Sani di sma e fruteri fu Yesus—San tru èn san no tru
Sani di sma e fruteri fu Yesus—San tru èn san no tru
SAN YU E PRAKSERI? DEN SANI DI SKRIFI DYASO TRU NOSO DEN NO TRU?
Yesus gebore tapu 25 december.
Dri koniman ben go luku Yesus na a ten di a gebore.
Yesus no ben abi brada nanga sisa.
Yesus ben de Gado di teki libisma skin.
Yesus ben de moro leki wan bun man nomo.
FURU sma ben o taki dati den sani di kari na tapusei, na sani di tru. Trawan e taki kande dati a muilek fu kon sabi seiker efu den sani dati tru, noso wi no man kon sabi den sani dati srefisrefi. Kande den e feni taki solanga yu e bribi na ini Yesus, a no abi trobi efu den sani dati tru.
Ma Bijbel e taki wan tra sani. A e gi wi a deki-ati fu kon abi „soifri sabi fu wi Masra Yesus Krestes” (2 Petrus 1:8). Wi o kon kisi a sabi dati te wi e ondrosuku den Evangelietori. Den e tyari kon na krin san tru te a abi fu du nanga Yesus. Na so fasi wi kan kon sabi san tru èn san no tru. Fu dati ede, meki wi go luku san den Evangelietori e sori fu den sani di sma e bribi, soleki fa a skrifi na tapusei.
SAN SMA E BRIBI: Yesus gebore tapu 25 december.
A SANI DISI TRU? NÔNO, A NO TRU.
Bijbel no e taki noti te a abi fu du nanga a mun noso a dei di Yesus gebore. We, dan pe sma komoto nanga 25 december? Soleki fa wan buku e taki, dan sma di ben kari densrefi Kresten „ben wani taki a dei dati ben fadon tapu a srefi dei te den Romesma ben gwenti hori wan fesa. . . . A fesa dati ben de tapu a fosi dei te a son ben tanapu moro hei na loktu èn te a leti fu a son ben skèin moro langa” (The Encyclopædia Britannica). A srefi buku disi e taki dati furu fu den sani di sma gwenti du na Kresneti komoto fu „heiden gwenti di abi fu du nanga a prani di den ben prani gron èn nanga na anbegi fu a son”.
Yesus ben o feni en bun te sma e hori wan fesa tapu 25 december fu memre a dei di a gebore? Prakseri a sani disi: Sma no sabi tapu sortu dei Yesus gebore. Nowan tekst na ini Bijbel e taigi wi fu memre a dei di a gebore, èn nowan buweisi de di e sori taki den fosi Kresten ben du dati. Tra fasi leki dati, Bijbel e sori krin tapu sortu dei Yesus dede, èn a gi den bakaman fu en a komando fu memre a dei dati (Lukas 22:19). * A de krin fu si taki Yesus no ben feni a dei di a gebore prenspari, ma a sori taki a dede di a dede leki wan ofrandi, prenspari.—Mateyus 20:28.
SAN SMA E BRIBI: Dri koniman (noso kownu, soleki fa son sma e bribi) ben go luku Yesus na a ten di a gebore.
A SANI DISI TRU? NÔNO, A NO TRU.
Kande yu si prenki noso tra sani di e sori taki na a ten di Yesus gebore, a ben e didon na ini wan baki pe meti e nyan na ini èn taki dri koniman ben tanapu lontu en nanga kado. Ma a sani disi no tru.
A tru taki wan tu sma fu Owstusei ben kon gi grani na Yesus di a ben yongu. Ma fu taki en leti, den fisitiman disi trutru ben de lukuman di ben e ondrosuku den stari fu sabi san o pasa (Mateyus 2:1). A de so taki den ben feni Yesus e didon na ini a nyanyan baki? Nôno, den ben go luku en na ini wan oso. Soleki fa a sori, dan den ben doro wan tu mun, baka di Yesus gebore.—Mateyus 2:9-11.
