebow, bangi ben de gi a gemeente pe sma ben sidon luku go na a podium (6).

Nofo tron, a gemeente fu a presi drape ben drai a snoga èn ben e horibaka gi den sani di musu du na ini a snoga. Gudusma nanga pôtisma, iya, ala sma ben gi moni so taki a presi ben tan bun èn so taki den ben kan meki den sani di broko. Ma fa den konmakandra na ini a snoga ben de?

Na anbegi na ini a snoga Te sma ben kon anbegi Gado na ini a snoga, dan den ben singi prèisesingi, den ben begi, den ben leisi den Buku fu Bijbel, den ben gi leri, èn den ben preiki. Te den ben bigin, dan a gemeente ben taki a Syema, noso wortu di den Dyu ben gwenti taki fu sori taki den abi bribi. A nen disi komoto fu a fosi wortu di skrifi na ini a fosi vers di den ben taki ibri tron baka. Dati ben de: „Arki [Syema], un Israelsma: Yehovah wi Gado na wán Yehovah.”—Deuteronomium 6:4.

Baka dati, den ben leisi èn fruklari a Tora finifini. Disi ben de den fosi feifi buku fu Bijbel, di Moses skrifi (Tori fu den Apostel 15:21). Dan den ben e leisi pisi di teki puru fu den profeiti buku (haftarah), èn den ben e fruklari dati èn sori fa fu fiti dati na ini den libi. Son leisi den fisitiman ben e hori a pisi disi, soleki fa Yesus ben du na a okasi di skrifi na ini Lukas 4:16-21.

A no de fu taki dati a bukulolo di sma ben  langa gi Yesus na a konmakandra dati, no ben abi kapitel nanga vers, soleki fa Bijbel de na ini a ten disi. Sobun, wi kan prakseri fa Yesus ben lolo a bukulolo opo nanga en kruktu-anu, aladi a ben lolo en baka nanga en reti-anu, teleki a feni a pisi di a ben e suku. Te sma ben kaba leisi, dan den ben lolo a bukulolo baka go na a bigin.

Nofo tron, den ben leisi na ini Hebrewtongo èn vertaal en na ini Arameisitongo. Na ini gemeente pe sma ben e taki Grikitongo, den ben gebroiki a Septuaginta.

Wan prenspari pisi fu na aladei libi A snoga ben de prenspari trutru na ini na aladei libi fu den Dyu, èn sosrefi den tra gebow di ben de wan pisi fu a snoga noso di ben de na a srefi presi drape. Den ben gebroiki den gebow disi gi difrenti sani. Son leisi den ben hori krutu drape, èn sosrefi konmakandra di ben abi fu du nanga a libimakandra. Boiti dati, den ben hori bigi konmakandra tu pe den ben nyan na ini den spesrutu nyanyan-kamra di ben de wan pisi fu a gebow. Son leisi sma di ben teki waka fu go na tra presi, ben kan sribi drape tu na ini den spesrutu kamra di den ben meki na tapu a prasi fu a snoga.

Na ini pikinmoro ibri foto, a snoga ben abi wan skoro tu, di nofo tron ben de na ini a srefi gebow. Wi kan prakseri kaba fa a ben de fu si wan kamra di lai nanga yongu studenti, di e leri fu leisi den bigi letter di wan leriman skrifi na tapu wan skrifiplanga di ben abi kandrafatu na tapu. Den skoro disi ben de wan prenspari reide fu san ede den Dyu fu owruten ben sabi leisi èn skrifi. Srefi den sma di no ben de prenspari ben sabi den Buku fu Bijbel.

Ma a moro prenspari sani di sma ben du na ini a snoga, ben de fu anbegi Gado doronomo. Fu dati ede, a no e fruwondru wi taki den konmakandra fu den Kresten fu a fosi yarihondro ben de pikinmoro a srefi leki den konmakandra di den Dyu ben hori na ini den snoga. Na a srefi fasi, sma ben go na den Kresten konmakandra fu anbegi Yehovah. Drape den ben begi, den ben singi prèisesingi, den ben leisi èn taki fu Gado Wortu. A no dati wawan ben de a srefi. Na den presi disi fu anbegi, sma ben man pai den kostu fu di den ben gi moni nanga den heri ati. Boiti dati, a no den kerki fesiman wawan ben abi a grani fu leisi èn taki fu Gado Wortu. Na ini a snoga èn sosrefi na den Kresten konmakandra, owru man ben de di man tyari frantwortu, èn na den ben orga èn seti sani drape.

Yehovah Kotoigi na ini a ten disi e du muiti fu hori den konmakandra na a srefi fasi soleki fa Yesus nanga den bakaman fu en fu a fosi yarihondro ben du. Sobun, wan tu sani di den e du na den konmakandra di e hori na ini den Kownukondre zaal, de a srefi leki den sani di sma ben du na den konmakandra na ini den fositen snoga. Ma neleki fa a ben de ala ten nanga sma di lobi san tru, na so a prenspari tu gi den Kotoigi fu kon makandra so taki den kan „kon krosibei na Gado”.—Yakobus 4:8.

[Prenki na tapu bladzijde 16, 17]

A prenki disi meki soleki fa sma ben seti sani fu bow a Gamla snoga na ini a fosi yarihondro

[Prenki na tapu bladzijde 18]

Den skoro na den snoga ben gi leri na boi fu sowan 6 yari te go miti 13 yari