Eden ben de a fosi tanpe fu libisma?

PRAKSERI fa a ben o de efu yu ben de na ini wan dyari pe a tiri èn pe yu no e yere a dyugudyugu fu a foto dorosei fu a skotu. A dyari disi bigi srefisrefi èn nowan sani de di e tyari bruya kon. Ma san moro moi, na taki yu no abi nowan broko-ede, yu no abi nowan siki, èn nowan pen. Yu kan si, yere, èn smeri ala sani bun di de na yu lontu.

Yu e si den moi faya kloru fu den bromki na den bon, èn yu e si fa a leti e skèin na tapu a watra fu wan kriki. Baka dati yu e luku a moi grun grasi nanga den wiwiri fu den bon di de na ini a son èn na ini a skaduw. Yu e firi fa wan switi winti e wai èn a presi e smeri switi. Yu e yere fa den wiwiri fu den bon e wai safri, fa a watra e lon abra den ston, fa den fowru e froiti moi èn yu e yere den wasiwasi nanga den grasi-barki. Te yu e prakseri a sani disi, dan yu no e angri fu de na so wan presi?

Sma na heri grontapu e bribi taki na a bigin, libisma ben e libi na so wan presi. Hondrohondro yari langa, sma fu a Dyu bribi, fu a Krestenhèit, nanga Islam bribi leri fu a dyari fu Eden pe Gado ben poti Adam nanga Eva fu libi na ini. Soleki fa Bijbel e sori, den ben abi wan koloku libi sondro broko-ede. Den ben e libi na ini vrede nanga makandra, nanga den meti, èn nanga Gado di ben gi den a howpu fu libi fu têgo na ini a moi presi dati.​—Genesis 2:15-24.

Den sma fu a Hindu bribi e taki tu dati wan sortu paradijs ben de na ini owruten. Sma fu a Buda bribi e bribi taki den bigi fesiman, noso Buda, gebore na ini wan spesrutu ten te grontapu de leki wan paradijs. Bun furu Afrikan bribi e leri sma tori di gersi a di fu Adam nanga Eva.

Fu taki en leti, na ini furu bribi nanga kulturu sma e fruteri tori fu wan paradijs di ben de na a bigin. Wan skrifiman taki: „Na ini furu libimakandra sma ben bribi taki wan paradijs ben de na a bigin, pe nowan sani ben misi, pe sma ben de fri, pe vrede ben de, pe sma ben de koloku èn pe den ben abi ala sani bogobogo. Boiti dati, den ben bribi taki sma no ben pina trawan,  èn taki trobi nanga feti no ben de. . . . A sani disi meki taki sma na ini den libimakandra wani de na ini wan paradijs di lasi gowe, èn den ben pruberi fu feni en baka.”

A kan de so taki ala den tori dati èn den sani di sma gwenti fruteri e komoto fu a srefi presi? A kan taki libisma e prakseri wan sani di ben pasa trutru fositen? A de so trutru taki wan dyari fu Eden ben de langa ten pasa, èn taki Adam nanga Eva ben de trutru?

Sma di no e bribi a sani disi e teki a tori disi meki spotu. Na ini a ten disi, pe sabiman kon sabi furu sani, sma feni taki den tori disi na anansitori. Ma a no ala den sma disi, na sma di no de fu wan kerki. Furu kerki fesiman lobi fu fruteri sma taki den no musu bribi a tori fu a dyari fu Eden. Den e taki dati noiti so wan presi ben de. Den e taki dati a tori na wan agersitori nomo noso wan anansitori.

A no de fu taki dati Bijbel abi agersitori na ini. Yesus srefi ben fruteri agersitori di bun furu sma sabi. Ma Bijbel no e taki fu a tori fu Eden leki a de wan agersitori, ma a e sori krin taki a de wan tori di pasa trutru. Efu a de so taki den tori dati noiti no pasa, dan fa den tra pisi fu Bijbel kan tru? Meki wi go luku fu san ede son sma no e bribi a tori fu a dyari fu Eden, èn meki wi go luku efu den abi bun reide fu denki so. Baka dati wi o luku san a tori dati abi fu du nanga ibriwan fu wi.