San Yesus ben leri sma fu Gado

„A wan-enkri sma di sabi a Papa trutru, na a Manpikin. Ma a Manpikin wani fruteri tra sma fu a Papa, so taki den kan sabi En tu.”—LUKAS 10:22, CONTEMPORARY ENGLISH VERSION.

BIFO a fosi Manpikin fu Gado kon na grontapu, a ben libi bun langa nanga en Papa na hemel, pe den ben abi krosibei demakandra (Kolosesma 1:15). Na so fasi a Manpikin kon sabi fa en Papa e denki, e firi, èn fa a e du sani. Bakaten di a Manpikin disi kon na grontapu, leki a man Yesus, dan a ben de fayafaya fu fruteri sma den tru tori fu en Papa. Wi kan leri furu fu Gado te wi e arki san a Manpikin disi ben taki.

A nen fu Gado A nen fu Gado, Yehovah, ben de tumusi prenspari gi Yesus. A lobi Manpikin disi ben wani taki tra sma kon sabi a nen fu en Papa, èn taki den gebroiki a nen dati tu. A nen fu Yesus srefi wani taki „Yehovah na frulusu”. Tapu a neti bifo Yesus dede, a ben man taigi Yehovah na ini begi: „Mi meki yu nen bekènti” (Yohanes 17:26). A no wan tumusi moi sani taki Yesus ben gebroiki a nen fu Gado èn taki a ben meki en bekènti na trawan? A no de fu taki dati den sma di ben e arki Yesus, no ben o man frustan den tru tori fu Yehovah efu den no ben sabi san na a nen fu En èn san a nen dati wani taki. *

A bigi lobi fu Gado Wan leisi Yesus ben begi Gado: „Mi Tata, . . . yu ben lobi mi bifo yu seti grontapu” (Yohanes 17:24). Di Yesus ben de na hemel, a ondrofeni taki Gado lobi en, èn di a ben de na grontapu a ben suku fu sori a tumusi moi lobi dati na difrenti fasi.

Yesus ben sori taki a lobi fu Yehovah bigi srefisrefi. A ben taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yohanes 3:16). Iya, Gado lobi ala libisma na grontapu. A lobi disi bigi so te, taki a gi en Manpikin di a lobi srefisrefi, so taki libisma di e gi yesi na En kan kon fri fu sondu nanga dede èn den kan abi a howpu fu libi fu têgo. Wi no man frustan krin o bigi a lobi fu Gado de.—Romesma 8:38, 39.

Yesus tyari wan tumusi prenspari tori kon na krin. Dati na taki Yehovah lobi ibriwan fu den anbegiman fu en. Yesus ben leri taki Yehovah de leki wan skapuman di e warderi ibriwan fu den skapu fu en di difrenti fu makandra (Mateyus 18:12-14). Yesus ben taki dati nowan pikin fowru kan fadon na gron sondro taki Yehovah sabi dati. Yesus ben taki moro fara: „A Tata teri srefi ala den wiwiri na tapu un ede” (Mateyus 10:29-31). Efu Yehovah man sabi taki wán pikin fowru e misi na ini wan nesi, dan a no de fu taki dati a e si san e pasa nanga ibriwan fu den anbegiman fu en èn a e broko en ede nanga den, a no so? Boiti dati, efu Yehovah man teri ibri wiwiri na tapu wi ede, dan a no de fu taki dati nowan sani de na ini wi libi di a no e si. Iya, a e si san wi abi fanowdu, san na den problema fu wi, èn san na den broko-ede fu wi.

Hemel Tata Soleki fa wi si na ini den artikel na fesi, Yesus na a wan-enkri Manpikin fu Gado. Fu dati ede a no e fruwondru wi taki nofo tron a lobi Manpikin disi ben kari Yehovah en „Tata”. Fu taki en leti, na ini den fosi sani di skrifi fu Yesus, a e kari Yehovah „mi Tata”, di a ben abi 12 yari nomo èn di a ben  de na ini a tempel (Lukas 2:49). A wortu „Tata” skrifi pikinmoro 190 leisi na ini den Evangelietori. Na difrenti leisi Yesus ben kari Yehovah „un Tata”, „wi Tata”, èn „mi Tata” (Mateyus 5:16; 6:9; 7:21). Fu di Yesus ben gwenti kari Yehovah na a fasi disi, meki a sori taki sondu libisma man kon abi wan bun matifasi nanga Yehovah.

A abi sari-ati èn a de klariklari fu gi pardon Yesus ben sabi taki sondu libisma abi a sari-ati fu Yehovah fanowdu. Na ini na agersitori fu a lasi manpikin, Yesus e agersi Yehovah nanga wan papa di abi sari-ati, èn di de klariklari fu gi pardon. A papa disi e opo en anu brasa en manpikin di drai kon baka fu di a abi berow (Lukas 15:11-32). Sobun, den wortu fu Yesus e gi wi a dyaranti taki Yehovah e luku na ati fu wan sondu libisma fu si efu a abi berow. Na so fasi A kan sori en sari-ati. Yehovah de klariklari fu gi pardon na wan sondusma di abi berow. Yesus e taki: „Mi e taigi unu taki moro prisiri o de na hemel te wán sondari abi berow, leki te neigitenti na neigi regtfardiki sma no abi berow fanowdu” (Lukas 15:7). A no de fu taki dati wi alamala ben o lobi so wan Gado di e abi sari-ati, a no so?

A e arki begi Bifo Yesus kon na grontapu, a ben si taki Yehovah „e arki begi”, èn taki A e prisiri nanga den begi fu den anbegiman fu en di e tai hori na en (Psalm 65:2). Fu dati ede, di Yesus ben e du a diniwroko fu en, a leri den arkiman fu en fa fu begi, èn san den musu aksi te den e begi. A gi den a rai fu „no taki den srefi sani ibri leisi baka”. Yesus gi den arkiman fu en a deki-ati fu begi taki a wani fu Gado „pasa na grontapu soleki fa a e pasa na hemel”. Wi kan begi Gado tu fu gi wi san wi abi fanowdu ibri dei, fu gi wi pardon fu wi sondu, èn fu yepi wi fu kakafutu gi tesi (Mateyus 6:5-13). Yesus leri wi taki neleki fa wan papa e arki en pikin, na so Yehovah e arki den begi fu en futuboi. Iya, a e piki den begi fu den di komoto fu den ati èn di e sori taki den abi bribi.—Mateyus 7:7-11.

Wi kan de seiker taki Yesus ben pruberi fu leri sma den tru tori fu Yehovah èn fu sori den sortu Gado a de. Ma Yesus ben de fayafaya fu fruteri sma wan tra sani tu di abi fu du nanga Yehovah. Dati na a sani di Yehovah o gebroiki fu tyari kenki kon na heri grontapu, so taki a wani fu En gi grontapu nanga libisma, kon tru. Fu taki en leti, a sani disi na ini a boskopu fu Yesus, ben de a moro prenspari sani fu san a ben preiki.

[Futuwortu]