ALADI komediman lobi fu meki spotu nanga den problema di sma abi nanga a papa nanga mama fu den trowpatna, toku a sani disi a no wan lafutori. Reena, wan wefi na ini India, e taki: „Furu yari langa a mama fu mi masra ben e bumui na ini wi trowlibi. Nofo tron mi ben e puru mi atibron tapu mi masra, fu di mi no ben man du dati nanga en mama. A ben gersi leki ibri tron baka a ben musu luku fa fu plisi en wefi nanga en mama na a srefi ten.”

Fu san ede son papa nanga mama e bumui na ini a trowlibi fu den pikin fu den? Jenny, di wi ben taki fu en na a bigin, e taki: „A kan muilek gi wan papa nanga mama fu si taki wan yongu sma di no abi ondrofeni, e sorgu gi a manpikin noso na umapikin fu den.” Dilip, a masra fu Reena, e taki fu ete wan reide di e meki taki papa nanga mama e bumui na ini a trowlibi fu den pikin. A e taki: „Papa nanga mama di wroko bun tranga fu sorgu gi den pikin, kan kisi a firi taki a pikin e skoifi den na wan sei. Boiti dati, a kan de so tu, taki den e denki taki den manpikin noso umapikin no abi nofo koni fu meki a trowlibi waka bun.”

Fu taki en leti, son leisi a de neleki sma e aksi a papa nanga mama fu den fu bumui na ini a trowlibi fu den. Luku fu eksempre Michael nanga Leanne, wan trowpaar fu Australia. Michael e taki: „Leanne kon fu wan osofamiri pe ala sma ben de bun nanga makandra, èn den ben e taki krin fu ala sani. Sobun baka di wi trow, a ben go aksi en papa rai fu sani di mi nanga en ben musu teki bosroiti. En papa ben de wan koni man, ma a ben e hati mi taki a ben e go suku rai na en papa na presi fu kon na mi!”

 A no de fu taki dati te yu abi problema nanga a papa nanga mama fu yu trowpatna, dan dati kan meki a trowlibi muilek. A de so tu nanga yu? Yu man feni en bun nanga a papa nanga mama fu yu trowpatna? Yu trowpatna man feni en bun nanga a papa nanga a mama fu yu? Luku tu situwâsi di kan tyari problema kon, èn luku san yu kan du fu lusu den.

A gersi leki yu trowpatna no man du noti sondro en papa nanga mama. Luis, wan masra fu Spanyorokondre, e taki: „Mi wefi ben feni taki efu wi no ben e libi krosibei fu en papa nanga mama, dan a no ben de wan bun umapikin.” A e taki moro fara: „Ma di wi boi gebore, mi papa nanga mama ben e kon luku wi pikinmoro ibri dei, èn a sani dati ben furu tumusi gi mi wefi. Furu leisi wi kisi kesekese fu a sani disi ede.”

A problema:

Te Bijbel e taki fu a trowlibi, dan a e taki dati baka wan pisi ten „wan man o gowe libi en papa nanga en mama. A musu tai hori na en wefi èn den musu tron wán skin” (Genesis 2:24). Efu tu sma na „wán skin”, dan disi no wani taki nomo dati den e libi nanga makandra. Fu taki en leti, disi wani taki dati masra nanga wefi e tron wan nyun osofamiri. A nyun osofamiri disi prenspari moro na osofamiri pe den gebore (1 Korentesma 11:3). A no de fu taki dati masra nanga wefi musu tan lespeki den papa nanga mama. Nofo tron dati wani taki dati den musu poti prakseri na den (Efeisesma 6:2). Ma san yu musu du te yu trowpatna e poti moro prakseri na en papa nanga mama, leki na yu?

San yu kan du:

Luku a situwâsi moro bun. A de so trutru taki yu trowpatna e poti tumusi furu prakseri na a papa nanga a mama fu en? Noso a de so taki yu no abi so wan bun matifasi nanga a papa nanga a mama fu yu? A kan taki a fasi fa yu kweki abi krakti tapu a fasi fa yu e denki fu a situwâsi disi? A kan de so taki yu e dyarusu pikinso?—Odo 14:30; 1 Korentesma 13:4; Galasiasma 5:26.

Yu musu ondrosuku yusrefi bun èn yu no musu kori yusrefi te yu e gi piki tapu den aksi disi. Ma a de prenspari fu du a sani disi. Fu taki en leti, efu ibri leisi baka yu e meki trobi nanga yu trowpatna fu unu papa nanga mama ede, dan a problema no de na a papa nanga mama fu unu. Na presi fu dati, a problema de na a trowlibi fu unu.

