Wan dyari fu Eden ben de trutru?

YU SABI a tori fu Adam nanga Eva èn a dyari fu Eden? Sma na heri grontapu sabi en. Kande yu kan leisi en. A skrifi na ini Genesis 1:26–3:24. Meki wi go luku a tori syatu:

Yehovah Gado * e teki doti fu a gron fu meki wan man di a kari Adam, èn a e poti en na ini wan dyari na ini wan kontren di nen Eden. Gado srefi prani a dyari disi. A dyari abi nofo watra èn a abi bun furu moi bon di e gi froktu. Na mindrisei fu a dyari a poti „a bon di nen ’Sabi san bun èn san ogri’”. Gado e taigi libisma taki den no musu nyan fu a bon disi, èn a e taigi den taki den o dede efu den no gi yesi. Baka wan pisi ten, Yehovah e meki wan patna gi Adam, iya, a e meki na uma Eva gi en. A teki wan fu den lebriki fu Adam fu meki Eva. Gado e gi den a wroko fu sorgu gi a dyari èn a e taigi den fu meki pikin èn fu furu grontapu.

 Wan dei te Eva de en wawan, wan sneki e taki nanga en fu di a wani kisi Eva fu nyan a froktu di a no mag nyan. A e taki dati Gado lei gi Eva èn taki a e hori wan bun sani na baka, wan sani di o meki Eva kon de leki Gado. A e arki a sneki èn a e nyan a froktu di a no mag nyan. Bakaten, Adam e horibaka gi en wefi èn a e trangayesi Gado tu. Fu dati ede Yehovah e leisi strafu gi Adam, Eva, nanga a sneki. Baka di a yagi libisma puru fu a dyari di de wan paradijs, den engel e tapu a pasi so taki den sma no man go na ini a dyari moro.

A ben de so wan pisi ten taki sabiman, koniman nanga historia skrifiman, ben agri taki den tori na ini a Bijbel buku Genesis, na tru tori di pasa fositen. Ma na ini a ten disi a e pasa moro furu taki sma no e bribi den sortu tori dati. Ma fu san ede sma no e bribi a tori na ini Genesis fu Adam, Eva, nanga a dyari fu Eden? Meki wi go luku fo sani di e meki sma tweifri na a tori disi.

1. A dyari fu Eden ben de wan trutru presi?

Fu san ede sma e tweifri na a tori disi? A kan taki filosofia ben abi krakti tapu a denki fu sma. Hondrohondro yari langa sabiman fu kerkitori ben denki taki a dyari fu Gado ben de ete. Ma Griki filosofia man, soleki Plato nanga Aristoteles, ben abi krakti tapu kerki. Den man disi ben taki dati noti na grontapu kan de sondro fowtu, ma na ini hemel wawan sani kan bun dorodoro. Fu dati ede, den sabiman fu kerkitori ben denki taki a Paradijs di ben de na a bigin, ben musu fu de moro krosibei fu hemel. * Sonwan fu den ben taki dati a dyari ben de na tapu wan bun hei bergi di ben hei nofo, so taki a grontapu di no bun, no ben kan pori en. Trawan ben taki dati a ben de na a Noordpool, noso Zuidpool. Trawan baka ben taki dati a ben de na tapu a mun noso krosibei fu en. A no e fruwondru wi taki a tori fu Eden ben kon gersi wan anansitori. Son sabiman fu a ten disi, e taki dati Eden no ben de wan presi na grontapu, iya, den e taki dati noiti so wan presi ben de.

Ma Bijbel no e taki so fu a dyari. Na Genesis 2:8-14, wi e leisi fu wan tu spesrutu sani fu a presi dati. A ben de na a owstusei fu a kontren di ben nen Eden. A dyari ben abi watra fu di wan liba ben e lon pasa na ini èn a ben prati na ini fo tra liba. Bijbel e kari a nen fu ibriwan fu den fo liba disi, èn a e taki syatu fu a kontren pe den ben e lon. Langa ten kaba, sabiman ben e broko den ede pe den liba disi de. Furu fu den sabiman disi ondrosuku a pisi disi fu Bijbel finifini fu kon sabi pe a presi disi de now. Ma den ben kon nanga ala sortu denki di no kan. A sani disi wani taki dati den tori disi fu Eden, a dyari fu en, nanga den liba no tru, noso taki den na anansitori?

