Leisiman e aksi . . .

Fu san ede Satan gebroiki wan sneki fu taki nanga Eva?

▪ Soleki fa wi si kaba na tapu bladzijde 8, dan Satan ben gebroiki a sneki fu taki nanga Eva. Na dati Bijbel e leri trutru. Ma kande yu e aksi yusrefi: ’Fu san ede wan makti yeye ben o gebroiki wan sneki fu taki nanga Eva?’

Bijbel e sori taki Satan e gebroiki „triki” fu kori sma èn a tori disi e tyari dati kon na krin (Efeisesma 6:11). A sani di ben pasa na ini Eden, a no wan anansitori fu wan meti di e taki. Ma na wan buweisi di e sori krin taki na wan koni fasi Didibri e gebroiki triki fu kori sma fu drai baka gi Gado. Na sortu fasi a e du dati?

Na wan koni fasi Satan luku suma a ben o kori. Eva ben de a moro yonguwan fu den sma na hemel nanga grontapu. Fu di a ben sabi taki Eva no ben abi so furu ondrofeni, meki a go fu kori en. Satan ben kibri baka wan sneki, wan meti di e luku bun. Na wan koni fasi Satan ben kibri san ensrefi ben wani (Genesis 3:1). Luku tu san a ben man du fu di a meki a gersi leki a sneki ben taki, neleki fa wan sma e meki a gersi leki wan popki e taki.

Na a fosi presi, Satan ben sabi heri bun fa fu hari a prakseri fu Eva èn a ben sabi san fu du so taki Eva tan poti prakseri na en. Eva ben sabi taki sneki no e taki. En masra ben gi ala den meti wan nen, sosrefi a meti disi. Soleki fa a sori, dan a ben luku den meti bun, fosi a ben gi den wan nen (Genesis 2:19). A kan taki Eva ben si tu taki a meti disi e luku bun. Sobun, a triki fu Satan meki taki Eva ben wani sabi moro èn na so a tan poti prakseri na a wan-enkri sani na ini a heri dyari di a no ben mag fasi. Na a di fu tu presi, efu a sneki ben kibri na ini a bon di sma no ben mag fasi, dan san dati ben o meki Eva denki? A kan de so taki a ben denki taki a lagi meti disi di no e taki, man taki now fu di a ben nyan fu a froktu dati? Efu a froktu ben man du so furu gi wan sneki, dan san a ben kan du gi en? Wi no sabi seiker san Eva ben denki noso efu a sneki ben nyan wan pisi fu a froktu, ma wi sabi taki di a sneki taigi Eva taki a froktu ben o meki a „de leki Gado”, dan a ben de klariklari fu bribi a lei dati.

Den sani di Satan taki e tyari furu kon na krin. A meki Eva tweifri, fu di a ben taki dati Gado ben hori wan bun sani na baka gi en èn taki a ben tapu en fu du san a wani, sondro taki dati ben de fanowdu. A sani di Satan ben abi na prakseri, ben o pasa soso te Eva ben o lobi ensrefi moro Gado, di ben gi en ala sani di a ben abi (Genesis 3:4, 5). A sari fu si taki a triki fu Satan wroko, bika Adam nanga Eva no ben kon abi den fasi di den ben musu abi, èn dati na fu lobi Yehovah nanga den heri ati èn fu warderi en. A no de so na ini a ten disi taki Satan e gi sma deki-ati tu fu denki densrefi nomo èn fu suku reide fu taki bun fu den ogri sani di den e du?

Ma san Satan ben abi na prakseri? San a ben wani? Na ini Eden, a no ben meki Eva sabi suma na en èn san a ben wani. Ma bakaten, a sori krin san a ben wani. Di a ben tesi Yesus, a ben sabi heri bun taki a no ben man kibri gi Yesus suma na en. Dati meki a taigi Yesus langalanga: „Boigi èn anbegi mi wan leisi nomo” (Mateyus 4:9). Soleki fa a sori, dan langa ten kaba Satan e dyarusu tapu Yehovah Gado fu di a wani taki sma anbegi en na presi fu Gado. A o du ala san a man fu tapu sma fu anbegi Gado, noso fu meki den anbegi Gado na wan fasi di A no feni bun. A lobi fu du sani so taki sma no e tai hori na Gado moro.

Bijbel e tyari kon na krin taki na wan koni fasi Satan e suku okasi fu kori sma so taki den kisi pori te fu kaba. Koloku taki a no abi fu kisi wi neleki fa a ben kisi Eva, „bika wi sabi san a abi na prakseri”.​—2 Korentesma 2:11.