Abi bribi neleki den

Masra leri en san a wani taki fu gi pardon

NOITI Petrus ben o frigiti o hebi a ben de gi en na a momenti di en ai miti nanga di fu Yesus. A de so taki a ben si na Yesus en fesi taki a ben sari fu a sani di a du èn taki a ben gi en syen? Wi no kan de seiker, fu di Bijbel e taki nomo dati „Masra drai luku Petrus” (Lukas 22:61). Ma na a momenti dati di Yesus luku Petrus, a si o bigi a fowtu de di a ben meki. A ben frustan taki a du a sani di Yesus ben taki na fesi, iya, a du a wán sani di a ben taki dati a no ben o du noiti. A ben taki dati a no sabi a Masra fu en di a ben lobi. Petrus ben brokosaka srefisrefi, èn kande disi ben de a moro hebi momenti fu en libi noso a moro takru dei fu en libi.

Ma disi no ben wani taki dati yepi no de moro gi en. Fu di Petrus ben de wan man di ben abi wan tranga bribi, meki a ben abi na okasi ete fu sori berow gi a fowtu di a ben meki èn a ben kan leri wan fu den moro prenspari sani di Yesus ben wani leri en. A sani dati abi fu du nanga a gi di a musu gi pardon. Ibriwan fu wi musu leri a srefi sani disi. Fu dati ede, meki wi go luku san Petrus du fu leri a muilek sani disi.

Wan man di ben musu leri furu

Sowan siksi mun na fesi, di Petrus ben de na ini Kaperna-um, a foto pe a ben e tan, dan Petrus go na Yesus èn a aksi en: „Masra, omeni tron mi musu gi mi brada pardon te a sondu teige mi? Mi musu du dati te nanga seibi tron?” Kande Petrus ben denki taki a ben gi trawan pardon furu leisi. Fu taki en leti, den kerki fesiman fu a ten dati ben denki taki den ben musu gi wan sma pardon dri leisi nomo! Yesus taigi Petrus: „A no te nanga seibi tron, ma te nanga seibitenti na seibi tron.”—Mateyus 18:21, 22.

A de so taki Yesus ben wani Petrus fu go teri omeni leisi wan sma sondu teige en? Nôno, di Yesus taigi Petrus taki a musu gi pardon 77 tron, dan Yesus ben wani sori Petrus taki a no ben musu teri omeni leisi a gi pardon. Yesus ben sori taki Petrus ben abi a denki di furu sma na ini a ten dati ben abi. Nofo tron sma no ben e firi gi trawan èn den no ben lobi fu gi pardon. A ben de leki den ben e teri omeni leisi den gi pardon, neleki fa wan sma di e luku moni tori e teri omeni moni sma musu pai en. Ma wi musu gi sma pardon furu leisi soleki fa Gado wani dati.

Petrus no ben haritaki nanga Yesus. Ma a sani disi di Yesus leri en, ben doro en ati trutru? Son leisi wi e leri moro bun fu gi pardon, te wi e frustan o tranga a de fanowdu taki wisrefi kisi pardon. Meki wi go luku baka san ben pasa bifo Yesus dede. Na den muilek momenti dati, Petrus du furu sani di meki taki en Masra ben musu gi en pardon.

A ben musu kisi pardon furu leisi

A ben de wan tumusi prenspari neti. Disi ben de a lasti neti fu Yesus en libi na grontapu. Yesus ben abi furu sani ete fu leri den apostel fu en. Fu eksempre, a ben musu leri den fu abi sakafasi. Yesus gi den na eksempre, fu di na wan sakafasi a wasi den futu fu den. Disi ben de wan wroko di den moro lagi futuboi ben gwenti du. Na a bigin Petrus no ben frustan fu san ede Yesus ben du dati. Baka dati a no ben wani taki Yesus wasi en futu. Ne a ben de nomonomo taki Yesus no wasi  en futu wawan, ma sosrefi en anu nanga en ede! Yesus no ben lasi pasensi nanga en, ma na wan switi fasi a fruteri en o prenspari a sani de di a ben e du, èn san dati ben wani taki.—Yohanes 13:1-17.