Prakseri a sani disi: Den sani di pasa na ini a dyari fu Eden, skrifi sowan 6000 yari pasa. Soleki fa a sori, Moses skrifi den tori disi. Kande a  ben skrifi den sani di sma ben fruteri, noso a ben gebroiki dokumenti di ben de kaba na ini a ten dati. Ma Moses ben skrifi den tori dati sowan 2500 yari baka di den sani ben pasa na ini Eden. Na ini a ten dati, a tori fu Eden ben de wan owruten tori kaba. We, a kan de so taki sani soleki liba kan kenki baka hondrohondro yari? Den sani soleki bergi nanga liba e kenki ibri leisi baka. A kan taki a kontren pe Eden ben de na wan presi pe furu gronseki e pasa. Now, sowan 17 procent fu den moro bigi gronseki na grontapu ben pasa drape. Na ini den sortu kontren dati, sani e kenki ibri tron baka. Boiti dati, a Frudu fu a ten fu Noa ben kan kenki bun furu sani na grontapu èn wi na ini a ten disi no kan sabi na sortu fasi dati pasa. *

Ma luku wan tu sani di wi sabi seiker: A tori na ini Genesis e taki fu a dyari leki wan trutru presi. Tu fu den fo liba di kari na ini a tori, na Eufraat-liba nanga a Tigris-liba noso Hidekel-liba, de ete na ini a ten disi. Den presi pe den liba disi komoto de krosibei fu makandra. A tori e kari srefi a nen fu den presi pe den liba dati ben e lon èn a e taki fu spesrutu sani di de fu feni na ini den presi dati. Gi den sma fu owruten Israel di ben de den fosi sma di leisi a tori disi, den finifini tori disi ben bun fu sabi.

A de so taki anansitori e taki finifini fu sani? Noso a de so taki nofo tron den no e taki fu spesrutu sani di sma no kan ondrosuku fu si efu den tru? Nofo tron wan anansitori e bigin so: „Er’ ten ten na ini wan kondre farawe.” Ma historia e taki fu finifini tori soleki fa a tori fu Eden e taki finifini fu sani.

2. Wi kan bribi trutru taki Gado meki Adam fu doti èn taki a teki wan fu den lebriki fu Adam fu meki Eva?

Sabiman fu a ten disi kon si taki a libisma skin meki fu difrenti prenspari sani di de fu feni na ini a gron. Ma fa ala den sani disi ben man tron wan libisma?

Furu sabiman e taki dati libi kon fu ensrefi. Den e taki dati na a bigin pikinpikin libisani ben de èn baka milyunmilyun yari den sani dati ben kon moro bigi èn dangra. Ma dati no kan bika ala libisani, srefi den moro pikinpikin libisani di yu no man si nanga yu ai, meki na wan dangra fasi. Nowan buweisi no de taki iniwan sortu libisani kon fu ensrefi èn a sani dati noiti no kan. Ma te wi e luku ala den libisani di de, dan dati e sori krin taki wan sma di  koni omeni tron moro wi meki den. *​—Romesma 1:20.

Kon meki wi taki dati yu e arki wan kefalek moi poku, noso yu e luku wan heri moi skedrei, noso yu e fruwondru fu si sortu moi sani sabidensiman meki. Yu ben kan taki dati nowan sma meki den sani disi? Nôno, kwetikweti! Ma den sani dati no e doro a dangra, moi èn koni fasi fa a libisma skin meki. Fa wi kan denki taki a libisma skin no ben abi wan Mekiman? Boiti dati, a tori na ini Genesis e sori taki fu ala libisani na grontapu, na libisma wawan, ben meki leki wan prenki fu Gado (Genesis 1:26). Fu dati ede libisma na den wan-enkri libisani na grontapu di man meki nyun sani neleki Gado. Na so den man prei kefalek moi poku, den man meki heri moi skedrei èn sabidensiman e meki nyunyun sani. A musu fruwondru wi taki Gado e meki sani moro bun leki wi?

A ben muilek gi Gado fu teki wan lebriki fu a man fu meki wan uma? * Gado ben kan gebroiki wan tra sani fu meki na uma, ma a fasi fa a du dati ben abi fu du nanga wan prenspari sani. A ben wani taki a man nanga na uma ben musu trow èn taki den ben musu kon de so bun nanga makandra, taki den ben o de leki „wán skin” (Genesis 2:24). A fasi fa wan man nanga wan uma e fiti na makandra, èn fa den e horibaka gi makandra, e sori krin taki wan koni èn lobi-ati Mekiman meki den, a no so?

Boiti dati, datra kon si taki ala libisma na bakapikin fu wán man nanga wán uma. Sobun, a tori na ini Genesis trutru na sani di no kan?

3. A bon fu sabi èn a bon fu libi gersi sani fu wan anansitori.

Fu taki en leti, a tori na ini Genesis no e sori taki den bon disi ben abi spesrutu krakti. Na presi fu dati, den ben de trutru bon di Yehovah poti fu prenki wan sani.

Son leisi libisma e du a srefi sani tu, a no so? Difrenti kownu e gebroiki wan kownutiki nanga wan kownu-ati leki sani di e prenki a makti di den abi.

