Gado trutru e broko en ede nanga yu?

YU E firi taki trawan lobi yu? Noso son leisi a de neleki nowan sma e broko en ede nanga yu? Na ini a grontapu disi sma abi furu fu du èn den e denki densrefi nomo. Fu dati ede, a kan pasa makriki taki yu e feni taki yu no de noti noso taki yu no de prenspari fu sma poti prakseri na yu. Soleki fa Bijbel e taki fu a ten fu wi, dan furu sma e poti prakseri na den eigi afersi nomo. Dati e meki taki na ala sei sma no e broko den ede nanga trawan.​—2 Timoteyus 3:1, 2.

Awansi omeni yari yu abi, awansi fu sortu kulturu yu de, sortu tongo yu e taki, noso fu sortu ras yu de, toku wi alamala abi a firi na ini wi fu lobi trawan èn fu trawan lobi wi. Soleki fa wan tu ondrosuku e sori, dan wi edetonton di e wroko makandra nanga den senwe fu wi, meki na so wan spesrutu fasi taki wi man firi te trawan lobi wi. Yehovah Gado, a sma di meki wi, e frustan moro leki iniwan tra sma, taki a de fanowdu fu firi taki trawan lobi wi èn taki den e warderi wi. Fa yu ben o feni en efu a ben gi yu a dyaranti taki yu warti gi en? A no de fu taki dati a ben o de a moro moi sani di wan sma ben kan taigi yu. Wi kan de seiker taki Yehovah e poti prakseri na sondu libisma? A e broko en ede nanga ibriwan fu wi? Efu dati de so, dan san e meki taki Gado lobi wan sma?

Yehovah e broko en ede nanga wi

Sowan 3000 yari pasa, wan psalm skrifiman di ben abi frede gi Gado, ben fruwondru srefisrefi di a ben si o moi den stari de na hemel te neti. A kefalek sani disi ben naki en ati trutru. A no ben e tweifri taki nowan sma hei moro a Sma di meki den milyunmilyun stari. A ben e prakseri o bigi Yehovah de èn a ben teki dati gersi nanga wan libisma di no de noti. Fu dati ede, a psalm skrifiman ben taki disi fu a lobi-ati fasi fa Yehovah e broko en ede nanga libisma: „Te mi e luku hemel di yu meki nanga yu eigi anu, a mun nanga den stari di yu meki, dan mi e aksi misrefi: ’San na libisma taki yu e prakseri den? San na den pikin fu libisma taki yu e sorgu den?’” (Psalm 8:3, 4) Wan sma ben kan denki makriki taki a Moro Heiwan fara tumusi fu poti prakseri na sondu libisma, noso taki a abi tumusi furu fu du fu luku den. Ma a psalm skrifiman ben sabi taki aladi wi no man du den kefalek sani leki Gado èn aladi wi no e libi so langa, toku wi de prenspari gi Gado.

 Wan tra psalm skrifiman ben taki fu a dyaranti disi di a ben abi: „Yehovah e prisiri nanga den sma di abi lespeki gi en, iya, nanga den wan di sabi taki a o du bun gi den” (Psalm 147:11). A e naki wi ati te wi e leisi den sani disi di skrifi na ini Psalm. Yehovah di hei, no sabi nomo taki libisma de. Na presi fu dati, a „e sorgu den” èn a „e prisiri nanga den”.

A sani disi e kon na krin moro bun na ini wan Bijbel profeititori di e taki san ben o pasa na ini a ten fu wi. Nanga yepi fu a profeiti Hagai, Yehovah sori taki a bun nyunsu fu Gado Kownukondre ben o preiki na heri grontapu. San ben o de a bakapisi? Luku wan fu den sani di ben o pasa: „Ala den gudu fu den [pipel] o kon na ini a tempel disi. A glori fu mi o furu a heri tempel disi.”​—Hagai 2:7.

San na „den gudu” fu ala den pipel? Den gudu disi no kan de trutru gudu (Hagai 2:8). A no solfru nanga gowtu e meki Yehovah en ati prisiri trutru. A e prisiri nanga sma di e anbegi en fu di den lobi en, aladi den abi swakifasi (Odo 27:11). Den sma disi na „den gudu” di e gi en glori, èn a e warderi den te den e dini en fayafaya èn nanga den heri ati. Yu na wan fu den sma disi?

Kande yu no man bribi taki a Bigi Mekiman fu hemel nanga grontapu, lobi sondu libisma. Ma fu taki en leti, a tru tori disi musu gi wi deki-ati fu teki a moi kari di wi e kisi fu kon krosibei fu en.​—Yesaya 55:6; Yakobus 4:8.

