Fu san ede someni trow e broko?

„Den Fariseiman kon na [Yesus] fu di den ben wani tesi en; dati meki den taki: ’Wan man abi a reti fu broko trow nanga en wefi fu ala sortu sani?’”​—Mateyus 19:3.

SON sma di ben libi na ini a ten fu Yesus ben aksi densrefi efu trowpatna man tan fu ala ten nanga makandra èn efu a trowlibi musu tan waka bun. Yesus ben taigi den: „Unu no leisi tu taki a ben taki: ’Dati meki wan man sa gowe libi en papa nanga mama èn a sa tan nanga en wefi, èn a man nanga en wefi sa de wán skin’? Sobun, den no de tu skin moro, ma wán skin. Fu dati ede, nowan sma musu prati san Gado poti na ondro wán tyatyari” (Mateyus 19:4-6). * A de krin taki Gado wani taki trowlibi musu tan waka bun.

Na ini furu kondre a de so taki sowan 40 procent noso moro fu ala den sma di trow e „prati”, èn e broko trow te fu kaba. A de so taki den rai di Bijbel e gi fu a trowlibi no fiti moro gi a ten disi? A kan taki furu trow e broko fu di a seti disi no bun?

Luku na eksempre disi: Tu trowpaar e bai a srefi sortu wagi. A fosi trowpaar e sorgu bun gi a wagi fu den èn den e luku bun fa den e rèi. A wagi fu den no e broko. A tra trowpaar no e teki ten èn den no e du noti fu ondrow a wagi fu den. Boiti dati, den e rèi en lawlaw. A wagi fu den e broko èn den e libi en na wan sei. Fu san ede a wagi fu a tra trowpaar broko? Pe a fowtu didon, na a wagi noso na den sma? A no de fu taki dati a frantwortu didon na den sma di abi a wagi.

Na so a de tu taki aladi furu trow e broko, toku dati no wani taki dati a seti fu a trowlibi no bun. Den milyunmilyun trowlibi di e waka bun e sori taki a seti disi bun. Den trowlibi disi e meki taki den sma nanga den osofamiri de koloku èn a e meki taki sani e waka bun na ini a libimakandra. Ma neleki fa yu musu ondrow wan wagi doronomo fu meki a tan bun, na so sma musu du tu na ini wan trowlibi.

Awansi yu trow wan tu dei noso wan tu tenti yari, den rai di Bijbel e gi, bun trutru fu di a e sori fa fu abi wan bun trowlibi. Luku wan tu eksempre na tapu den bladzijde di e kon.

[Futuwortu]