Den sani di Yesus leri wi

Fa wi musu waka baka Krestes

Te sma ben e poti bribi na ini Yesus, dan nofo tron a ben taigi den: „Waka na mi baka” (Mateyus 9:9; 19:21). San a wani taki fu waka baka Yesus, noso san a wani taki fu de wan Kresten? Luku a piki tapu dri prenspari aksi.

Fa yu musu handri nanga trawan?

▪ Wan disipel fu Yesus musu gi yesi na den rai di e sori fa wi musu handri nanga trawan. Fu eksempre, Yesus ben taki: „Ala sani di unu wani meki sma du gi unu, na dati un musu du gi den tu.” San yu musu du te wan sma du wan hati sani nanga yu? Yesus ben taki: „Heri esi yu musu lusu a problema di yu abi nanga en.” A ben taigi den bakaman fu en tu: „Efu unu no e gi sma pardon fu den sondu fu den, dan un Tata no sa gi unu pardon fu den sondu fu unu.”—Mateyus 5:25; 6:15; 7:12.

Yesus ben gi sma di trow a rai disi: „Un yere taki den taki: ’No du sutadu.’ Ma mi e taigi unu taki iniwan sma di e tan luku wan uma fu kisi tranga lostu gi en, du sutadu nanga en kaba na ini en ati.” Wan tru Kresten e meki den sani di Yesus ben e leri, abi krakti tapu a fasi fa a e denki, èn tapu na ati fu en.—Mateyus 5:27, 28.

Tru Kresten e poti den eigi afersi na wan sei fu yepi tra sma. Yesus ben du dati. Fu eksempre, Yesus nanga den apostel fu en ben go preiki èn baka dati den ben weri. Den no ben abi ten fu nyan srefi. Fu dati ede, Yesus meki den teki wan boto èn den go na wan tiri presi fu rostu. Ma di sma kon sabi pe Yesus ben e go, dan den lon go na a presi, èn den doro drape fosi en. Bijbel e fruteri: „Di a komopo na ini a boto, a si wan heri ipi sma; ma a ben sari den, bika den ben de leki skapu di no abi wan skapuman. Dan a bigin leri den furu sani” (Markus 6:30-34). Yu tu kan teki na eksempre fu Yesus te yu e du san Gado e aksi fu yu, srefi te yu e kisi problema.

 Fu san ede yu musu fruteri sma a bun nyunsu?

▪ Yesus leri den bakaman fu en fu fruteri sma a bun nyunsu. A ben taigi den apostel: „Te unu e go preiki, dan un musu taki: ’A kownukondre fu hemel kon krosibei kaba’” (Mateyus 10:7). Den bakaman fu Yesus abi wan tumusi prenspari boskopu. Yesus ben begi: „Efu sma wani kisi têgo libi, dan den musu tan leri sabi yu, a wan-enkri tru Gado.”—Yohanes 17:3.

Yesus ben taki na fesi taki milyunmilyun bakaman fu en ben o teki prati na wan wroko. A ben taki: „A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mateyus 24:14). Efu yu leri sani fu Gado Kownukondre èn efu yu e bribi san Bijbel e taki, dan a no de fu taki dati yu o fruteri sma den sani di yu sabi. Furu bakaman fu Yesus e bigin taki fu Gado Kownukondre nanga den famiriman.—Yohanes 1:40, 41.

Fu san ede yu musu teki dopu?

▪ Soleki fa a sori, dan di Yesus ben teki dopu na ini Yordan-liba, dan a taki na ini begi: ’Mi kon fu du yu wani, o Gado’ (Hebrewsma 10:7). Efu yu wani du a wani fu Gado, dan yu musu teki dopu tu. Yesus ben gi a komando disi: „Go na sma fu ala kondre èn meki den tron disipel, èn dopu den.”—Mateyus 28:19.

Te wan sma e teki dopu, dan sortu frantwortu a e kisi, èn sortu wini a o abi? Den dopu bakaman fu Yesus e dini Gado nanga den heri sili. Yesus ben gebroiki den wortu disi fu a Wet fu Gado, di e taki: „Yu musu lobi Yehovah yu Gado nanga yu heri ati, nanga yu heri sili” (Mateyus 22:37). A ben taki sosrefi: „Efu wan sma wani kon na mi baka, dan a no musu teri ensrefi moro” (Mateyus 16:24). Te wan sma teki dopu, dan a e sori taki a teki a bosroiti fu no teri ensrefi moro, ma fu du a wani fu Gado. Den sma di abi a spesrutu matifasi disi nanga Gado kan aksi en fu gi den wan krin konsensi.—1 Petrus 3:21.

Efu yu wani sabi moro, dan luku kapitel 18 fu a buku disi, San Bijbel e leri wi trutru? di Yehovah Kotoigi tyari kon na doro.