Nofo tron te problema e opo kon na ini a trowlibi, dan dati e kon fu di den tu sma dati no e si sani na a srefi fasi. Yu kan pruberi fu si sani soleki fa yu trowpatna e si den? (Filipisma 2:4; 4:5) Na dati Adrián, wan masra na ini Meksikow, ben du. A e taki: „Mi wefi kweki na ini wan osofamiri pe sani no ben waka soleki fa a musu, èn fu dati ede mi no ben wani abi furu demakandra nanga a papa nanga mama fu mi wefi. Te fu kaba, mi no ben wani abi noti fu du srefi nanga den, èn a situwâsi tan so wan tu yari langa. A sani disi tyari problema kon na ini a trowlibi, fu di mi wefi ben wani tan abi wan bun matifasi nanga en famiri, spesrutu nanga en mama.”

Baka wan pisi ten, Adrián bigin denki tra fasi fu a tori disi. A e taki: „Mi sabi taki te mi wefi abi tumusi furu demakandra nanga en famiri, dan dati no o abi bun krakti tapu en. Ma aladi dati de so, toku mi e hori na prakseri taki te a no abi nowan enkri demakandra nanga en famiri, dan dati kan tyari problema kon tu. Mi du san mi man fu kon abi wan bun matifasi baka nanga a papa nanga a mama fu mi wefi, èn fu de bun nanga den.” *

A papa nanga mama fu yu trowpatna e bumui ibri leisi baka na ini yu trowlibi, èn den e gi yu rai aladi yu no aksi den. Nelya, wan wefi na ini Kasakstan, e fruteri: „Den fosi seibi yari fu wi trowlibi, wi ben e tan nanga mi masra en famiri. Ibri leisi problema ben e opo kon fu di den no ben agri nanga a fasi fa wi ben kweki wi pikin, a fasi fa mi ben e bori, èn a fasi fa  mi ben e krin na oso. Mi taki nanga mi masra fu a tori disi èn mi taki tu nanga en mama, ma disi meki taki a trobi kon moro bigi!”

A problema:

Te yu trow, dan yu no abi fu saka yusrefi na ondro yu papa nanga mama moro. Na presi fu dati, Bijbel e taki dati ’Krestes na a ede fu ibri man; èn taki a man na a ede fu na uma’, san wani taki dati a masra na a ede fu a wefi (1 Korentesma 11:3). Ma soleki fa wi si kaba, dan masra nanga wefi musu lespeki den papa nanga mama. Fu taki en leti, Odo 23:22 e taki: „Arki yu papa, bika na fu en ede meki yu kon de. No wisiwasi yu mama, soso fu di a kon owru.” Ma san yu musu du te yu papa nanga mama, noso a papa nanga mama fu yu trowpatna no e si a masra leki na ede fu en osofamiri? San yu musu du te den e pruberi fu dwengi yu fu si sani soleki fa den e si sani?

San yu kan du:

Te a gersi leki a papa nanga mama fu yu trowpatna e bumui na ini a libi fu unu, dan pruberi fu frustan fu san ede den e du dati. Ryan, di wi ben taki fu en na a bigin, e taki: „Son leisi a de fanowdu fu meki papa nanga mama sabi taki den pikin fu den lobi den ete.” A no abi fu de so taki na bumui den wani bumui nomo na ini yu trowlibi. Yu kan lusu a problema disi te yu e fiti a rai fu Bijbel di e taki dati wi musu „tan frudrage makandra èn gi makandra pardon nanga un heri ati te wan sma feni taki wan trawan du en wan ogri” (Kolosesma 3:13). Ma san yu musu du te a papa nanga mama fu yu trowpatna e bumui so te na ini un libi, taki a sani disi e tyari trobi kon na mindri yu nanga yu trowpatna?

Son trowpaar e sori den papa nanga mama, te o fara den kan go fu gi den rai na ini a trowlibi fu den. Ma disi no wani taki dati yu musu taigi den dati na wan grofu fasi. * Nofo tron a fasi fa yu e tyari yusrefi e sori den taki yu e poti yu trowpatna na a fosi presi na ini yu libi. Fu eksempre, wan masra na ini Yapan, di nen Masayuki, e taki: „Srefi efu papa nanga mama e taki fa den e denki fu wan sani, dan yu no abi fu agri nanga den wantewante. Hori na prakseri taki yu srefi e bigin seti wan nyun osofamiri. Sobun, sorgu taki yu kon sabi fosi fa yu trowpatna e denki fu a tori.”

Yu kan lusu furu fu den problema di yu e kisi nanga a papa nanga mama fu yu trowpatna te yu e kon frustan fa den e denki, èn te yu no e meki a sani dati tyari kesekese kon na mindri yu nanga yu trowpatna. Te a abi fu du nanga a sani disi, dan Jenny e taki: „Son leisi te mi nanga mi masra ben taki fu a papa nanga mama fu wi, dan dati ben meki wi ati bron tapu makandra. A ben de krin fu si taki te wi ben e taki fu den fowtu fu wi papa nanga mama, dan dati ben hati wi trutru. Te fu kaba wi leri fu no poti prakseri na den fowtu fu den, ma wi bosroiti fu lusu a problema di wi abi. Leki bakapisi fu dati, wi kon de moro bun nanga makandra leki masra nanga wefi.”