„Yu na a sma di Gado lobi srefisrefi”

Frukufruku, wan mofoneti, wan moi sani ben miti na owru profeiti Danièl. Di Danièl ben e begi, dan wan prenspari fisitiman doro wantronso. A fisitiman ben nen Gabrièl. Danièl ben miti en kaba wan leisi, èn a ben sabi en leki wan engel fu Yehovah. Gabrièl ben taki fu san ede a ben kon de drape wantronso. A ben taki: „Danièl, mi kon dya now fu yepi yu fu man si sani moro krin èn fu meki yu kon frustan sani . . . fu di yu na a sma di Gado lobi srefisrefi.”​—Danièl 9:21-23.

Na wan tra okasi, wan tra engel fu Yehovah ben taki disi fu Danièl: „Danièl, yu na wan man di Gado lobi srefisrefi.” Ne, fu di a ben wani gi Danièl deki-ati, na engel taki: „Yu di Gado lobi srefisrefi, no frede. Meki sani waka bun nanga yu” (Danièl 10:11, 19). Sobun, dri leisi Gado taki dati ’a lobi Danièl srefisrefi’. Den wortu disi wani taki tu dati Gado ben abi furu warderi gi en èn taki en ben de wan fu den sma di a lobi moro.

A no de fu taki dati Danièl ben abi wan bun matifasi kaba nanga Gado èn a ben sabi taki Yehovah ben feni a diniwroko di a ben e du gi en, bun. Ma a musu de so taki Danièl kisi deki-ati di den engel tyari a boskopu fu Gado taki A lobi Danièl srefisrefi. A  no de fu fruwondru di Danièl ben taki: „Yu gi mi deki-ati.”​—Danièl 10:19.

A moi tori disi di e sori taki Yehovah trutru lobi a profeiti disi fu en, skrifi na ini Gado Wortu so taki wi kisi wini (Romesma 15:4). Te wi e prakseri na eksempre fu Danièl, dan wi e frustan san e meki taki wi lobi-ati hemel Tata lobi wan sma.

Studeri Gado Wortu doronomo

Danièl ben e studeri den Buku fu Bijbel fayafaya. Wi sabi disi, fu di ensrefi ben skrifi: „Mi . . . go ondrosuku den buku. Ne mi si omeni yari Yerusalem ben o tan wan brokopresi” (Danièl 9:2). Den buku di a ben kan abi na a ten dati, na den buku di Moses ben skrifi nanga yepi fu santa yeye, èn sosrefi den buku di David, Salomo, Yesaya, Yeremia, Esekièl, nanga tra profeiti ben skrifi. Wi kan si Danièl kaba fa furu bukulolo ben de na en lontu, fa a ben e leisi den finifini, èn fa a ben e teki den profeititori gersi nanga makandra te a ben abi fu du nanga a tru anbegi di ben o meki kon bun baka na ini Yerusalem. Sondro fu meki sani puru en prakseri, a ben de kande na ini en kamra tapu a daki, pe a ben e denki dipi fu san den tori disi wani taki. A fasi disi fa a ben e studeri, ben tranga a bribi fu en èn a ben meki a kon moro krosibei fu Yehovah.

Fu di Danièl ben e studeri Gado Wortu, meki a ben e tyari ensrefi na wan moro bun fasi èn disi ben abi krakti tapu en heri libi. A no de fu taki dati den leri di a ben kisi fu den Buku fu Bijbel di a ben yongu, meki taki a ben abi a fasti bosroiti fu hori ensrefi na a Wet fu Gado di ben fiti gi a ten dati èn di ben sori san den no ben mag nyan (Danièl 1:8). Bakaten, sondro fu frede, a ben meki a boskopu fu Gado bekènti na den tiriman fu Babilon (Odo 29:25; Danièl 4:19-25; 5:22-28). Sma ben sabi en leki wan man di e wroko fayafaya, di no ben du kruka sani èn di ben de fu frutrow (Danièl 6:4). Ma san de moro prenspari, na presi taki Danièl trangayesi Gado soso fu man tan na libi, a poti ala en frutrow tapu Yehovah (Odo 3:5, 6; Danièl 6:23). Fu dati ede, a no de fu fruwondru taki ’Gado ben lobi en srefisrefi’!

A moro makriki gi wi na ini a ten disi fu studeri Bijbel, leki fa a ben de gi Danièl. Wi no abi den bigi hebi bukulolo moro. Now wi abi a heri Bijbel, èn son pisi e taki srefi fa wan tu fu den profeititori fu Danièl kon tru. Boiti dati, wi abi bun furu Bijbel publikâsi fu ondrosuku tori moro fini. * Yu e gebroiki den sani disi? Yu e poti ten na wan sei fu leisi Bijbel èn fu denki dipi fu den sani di yu leisi? Yu o abi den srefi bakapisi leki fa a ben de nanga Danièl. Yu o man kon abi wan tranga bribi èn yu o kisi wan moro bun matifasi nanga Yehovah. Gado Wortu o tiri yu na wan bun fasi na ini yu libi, fu di a o gi yu a dyaranti taki Gado lobi yu.

