Yu ben sabi a sani disi?

Boiti Bijbel, sortu tra buweisi de taki Yesus ben libi trutru?

▪ Wan tu skrifiman di ben libi na ini a pisi ten fu Yesus ben taki fu en. Wan fu den ben de Cornelius Tacitus, di ben skrifi fu a historia fu Rome di den Kèiser ben e tiri. Na ini a yari 64, di wan faya bron Rome, dan Tacitus ben skrifi dati sma ben taki dati na Kèiser Nero ben meki a rampu disi pasa. Tacitus e taki dati Nero pruberi fu gi a fowtu na wan grupu sma di den ben kari Kresten. Tacitus skrifi: „A nen fu a grupu disi ben teki puru fu Krestes, di ben kisi dedestrafu fu a granman Pontius Pilatus, na a ten di Tiberius ben e tiri.”—Annals, XV, 44.

A historia skrifiman Flavius Josephus ben taki fu Yesus tu. A ben taki fu den sani di ben pasa na a pisi ten fu a yari 62 di Festus, a Rome tiriman fu Yudea, dede èn di Albinus ben teki a tiri abra. A ben taki dati Ananus (Ananias) „ben hori wan konmakandra nanga den krutuman fu a Sanhedrin èn a ben tyari a man di nen Yakobus, a brada fu Yesus di sma ben kari a Krestes, na fesi krutu. Boiti a man dati, a ben tyari trawan na fesi krutu tu”.—Jewish Antiquities, XX, 200 (ix, 1).

Fu san ede den ben kari Yesus, Krestes?

▪ Den Evangelietori e taki dati di na engel Gabrièl kon na Maria fu taigi en taki a ben o de nanga bere, dan a ben taigi en fu kari en manpikin, Yesus (Lukas 1:31). Disi ben de wan nen di den Dyu na ini Bijbel ten ben sabi fu di furu sma ben abi a nen dati. A historia skrifiman Josephus ben skrifi fu 12 tra sma, boiti den wan di skrifi na ini Bijbel, di ben abi a nen dati. Den ben kari a manpikin fu Maria, „Yesus fu Nasaret”, fu sori taki en na a Yesus di ben komoto fu Nasaret (Markus 10:47). Sma ben sabi en sosrefi leki „a Krestes” noso Yesus Krestes (Mateyus 16:16). San disi wani taki?

A Sranantongo wortu „Krestes” teki puru fu a Griki wortu Khri·stosʹ, di de a srefi leki a Hebrew wortu Ma·shiʹach (Mesias). Ala tu wortu wani taki „Salfuwan”. A ben fiti taki tra sma bifo Yesus ben abi a nen dati. Fu eksempre, Moses, Aron, nanga Kownu David ben salfu tu. Disi wani taki dati na Gado ben gi den frantwortu nanga makti (Lefitikus 4:3; 8:12; 2 Samuel 22:51; Hebrewsma 11:24-26). Yesus, a pramisi Mesias, ben de a moro prenspari sma di ben teki presi gi Yehovah. Fu dati ede, a fiti taki Yesus kisi a nen „Krestes, a Manpikin fu a libi Gado”.—Mateyus 16:16; Danièl 9:25.

[Prenki na tapu bladzijde 15]

Wan prenki fu Flavius Josephus