Ma syatu baka dati, den apostel bigin haritaki suma fu den ben de a moro bigiwan. A no de fu taki dati Petrus ben de na ini a haritaki tu, wan sani di e sori taki den abi bigifasi. Ma toku, Yesus piri-ai gi den na wan switi fasi èn a prèise den gi den sani di den ben du bun. A sori taki den ben tan horibaka gi a Masra fu den. Ma Yesus ben taki tu dati den alamala ben o gowe libi en. Petrus ben taki dati a ben o tan nanga Yesus, srefi efu a ben musu dede. Ma Yesus ben taki dati na a srefi neti dati bifo wan kakafowru bari tu leisi, Petrus ben o taki dri leisi dati a no sabi en Masra. Petrus taki dati noiti a ben o du dati nanga Yesus, èn a ben meki bigi srefi taki awansi den tra apostel ben o gowe libi en, toku en no ben o du dati!—Mateyus 26:31-35; Markus 14:27-31; Lukas 22:24-28.

Yesus ben lasi pasensi nanga Petrus èn bari en? Fu taki en leti, na a muilek ten disi, Yesus ben tan luku den bun fasi fu den apostel fu en di ben meki fowtu. Yesus ben sabi taki Petrus ben o sondu teige en, ma toku a ben taki: „Mi begi fayafaya gi yu taki yu no o lasi a bribi fu yu; te yu drai kon baka, dan yu musu tranga den brada fu yu” (Lukas 22:32). Na so fasi, Yesus sori taki a ben abi a frutrow taki Petrus ben o kisi ensrefi baka èn a ben o tan du a diniwroko fu en go doro. Dati na trutru wan moi fasi fu gi pardon!

Bakaten na ini a dyari fu Getseimanei, Petrus ben musu kisi piri-ai moro leki wán leisi. Yesus ben aksi en, èn sosrefi Yakobus nanga Yohanes, fu tan na ai aladi a ben e begi. Yesus ben sari srefisrefi èn a ben de fanowdu taki trawan horibaka gi en, ma ibri leisi baka Petrus nanga den trawan fadon na sribi. Yesus sori taki a frustan den èn taki a gi den pardon, di a taki: „A tru taki a yeye wani, ma a skin swaki.”—Markus 14:32-38.

Syatu baka dati, wan grupu sma doro nanga frambo, feti-owru, nanga kodya. Disi ben de wan momenti fu luku bun èn fu handri nanga koni. Ma toku, sondro fu denki Petrus hari en feti-owru èn a koti a yesi puru fu Malkus, wan srafu fu a granpriester. Sondro fu bari en, Yesus piri-ai gi Petrus, a dresi a man en yesi, èn a taki fu wan gronprakseri di e sori taki feti no bun. Te na a dei fu tide, den bakaman fu en e hori densrefi na a gronprakseri disi (Mateyus 26:47-55; Lukas 22:47-51; Yohanes 18:10, 11). Yesus ben musu gi Petrus pardon gi furu sani kaba. Kande a tori disi e meki wi prakseri taki „wi alamala e sondu furu tron” (Yakobus 3:2). Suma fu wi no musu kisi pardon fu Gado ibri dei? Ma gi Petrus, moro sani ben o pasa ete na a neti disi. A ben o meki wan moro bigi fowtu.

A moro bigi fowtu fu Petrus

Yesus ben taki nanga a grupu sma, èn a taigi den taki efu na en den e suku, dan den musu libi den apostel fu en meki den gowe. Sondro fu man du wan sani, Petrus ben e luku fa den sma tai Yesus. Baka dati Petrus lon gowe, èn sosrefi den tra apostel.

Kande di Petrus nanga Yohanes kon krosibei fu na oso fu Anas, di ben de granpriester fosi, den tapu fu lon. Na drape sma ben tyari Yesus go fosi fu poti aksi gi en. Di den tyari Yesus gowe fu drape, dan Petrus nanga Yohanes go tu, ma den „ben tan waka moi fara na en baka” (Mateyus 26:58; Yohanes 18:12, 13). Petrus no ben de wan fredeman. A no de fu taki dati wan sma musu abi deki-ati fu waka baka Yesus. Den sma ben abi feti-owru, èn Petrus ben gi wan fu den mankeri kaba. Ma toku, wi no e si dyaso taki Petrus tan sori taki a lobi en Masra soleki fa ensrefi ben taki. Iya, a ben taki dati a de klariklari fu dede srefi na sei en Masra efu a ben de fanowdu.—Markus 14:31.