Te a abi fu du nanga den fisitiman, dan omeni fu den ben de trutru? Na tu, noso dri, noso 30 fu den ben de? Bijbel no e taki omeni fu den ben de. Kande sma gwenti taki dati na dri fu den ben de, fu di den e leisi taki den man tyari dri sortu kado (Mateyus 2:11). * Son sma e taki srefi dati ibriwan fu den dri koniman, soleki fa den e kari den man disi, e prenki wan tra ras. Ma a sani dati no skrifi na ini Bijbel. Na presi fu dati, wan buku e taki dati a tori disi na „wan anansitori di wan historia skrifiman fu a di fu aiti yarihondro, ben meki”.
SAN SMA E BRIBI: Yesus no ben abi brada nanga sisa.
A SANI DISI TRU? NÔNO, A NO TRU.
Den Evangelietori e sori krin taki Yesus ben abi brada nanga sisa. Na Evangelietori fu Lukas e taki dati Yesus ben de a „fosi manpikin” fu Maria. Disi e sori taki bakaten Maria ben meki tra pikin (Lukas 2:7). * Na Evangelietori fu Markus e taki dati son sma fu a foto Nasaret ben taki dati Yesus no ben de prenspari fu di a ben de leki den brada nanga sisa fu en. Den ben taki: „Na En na a brada fu Yakobus, Yosef, Yudas, nanga Simon. Den sisa fu En e libi dyaso na un mindri.”—Markus 6:3, Nyun Testamenti; Mateyus 12:46; Yohanes 7:5.
Aladi den Evangelietori e sori dati krin, toku furu sabiman fu kerkitori e tan nanga a prakseri taki Yesus no ben abi brada nanga sisa. Sonwan fu den e taki dati den brada nanga sisa di kari na ini Bijbel, na pikin fu Yesus en omu noso tanta. * Trawan e taki dati den brada nanga sisa ben de pikin di Yosef ben abi kaba fosi a trow nanga Maria. Ma prakseri a sani disi: Efu Yesus ben de a wan-enkri pikin fu Maria, dan den sma fu Nasaret ben o taki fu den brada nanga sisa fu Yesus? Tra fasi leki dati, sonwan fu den ben si kande nanga den eigi ai di Maria ben de nanga bere fu den tra pikin. Den ben sabi taki Yesus ben de wan fu den furu pikin di Maria ben meki.
SAN SMA E BRIBI: Yesus ben de Gado di teki libisma skin.
A SANI DISI TRU? NÔNO, A NO TRU.
Langa ten kaba, sma e bribi taki Gado kon na grontapu èn libi dyaso leki a man Yesus. A sani disi na a moro prenspari pisi fu a leri fu a Dri-wánfasi, noso a leri di e taki dati a Tata, a Manpikin nanga a santa yeye na wán sma. Ma a leri disi no bigin na a ten di Yesus ben de na grontapu. Na presi fu dati, wan buku e taki: „A wortu Dri-wánfasi noso a leri dati no skrifi na ini a Nyun Testamenti . . . Safrisafri sma ben kon nanga a leri disi na ini den hondrohondro yari di pasa, aladi den sani dati no e kruderi nanga makandra” (The Encyclopædia Britannica).
Fu taki en leti, kerki e lagi Yesus te den e taki dati en ben de Gado di teki libisma skin. * Fa so? Luku wan eksempre. Kon meki wi taki dati wan tu wrokoman e aksi den basi wan sani, ma a basi e taki dati a no abi a makti fu du dati. Efu a sani di a basi taki tru, dan a sori na wan koni fasi taki a no man du ala sani. Efu a sani di a taki no tru, noso efu a man du a sani di den wrokoman aksi en, ma a e bosroiti fu no du dati, dan na kori a e kori den.
We, san Yesus taki di tu fu den apostel fu en ben wani kisi wan hei posisi? A taigi den: „A no mi musu taki suma kan go sidon na mi reti-anusei èn suma kan go sidon na mi kruktu-anusei, ma na mi Tata sreka a presi dati gi suma a wani” (Mateyus 20:23). Efu Yesus trutru ben de Gado, dan a sani dati ben o de wan lei, a no so? Na presi fu dati, di Yesus sori go na a Sma di abi moro makti, dan na wan heri moi fasi a sori taki a abi sakafasi, èn taki a no de a srefi leki Gado.