We, san den tu bon ben prenki? Sma e fruteri ala sortu muilek sani fu fruklari a sani disi. Aladi a de wan seryusu tori, toku a piki makriki. A bon fu sabi san bun èn san ogri ben prenki wan grani di Gado wawan abi, èn dati na a reti di a abi fu bosroiti san bun èn san ogri (Yeremia 10:23). Dati meki a ben de wan ogri sani  di sma fufuru a froktu fu a bon! Na a tra sei, a bon fu libi ben prenki wan presenti di Gado wawan kan gi sma, dati na têgo libi.​—Romesma 6:23.

4. Wan sneki di e taki gersi wan sani fu wan anansitori.

A tru taki a pisi disi fu a tori fu Genesis kan muilek fu frustan, spesrutu te wi no e luku san den tra pisi fu Bijbel e taki. Ma safrisafri Bijbel e tyari den dangra tori disi kon na krin.

Suma, noso san ben meki a gersi leki a sneki e taki? Den Israelsma fu owruten ben sabi tra sani tu di abi fu du nanga a sneki dati. Fu eksempre, den ben sabi taki aladi meti no man taki, toku wan yeye kan meki a gersi leki wan meti e taki. Moses ben skrifi a tori fu Bileam tu. Na ini a tori dati Gado ben seni wan engel fu meki a buriki fu Bileam taki leki wan man.​—Numeri 22:26-31; 2 Petrus 2:15, 16.

Tra yeye, sosrefi den wan di de feanti fu Gado, man du wondru? Moses ben si fa den bonuman fu Egepte ben du a srefi wondru di Gado ben meki sma du, soleki fu meki a gersi taki wan tiki kenki kon tron wan sneki. A makti fu du den sortu sani dati ben kan kon soso fu den yeye di de feanti fu Gado.​—Exodus 7:8-12.

Soleki fa a sori, dan Gado ben meki Moses skrifi a buku Yob tu. A buku dati ben sori moro krin taki a moro bigi feanti fu Gado, Satan, e lei taki ala den futuboi fu Yehovah no o man tai hori na en (Yob 1:6-11; 2:4, 5). Den Israelsma fu owruten ben bribi taki Satan ben du wan sani fu meki a gersi leki a sneki na ini Eden ben taki? Den ben bribi taki na Satan kori Eva fu trangayesi Gado? A sori so.

Na Satan ben meki a sneki taki wan lei? Bakaten, Yesus ben taki dati Satan na „wan leiman èn a tata fu ala lei” (Yohanes 8:44). „A tata fu ala lei” na a sma di kon nanga a fosi lei, a no so? A fosi lei ben de den sani di a sneki ben taigi Eva. Gado ben warskow den taki den ben o dede efu den ben nyan a froktu fu a bon, ma a sneki ben drai a heri tori èn a ben taki: „Unu no o dede kwetikweti” (Genesis 3:4). A de krin taki Yesus ben sabi taki Satan ben gebroiki a sneki fu du san a ben abi na prakseri. Na Openbaring di Yesus ben gi na apostel Yohanes, e tyari a heri tori kon na krin fu di a e kari Satan, „a fosi sneki”.​—Openbaring 1:1; 12:9.

Wi kan bribi trutru taki wan makti yeye kan gebroiki wan sneki fu meki a gersi leki a sneki e taki? Srefi libisma di no abi so furu makti leki yeye, kan du ala sortu kefalek sani na ini felem, noso den e meki a gersi leki wan popki e taki.

A moro krin buweisi

Yu no e agri taki den sma di no e bribi a tori fu Genesis no abi bun reide gi dati? Na a tra sei, krin buweisi de taki a tori disi tru.

Fu eksempre, Bijbel e kari Yesus Krestes „a getrow èn tru kotoigi” (Openbaring 3:14). Leki wan man di no abi sondu, noiti a ben lei èn noiti a ben drai wan tru tori. Boiti dati, a ben  leri sma taki a ben de kaba, langa ten bifo a ben libi leki wan man na grontapu. Fu taki en leti a ben libi makandra nanga en Tata Yehovah, „bifo grontapu ben de” (Yohanes 17:5). Sobun, a ben de kaba di libi na grontapu bigin. San a kotoigi disi di wi kan frutrow trutru, e taki?

Yesus ben taki fu Adam nanga Eva leki sma di ben de trutru. A ben taki fu a trow fu den di a ben fruteri taki Yehovah wani taki wan sma musu abi wán trowpatna nomo (Mateyus 19:3-6). Efu den no ben de noiti èn a dyari pe den ben e libi na wan anansitori nomo, dan na kori wan sma kori Yesus, noso na lei a ben e lei. Nowan fu den tu sani dati tru! Yesus ben de na hemel e luku fa wan bigi problema ben opo kon na ini a dyari fu Eden. Tra moro bun buweisi no kan de, a no so?

Fu taki en leti, te wan sma no e bribi a tori fu Genesis, dan a no o man bribi na ini Yesus. Boiti dati, a no o man frustan sonwan fu den moro prenspari tori èn den moro moi pramisi fu Bijbel di o kon tru seiker. Meki wi go luku na sortu fasi dati de so.

[Futuwortu]