Neleki Petrus, furu sma na ini a ten disi e suku fu waka baka Krestes, ma den e du dati „moi fara”, noso den e du dati na so wan fasi taki tra sma no si dati. Ma soleki fa Petrus srefi ben skrifi  bakaten, a wan-enkri fasi fu waka bun baka Krestes na fu tan krosibei fu en, fu di wi e teki na eksempre fu en na ini ala sani, awansi sortu bakapisi dati o abi.—1 Petrus 2:21.

Te fu kaba, Petrus doro na a portu fu wan fu den moro bigi èn moi oso na ini Yerusalem. A ben de na oso fu Kayafas, a gudu èn makti granpriester. Nofo tron den oso disi ben bow lontu wan dyari, èn wan portu ben de na fesisei. Petrus ben doro na a portu, ma a no ben mag go na inisei. Yohanes di ben de na inisei kaba, ben kon èn a taki nanga a waktiman fu meki Petrus kon na inisei. Soleki fa a sori, dan Petrus no ben tan krosibei fu Yohanes, èn a no ben du muiti tu fu go na inisei fu na oso so taki a ben kan go tanapu na sei en Masra. Petrus ben tan na ini a dyari, pe wan tu srafu nanga futuboi ben tanapu lontu wan faya na ini a kowru neti. A ben e luku fa falsi kotoigi ben e go-kon fu taki teige Yesus na a krutu di ben hori na inisei.—Markus 14:54-57; Yohanes 18:15, 16, 18.

Na ini a leti fu a faya, a meisje di ben meki Petrus kon na inisei, ben man si en moro bun. A meisje ben sabi en. Ne a taki: „Yu ben de tu nanga Yesus, a Galileasma!” Fu di Petrus no ben fruwakti disi, meki a taki dati a no sabi Yesus, èn a ben du srefi leki a no ben sabi fu san a meisje ben e taki. Petrus go tanapu krosibei fu a portu, fu di a no ben wani sma si en, ma wan tra meisje si en èn a taki a srefi sani tu. A meisje ben taki: „A man disi ben de nanga Yesus fu Nasaret.” Petrus sweri taki: „Mi no sabi a man!” (Mateyus 26:69-72) A kan taki baka di Petrus taki fu a di fu tu leisi dati a no sabi Yesus, a yere wan kakafowru bari. Ma tra sani ben de na en ede, di meki taki a no ben memre san Yesus ben taki wan tu yuru na fesi nomo.

Syatu baka dati, Petrus ben e pruberi ete fu du sani so taki sma no poti prakseri na en. Ma wan grupu sma di ben tanapu lontu a dyari, waka kon na en. Wán fu den sma disi ben de wan famiri fu Malkus, a srafu di Petrus ben koti en yesi puru. A taigi Petrus: „A no yu nanga en mi si na ini a dyari?” Petrus ben feni taki a ben musu overtoigi den taki den no ben abi leti. Fu dati ede a sweri taki a no en, èn kande a ben taki srefi dati wan fluku musu kon na en tapu efu a ben e lei. Fa a kaba taki den sani dati, wan kakafowru bari, iya, a ben de a di fu tu leisi di Petrus yere kakafowru bari a neti dati.—Yohanes 18:26, 27; Markus 14:71, 72.

Ne Yesus kon na dorosei na a balkon pe a ben kan luku go na ini a dyari. Na a momenti dati, soleki fa a skrifi na a bigin, dan en ai miti nanga di fu Petrus. Petrus frustan na a momenti dati o seryusu a sondu teige en Masra. Petrus gowe fu a dyari, èn a ben hati en srefisrefi taki a meki so wan bigi fowtu. A go na tapu den strati fu a foto, èn a ben man si pe a ben e go fu di a leti fu a mun di ben e saka, ben skèin ete. A ben de neleki a si ala den sani di pasa a neti dati, na en fesi baka. En ai kon furu nanga watra. Ne a bari krei.—Markus 14:72; Lukas 22:61, 62.

 Te wan sma meki so wan fowtu èn a frustan o seryusu dati de, dan a kan denki makriki taki a sondu fu en bigi so te, taki a no kan kisi pardon. A kan taki Petrus ben denki so tu. Petrus ben kan kisi pardon gi a sani di a du?