SAN SMA E BRIBI: Yesus ben de moro leki wan bun man nomo.
A SANI DISI TRU? IYA, A TRU.
Yesus ben taki krin dati en ben de moro leki wan bun man nomo. A ben taki: „Mi na Gado Manpikin” (Yohanes 10:36). A no de fu taki dati iniwan sma ben kan taki dati en na a Manpikin fu Gado. Ma efu a sani disi di Yesus taki no tru, dan a no ben o de wan bun man, a no so? Iya, a ben o de wan bigi leiman!
Gado srefi sori taki a sani di Yesus taki tru. Gado ben taki tu leisi fu Yesus: „Disi na mi Manpikin” (Mateyus 3:17; 17:5). Prakseri a sani disi: Bijbel e sori taki na wan tu okasi nomo Gado en eigi sten ben de fu yere na grontapu, èn na tu fu den okasi dati a ben taki krin dati Yesus na en Manpikin. Disi na a moro bun buweisi di e sori taki Yesus ben de trutru suma a ben taki dati a de.
Na artikel disi tyari wan tu sani kon na krin gi yu di yu no ben sabi ete? Efu dati de so, dan fu san ede yu no e ondrosuku den Evangelietori moro fara? Te yu o du dati, dan dati kan gi yu prisiri èn a kan tyari wini kon tu. Boiti dati, Yesus srefi taki dati te wi e leri den tru tori di abi fu du nanga en èn nanga en Tata, dan dati wani taki „têgo libi”.—Yohanes 17:3.
[Futuwortu]
^ paragraaf 13 Yesus dede tapu a dei fu a Paskafesa, noso 14 Nisan, soleki fa a Dyu kalender e sori.—Mateyus 26:2.
^ paragraaf 18 Mateyus e taki dati den man disi di ben komoto fu tra kondre ben „puru den gudu fu den kon na doro” èn den ben gi Yesus gowtu, switismeri sani, nanga mirre. A moi fu si taki den diri kado dati ben kon na a yoisti ten, fu di syatu baka dati a famiri fu Yesus di ben pôti, ben musu lowe gowe.—Mateyus 2:11-15.
^ paragraaf 21 Aladi Maria ben kon de nanga bere fu Yesus na wan wondru fasi, toku a kisi den tra pikin fu en nanga en masra Yosef.—Mateyus 1:25.
^ paragraaf 22 A bribi disi, di kon fu Hièronimus na a pisi ten fu a yari 383, na wan prenspari sani gi den sma di e bribi taki Maria ben de wan nyunwenke en heri libi langa. Bakaten Hièronimus ben tweifri na a leri disi, ma furu sma tan poti bribi na ini dati, èn a de sosrefi wan leri fu a Lomsu Kerki.
^ paragraaf 26 Efu yu wani kon sabi moro fu a Dri-wánfasi leri, dan luku a brochure Moet u geloof stellen in de Drieëenheid? Yehovah Kotoigi tyari a brochure disi kon na doro.
[Faki/Prenki na tapu bladzijde 14]
Tra sani di yu no ben sabi kande
Fa Yesus ben de leki libisma? A ben de seryusu, a no ben firi gi sma, èn a no ben abi switifasi? A de so taki a no ben bemui nanga sma di no ben de prenspari? Son sma ben o taki dati na so a ben de. Kande na fu dati ede den e fruwondru fu sabi taki Yesus ben du den sani disi:
• A ben go na prisiri demakandra.—Yohanes 2:1-11.
• A ben e prèise sma.—Markus 14:6-9.
• A ben lobi fu de nanga pikin.—Markus 10:13, 14.
• A ben e krei aladi sma ben de na en lontu. —Yohanes 11:35.
• A ben e firi sari gi sma.—Markus 1:40, 41.