Leisiman e aksi . . .

Yehovah Kotoigi e moksi nanga tra bribi?

▪ Wan buku e taki dati sowan „10.000 difrenti bribi de na heri grontapu” (World Christian Encyclopedia). Fu di difrenti bribi abi problema nanga makandra, meki furu hati sani pasa. Fu dati ede furu anbegiman e denki taki den musu moksi nanga tra bribi. Den e denki taki a sani disi kan meki taki vrede nanga wánfasi de na ini wan grontapu pe pratifasi de.

Bijbel e gi wi deki-ati fu libi na ini wánfasi. Na apostel Paulus ben agersi a Kresten gemeente nanga wan libisma skin, pe ibri memre de ’wán èn e wroko makandra’ (Efeisesma 4:16). Na a srefi fasi na apostel Petrus gi den tra Kresten a deki-ati disi: „Un alamala musu abi a srefi denki.”—1 Petrus 3:8.

Den fosi Kresten ben e libi na ini wan grontapu pe sma fu difrenti kulturu ben de èn pe difrenti sortu bribi ben de. Ma di Paulus ben skrifi fu a moksi di sma e moksi nanga tra bribi, dan a aksi: „San wan sma di de na bribi abi fu du nanga wan sma di no de na bribi?” Baka dati a warskow den Kresten fu „komoto na den mindri” (2 Korentesma 6:15, 17). A de krin taki Paulus no ben taki bun fu a moksi di sma e moksi nanga tra bribi. Fu san ede?

Na apostel e fruklari taki te wan tru Kresten e moksi nanga tra bribi, dan a ben o de na ondro wan tyatyari di no o de a srefi, èn na anbegi fu en no ben o de soifri moro (2 Korentesma 6:14). A sani disi ben o abi takru bakapisi gi a bribi fu a Kresten. Paulus ben denki neleki wan papa di e broko en ede nanga en pikin. A papa disi sabi taki sonwan fu den pikin na ini a birti no e tyari densrefi bun. Fu dati ede a e taigi en pikin nanga suma a no musu prei. Kande sma no o lobi a fasi fa a papa disi e handri. Ma fu di a no meki en pikin moksi nanga den trawan, meki a kan kibri en pikin gi a takru krakti di den trawan kan abi na en tapu. Na a srefi fasi, Paulus ben sabi taki te Kresten no ben o moksi nanga tra bribi, noso te den ben o hori densrefi aparti, dan den ben o kibri densrefi gi sani di kan abi takru bakapisi gi den.

Di Paulus ben taki fu a tori disi, a teki na eksempre fu Yesus. Aladi Yesus ben gi a moro bun eksempre fa sma musu de na ini wánfasi, toku a no ben e moksi nanga tra bribi. Furu kerkigrupu ben de, soleki den Fariseiman nanga den Saduseiman, di ben de fayafaya na a ten fu Yesus en diniwroko na grontapu. Fu taki en leti, den kerkigrupu dati ben span anu makandra fu strei teige Yesus, èn te fu kaba den seti sani srefi fu kiri en. Ma na a tra sei, Yesus taigi den bakaman fu en fu „luku bun nanga den leri fu den Fariseiman nanga den Saduseiman”.—Mateyus 16:12.

Fa a de na ini a ten disi? A warskow fu Bijbel di e taki dati wi no musu moksi nanga tra bribi, e fiti ete? Iya, a fiti ete. Neleki fa oli nanga watra no kan moksi kon na wán soso fu di yu poti den na ini wán patu, na so difrenti kerki no kan de wán fu di den e moksi nanga makandra. Fu eksempre, te sma fu difrenti kerki e kon makandra fu begi taki vrede musu de, dan sortu gado den e begi? A gado fu Krestenhèit pe sma e bribi taki a Tata, a Manpikin, nanga a Santa Yeye na wán? A gado fu den Hindusma, di nen Brahma? Buda? Noso tra gado?

A profeiti Mika ben taki na fesi dati ’na a kabapisi fu a ten disi’, sma fu ala kondre ben o taki: „Kon meki wi go na a bergi fu Yehovah èn na a oso fu a Gado fu Yakob. A o leri wi san na den pasi fu en, èn wi o waka den pasi dati” (Mika 4:1-4). A bakapisi fu dati na taki vrede nanga wánfasi o de na heri grontapu, no fu di ala bribi moksi kon na wán, ma fu di ala sma teki a wan-enkri tru bribi.

[Prenki na tapu bladzijde 13]

Den memre fu den moro bigi kerki fu grontapu kon na wán tapu wan konmakandra na ini 2008

[Sma di abi a reti fu a prenki]

REUTERS/Andreas Manolis