Petrus ben kan kisi pardon gi a sani di a du?

A muilek fu frustan o hebi a sani disi ben de gi Petrus di a son bigin opo èn tra sani ben musu pasa ete. A ben musu denki na ensrefi taki a no handri bun kwetikweti di Yesus dede a bakadina dati, baka di a nyan pina furu yuru langa. A ben musu de so taki a ben hebi srefisrefi gi Petrus te a ben denki ibri leisi baka fa a ben meki en Masra sari moro tapu a lasti dei fu En libi leki libisma. Aladi Petrus ben sari srefisrefi, toku a no ben gi abra. Wi sabi disi, fu di a tori e taki dati syatu baka dati a ben de makandra nanga den brada fu en (Lukas 24:33). A no de fu taki dati ala den apostel ben sari fu a fasi fa den handri tapu a neti dati di so furu sari sani pasa. A musu de so taki den ben trowstu makandra tu.

Te yu luku en bun, dan Petrus e teki wan koni bosroiti na a momenti dati. Te wan futuboi fu Gado fadon fu di a meki wan fowtu, dan san de moro prenspari a no a fowtu di a meki, ma na a tranga muiti di a e tan du fu opo baka èn fu meki sani kon bun baka (Odo 24:16). Petrus ben sori trutru bribi di a kon makandra nanga den brada fu en, aladi a ben brokosaka. Te wan sma e sari noso a e hati en taki a du wan sani, dan a o wani de en wawan, ma a sani disi no bun kwetikweti (Odo 18:1). A de wan koni sani fu tan krosibei fu wi brada nanga sisa èn fu kisi a krakti baka di de fanowdu fu tan dini Gado.—Hebrewsma 10:24, 25.

Fu di Petrus ben de nanga den tra disipel, meki a ben skreki fu yere taki Yesus en skin no ben de moro na ini a grebi. Petrus nanga Yohanes ben lon go na a grebi pe Yesus ben beri èn a grebi ben tapu. Soleki fa a sori, dan Yohanes di ben de moro yongu, ben doro drape fosi. Di a si taki a grebi ben opo, a draidrai fu go na inisei. Ma Petrus no draidrai. Aladi en blo ben de na tapu, toku a waka go langalanga na ini a grebi. A grebi ben leigi!—Yohanes 20:3-9.

 Petrus ben bribi taki Yesus kisi wan opobaka? Na a bigin a no ben bribi dati, aladi wan tu umasma di ben de disipel tu ben fruteri taki engel ben kon na den fu meki bekènti taki Yesus opo baka fu dede (Lukas 23:55–24:11). Ma na a kaba fu a dei dati, Petrus no ben e sari èn tweifri moro. Yesus ben de na libi now, èn a ben de wan makti yeye! Yesus sori ensrefi na fesi ala den apostel fu en. Ma a du wan tra sani fosi, sondro taki den trawan ben de drape. A dei dati den apostel ben taki: „Masra opo baka trutru, èn a sori ensrefi na Simon!” (Lukas 24:34) Na so a de tu taki na apostel Paulus ben skrifi bakaten fu a kefalek dei di Yesus ben „sori ensrefi na Seifas, èn baka dati na den twarfu apostel” (1 Korentesma 15:5). Seifas nanga Simon na tra nen gi Petrus. Yesus ben sori ensrefi na en, kande di Petrus ben de en wawan.

Bijbel no e taki san pasa na a aparti momenti dati di Yesus nanga Petrus miti baka. Wi kan frustan taki Petrus ben breiti srefisrefi fu si a Masra fu en di a lobi, na libi baka. Boiti dati, a ben abi na okasi tu fu sori taki a ben sari fu a fowtu di a meki, èn fu sori berow. Moro leki iniwan sani, a ben wani kisi pardon. Tweifri no de taki Yesus gi en pardon trutru. Kresten na ini ten disi, di fadon na ini wan sondu, musu hori na eksempre fu Petrus na prakseri. Noiti wi musu denki taki a sondu fu wi bigi so te, taki wi no man kisi pardon fu Gado. Yesus na wan tumusi bun eksempre fu en Tata, di ’o gi pardon nanga en heri ati’.—Yesaya 55:7.