Tan begi

Begi ben de wan prenspari sani na ini Danièl en libi. A ben aksi sani di Gado feni bun. Di a ben de wan yonkuman, dan a ben kan kisi dedestrafu efu a no ben o man fruklari san a dren fu Kownu Nebukadnesar fu Babilon ben wani taki. Sondro fu draidrai, Danièl begi Yehovah fu yepi en èn fu kibri en (Danièl 2:17, 18). Furu yari baka dati, a profeiti disi di ben abi a sakafasi fu erken den sondu fu en, ben taki sortu sondu en nanga a pipel ben du èn a ben begi Yehovah fu gi en pardon (Danièl 9:3-6, 20). Di Danièl no ben man frustan den sani di Gado ben meki a skrifi, dan a aksi Gado fu yepi en. Na wan okasi, na engel di ben go baka na Danièl fu meki a frustan a tori moro bun, ben gi en a dyaranti disi: „Na fu den sani di yu taki meki mi kon.”​—Danièl 10:12.

Ma Danièl, di ben tai hori na Gado, no ben aksi Gado sani nomo. Danièl 6:10 e taki: ’Dri tron wan dei srefi a . . . begi a Gado fu en èn a prèise en, soleki fa a ben gwenti du ala ten.’ Danièl ben abi furu reide fu taki Yehovah tangi èn fu prèise en. A ben gwenti du disi tu. Iya, begi ben de wan tumusi prenspari pisi fu na  anbegi fu en. A ben de so prenspari gi en taki a no ben tapu fu du dati srefi di a ben kan lasi en libi. A no de fu taki dati Yehovah ben lobi en fu di a ben horidoro.

Iya, begi na trutru wan tumusi moi grani! Noiti no meki wan dei pasa sondro fu taki nanga yu hemel Tata. No frigiti fu taki en tangi èn fu prèise en gi ala den bun sani di a du gi yu. No frede fu taki fu den problema nanga den broko-ede fu yu. Prakseri fa a yepi yu di yu aksi en wan sani, èn taigi en fa yu de nanga tangi gi dati. Teki ten fu begi. Sobun, te wi e opo wi ati gi Yehovah na ini begi, dan wisrefi o firi taki a lobi wi. Dati na wan tumusi prenspari reide fu san ede wi musu „tan begi”!​—Romesma 12:12.

Gi Yehovah en nen glori

A matifasi na mindri tu sma no kan kon moro bun, efu wan fu den e denki ensrefi nomo. Na so a de tu nanga a matifasi di wi abi nanga Yehovah. Danièl ben frustan a sani disi. Luku fa a ben e broko en ede trutru taki Yehovah en nen kisi glori.

Di Gado gi piki tapu a begi fu en fu di a meki en kon sabi san ben de a dren fu Nebukadnesar èn san a dren wani taki, dan Danièl ben taki: „Meki sma prèise a nen fu Gado fu têgo, iya, fu ala ten, bika na en abi ala koni nanga makti.” Bakaten, di Danièl ben fruteri Nebukadnesar a dren èn a fruklari san a wani taki, dan ibri tron baka Danièl ben meki Yehovah kisi prèise, fu di a sori taki na En wawan na a Sma „di e tyari kibritori kon na krin”. Na so a ben de tu di Danièl ben begi fu kisi pardon nanga frulusu. A ben taki: „Grantangi, mi Gado, mi e begi yu fu yu nen ede . . . fu di a foto fu yu nanga a pipel fu yu e tyari yu nen.”​—Danièl 2:20, 28; 9:19.

Wi abi furu okasi fu sori taki wi teki na eksempre fu Danièl. Te wi e begi, wi kan sori taki wi e broko wi ede taki ’a nen fu Gado kon santa’ (Mateyus 6:9, 10). Noiti wi wani taki a fasi fa wi e tyari wisrefi pori a santa nen fu Yehovah. Na presi fu dati, meki wi gi Yehovah glori ala ten, fu di wi e fruteri trawan san wi leri fu a bun nyunsu fu en Kownukondre.

A tru taki na ini a grontapu disi furu sma no e sori lobi gi trawan èn den no e broko den ede nanga den. Ma wi kan kisi furu trowstu te wi sabi taki Yehovah trutru e broko en ede nanga ibriwan fu den anbegiman fu en. A de soleki fa a psalm skrifiman taki: „Yehovah e prisiri nanga a pipel fu en. A e frulusu den safri-ati sma fu gi den glori.”​—Psalm 149:4.

[Futuwortu]

[Prenspari pisi na tapu bladzijde 21]

Gado ben sori lobi gi Danièl fu di a ben seni na engel Gabrièl fu gi en deki-ati

[Prenspari pisi na tapu bladzijde 23]

Fu di Danièl ben studeri èn begi fayafaya, meki a tyari ensrefi na wan moro bun fasi èn dati meki Gado ben lobi en