Tra buweisi di e sori taki a kisi pardon

Yesus ben taigi den apostel fu en fu go na Galilea, pe den ben o miti nanga en baka. Di den doro drape, Petrus bosroiti fu go fisi na a Se fu Galilea. Wan tu tra sma ben go makandra nanga en. Agen baka, Petrus ben de na tapu a se pe a ben de furu leisi fosi. A musu de so taki a ben switi gi en fu de baka na ini a boto na tapu a watra, fu si fa den skwala ben naki kon, èn fu hari den nèt kon nanga en anu. A de so taki a neti dati a ben e aksi ensrefi san a ben o du nanga en libi now di Yesus en diniwroko na grontapu kon na wan kaba? A ben o wani du a fisiman wroko baka? Awansi fa a no fa, a neti dati den no fanga nowan fisi.—Mateyus 26:32; Yohanes 21:1-3.

Ma na deibroko, wan sma na syoro ben bari gi den fu trowe den nèt na a tra sei fu a boto. Di den du dati, den hari 153 fisi kon na ini a boto! Petrus ben sabi suma ben de a sma dati na syoro. Petrus dyompo komoto fu a boto èn a swen go na syoro. Na syoro, Yesus gi en wan fisi fu nyan, di a ben losi na tapu krofaya. Yesus ben poti ala en prakseri na Petrus.

Yesus aksi Petrus efu a ben lobi en Masra „moro den wan disi”. Kande a ben sori go na a bigi ipi fisi di den fanga. A ben de so taki na ini Petrus en ati, a ben lobi a fisi bisnis moro leki Yesus? Neleki fa Petrus ben taki dri leisi dati a no sabi en Masra, na so Yesus gi en na okasi now fu sori dri leisi na fesi den trawan taki a lobi en Masra. Di Petrus du dati, Yesus taigi en fa fu sori a lobi dati. A ben musu poti a santa diniwroko fu en na fesi ala tra sani, a ben musu gi nyanyan na den skapu fu Krestes, èn a ben musu luku den bakaman disi di ben tan gi yesi.—Yohanes 21:4-17.

Na so fasi Yesus sori krin taki en nanga en Tata ben kan gebroiki Petrus ete na ini a diniwroko. Petrus ben o du wan prenspari wroko na ini a gemeente di de na ondro a tiri fu Krestes. Disi na  wan bigi buweisi di e sori taki Yesus gi Petrus trutru pardon! A no de fu taki dati a sari-ati di Yesus sori en, naki en ati trutru.

Furu yari langa Petrus tan du a diniwroko fu en sondro fu tapu. A gi den brada fu en deki-ati, soleki fa Yesus ben gi en a komando fu du na a mofoneti fosi a dede. Na wan switi fasi èn nanga pasensi Petrus tiri èn a gi nyanyan na den skapu, noso bakaman fu Krestes. A man disi ben nen Simon, ma Yesus ben kari en Petrus, san wani taki Bigi Ston. Iya, Petrus trutru ben de dati, fu di a ben tanapu kánkan sondro fu degedege, èn ben abi bun krakti tapu a gemeente. Furu buweisi de di e sori taki dati tru èn den de fu feni na ini den tu moi brifi di Petrus skrifi. Den brifi dati kon tron prenspari buku na ini Bijbel. Den brifi dati e sori tu taki Petrus noiti no frigiti san a leri fu Yesus te a abi fu du nanga a gi di wi musu gi pardon.—1 Petrus 3:8, 9; 4:8.

Meki wi leri fu gi pardon tu. Wi e aksi Gado pardon ibri dei fu den furu fowtu di wi e meki, a no so? Wi e bribi taki a gi wi pardon trutru èn taki wi no abi fu firi sari moro fu wan sondu gi san wi kisi pardon kaba? Wi e gi trawan pardon tu? Efu wi e du den sani dati, dan wi sa teki na eksempre fu a bribi di Petrus sori, èn sosrefi a sari-ati di en Masra sori.

[Prenspari pisi na tapu bladzijde 22]

Yesus ben musu gi Petrus pardon gi furu sani, ma suma fu wi no musu kisi pardon ibri dei?

[Prenki na tapu bladzijde 23]

„Masra drai luku Petrus”

[Prenki na tapu bladzijde 24]

„Masra . . . sori ensrefi na Simon!”